Read luo Baruk 6 Bible Online

Baruk 6 - luo bible

Baruk 6

¹Nebukadnezar ruodh Babulon biro darou katerou Babulon nikech richo ma usetimo e nyima, an Nyasaye.

²Ka usechopo Babulon, tyo unubed kuno kuom higni mang’eny madirom tienge abiriyo, to bang’e anadwoku e pinyu gi kue.

³E Babulon unune nyiseche molos gi fedha gi dhahabu kod bawo, ma ji oting’oe gokgi, kendo ma joma ok oyie kuoma oluoro ahinya.

⁴Omiyo, nyaka ubed motang’. Kik uluw timbe jopinje mamokogo,

⁵kendo ka uneno ka oganda mar joma lamo nyisechego oting’ogi, kawuotho e dala, to kik uluor nyisechegigo. To moloyo, onego uwach e chunyu niya, “A Ruoth Nyasaye ma Nyasachwa, in ema onego walami.”

⁶Onego uwach kamano nikech malaikana ni kodu ka rito ngimau.

⁷Nyisechego obaw gi dhahabu kod fedha, kendo kata obedo ni jatheth molony oserudo lewgi mapoth, to gin mana gik mag miriambo ma ok nyal wuoyo.

⁸Joma ok oyie kuomago loso osimbo mag dhahabu gi mag fedha, ma gisidho e wi nyisechegi ka gima gin nyiri mohero bisruok.

⁹Kamoro jodoloo kwalo dhahabu gi fedha mag nyisechegi mondo gikonyrego giwegi, kata mondo gichiwgi ni mon ma jochode matiyo e Hekalu maggi.

¹⁰Girwako nyiseche molos gi fedha gi dhahabu, kod bawogo gi lewni, mamiyo gichalo joma ngima, to kata obedo ni nyisechego orwak gi lewni kamano, to ok ginyal siro nyal kata thuth mondo kik chamgi.

¹¹Buru mag hekalu mamakogi mang’eny bende nyaka ywenigi ayweya oko e wengengi.

¹²Nyasaye moro ma kamono nyalo bedo gii luth e lwete kochalo gi jang’ad bura, to oonge gi teko mar ng’ado ni ng’ama okethone buch tho,

¹³moro to nyalo bedo gi ligangla kata le e lwete makorachwich, to oonge gi teko mar siro jolweny kata riembo jokuo.

¹⁴Mago duto nyiso ratiro ni ok gin nyiseche kata matin, emomiyo kik uluorgi.

¹⁵Nyisechego obet e hekalu to gin gik manono mana ka agulu mobarore.

¹⁶Wengegi opong’ gi buru ma tiend joma donjo e hekalu dumo kuomgi.

¹⁷Kaka iloro dhoudi duto no ng’ama oseng’adne buch tho nikech oketho ni ruoth, e kaka jodolo loro dhout hekalu mag nyisechegi gi kifunde kod lodi nikech giluor ni dipo ka jokuo okwalo nyisechegigo!

¹⁸Gimoko teyni mang’eny ni nyisechegi moloyo ma gin giwegi gikonyorego, to nyisechego ok nyal neno kata mana taya achiel!

¹⁹Gichalo gi achieel kuom yien mag hekalu ma bie chamo, kendo ngero wacho ni, chunygi ocham, nikech bie moa e lowo chamogi kaachiel gi lepgi ka gikia.

²⁰Iro mawuok e hekalu chido wengegi,

²¹kendo oliktiga gi opija kod winy mamoko piyo e wigi kod dendgi duto, kendo pekni bende chikore kuomgi.

²²Mago duto nyiso ni ok gin nyiseche ngang’; e momiyo kik uluorgi.

²³Dhahabu molosgigo ber chutho, to ka onge ng’ama yweyo dhahabugo, to nyisechego ok nyal rieny ngang. Kata mana e kinde mane ithedhogie gi mach, ne ok giwinj rem.

²⁴Bende ne ong’iewgi gi pesa mathoth moloyo, to gionge kata mana gi muya ma ginyalo yueyogo ngang’.

²⁵Ji ting’o gi e gokgi, nimar ok ginyal wuotho, kendo mano nyiso kaka gin gik manono. Ka gipodho, to joma lamogi yudo wichkuot kuom chungogi.

²⁶To kosechunggi, to ok ginyal sudo giwegi, kendo kya gileng’ore to ok ginyal chung’ tir kendgi. Chiwo mimiyogi chalo gi chiwo mimiyo ng’ama otho.

²⁷Jodolo kawo gik motimnigigo liswa mondo ging’iew gilok pesa kendo gikonyrego. Mondgi bende kawo lemo maduong’ mag chiayo motimgo liswa, githolo, to ok gimi jochan kata joma odhier gimoro. Mon man gi boke, kod ma manyuru ok oluor mulo nyisechego.

²⁸Gigo duto nyisou ni ok gin nyiseche kata matin; omiyoo kik uluorgi.

²⁹Chutho, ere kaka diluong gik molos gi fedha gi dhahabu kod bawo ni nyiseche, ka mon ema golonigi lisweche?

³⁰Jodolo manie hekalu maggi bet abeta piny ka lepgi oyiech kendo ka yie wigi kod yie tikgi oliel, kendo ka wigi ni nono,

³¹kendo gigoyo nduru e nyim nyisechegi mana kaka ji timo ka gin e liel.

³²Jodolo kawo lep nyisechego miyo mondgi gi nyithindgi.

³³Kata gitimo ni nyisechegi maber kata marach, to gionge gi teko mar chuli ber kata rach. Gionge gi teko mar keto ruodhi e kombegi, kata gologi.

³⁴Teko mar pogo mwandu kata pesa bende giongego. Ka ng’ato ok ochopo singruok mane otimonigi, to ok ginyal timone gimoro.

³⁵Ok ginyal reso ng’ato e tho, kata reso ng’ama nyap kuom ng’ama tek,

³⁶kata miyo muofu neno, kata reso ng’ato e chandruok,

³⁷kata kecho chi liel, kata timo ng’wono ni nyathi ma kich.

³⁸Nyiseche molos gi bawo kendo obaw gi dhahabu kod fedha, chalo gi kite mogor e kor got, kendo joma lamogi noyud wichkuot,

³⁹nikech ere kaka ng’ato nyalo paro kata wacho ni gin nyiseche.

⁴⁰Kata mana jo-Babulon giwegi ochayo nyisechegi, nikech ka giyudo ng’ama momo ka ok nyal wuoyo to gitere ir Bel ma nyasachgi ka gikwaye mondo omiye owuo, ka giwuondore ni onyalo winjogi.

⁴¹Ok ginyal neno ni gitimo gima ofuwo, ma mondo omi giwe nyisechegi, nikech gin giwegi gionge gi rieko.

⁴²Mon motueyo tonde e nungogi bet e dir yore ka wang’o mihudhi ka ubani.

⁴³Ka ng’at moro makadho kanyo okawo achiel kuom mon-go moterorego, to dhakono goyo ni dhako wadgi mobet bute siboi kojare ni en ok dichwo oyiere, kendo ok ochod tond nungone!

⁴⁴Gik moko duto mogamore gi nyisechego gin mana miriambo lilo. Ere kaka ng’ato nyalo paro kata wacho ni gigo gin nyiseche?

⁴⁵Jopa bawo gi jothedh dhahabu ema ne olosogi, kendo kitgi gin kido ma fundego ema oyiero.

⁴⁶Ka kata mana joma losogi ema ok nyal dak aming’a, koro ere kaka gik ma giloso nyalo bedo nyiseche?

⁴⁷Gik ma gipuonjo nyithindgi gin mana miriambo gi wichkuot.

⁴⁸Ka lweny kata masira owuok, to jodolo ema nyaka pim wach kaka digipondi gi nyisechegi.

⁴⁹Koro ere kaka ng’ato nyalo kia ni gik ma ok nyal resore e lweny kata e masiche ok gin nyiseche?

⁵⁰Chieng’ moro ji nong’e ni gik molos gi bawo kendo obaw gi dhahabu kod fedhago gin mana gik manono. Adier, ogendini duto gi ruodhi duto nong’e ni gigo ok gin nyiseche, to gin mana gik ma dhano oloso, maonge gi teko kaka Nyasaye nigo.

⁵¹Bende nitie ng’ama pok ong’eyo ni gigo ok gin nyiseche?

⁵²Nyiseche ma kamano ok nyal keto ruoth e piny moro, kata miyo ji koth, kata chano wechegi giwegi, kata konyo ng’ato motimne marach.

⁵³Gin mana kaka agak mahuyo e kind polo gi piny ma ok nyal konyore.

⁵⁴Ka mach omuoch e wi hekalu mag nyiseche mag bawo mobaw gi dhahabu kata gi fedhago, to jodologi ringo mondo oresre. Nyiseche wegi to dong’ adong’a ka wang’ mana ka yiend hekalu.

⁵⁵Ok ginyal siro ruoth moro, kata wasigu bende ok ginyal kedogo.

⁵⁶Kuom mano, ere kaka ng’ato nyalo yie kata paro ni gin nyiseche?

⁵⁷Nyiseche mag bawo gi dhahabu kata gi fedhago ok nyal siro jokuo kata jomecho. Jogo oloyogi gi teko, kendo nyalo mayogi dhahabu gi fedha man kuomgi, mi lal gi lewni ma girwako, nikech gionge gi teko mar konyruok.

⁵⁸Ruoth manyiso tekone, kata dak makonyo tich ot, kata dhoot marito gik man ei ot, kata sich bawo manie od ruoth oloyo nyisechegi.

⁵⁹Chieng’ gi due kod sulue marieny winjo wach ka gitiyo tich momigi.

⁶⁰Polo bende ka mil, to en gima lich neno. Yamo bende kudho e pinje duto;

⁶¹boche polo bende winjo wach Nyasaye ka gikadho e wi pije duto; mach moor koa e polo mondo owang’ gode gi bunge bende timo kaka Nyasaye ochiko.

⁶²To nyisechego ok nyal romo gi gigo duto kuom ber kata kuom teko.

⁶³Omiyo onge ng’ama nyalo paro kata wacho ni gin nyiseche, nikech gionge gi teko mar ng’ado bura, kata mar timo gima ber ni ji.

⁶⁴Kuom mano, kik uluorgi nimar ung’eyo ni ok gin nyiseche.

⁶⁵Ok ginyal kuong’o ruodhi kata guedhogi.

⁶⁶Bende ok ginyal keto ni ji ranyisi e polo, kata rieny ka chieng’, kata chiwo ler ka due.

⁶⁷Kata mana ondiegi mae thim oloyogi, nimar ondiegi nyalo geng’ore ka ritore giwegi.

⁶⁸Onge ranyisi kata matin ma nyiso ni gigo gin nyiseche, omiyo kik uluorgi.

⁶⁹Nyiseche mag bawo mobaw gi dhahabu gi fedhagi chalo gi gima oket e puoth budho mondo obwog le to ok kony gimoro.

⁷⁰Gichalo gi bung kudho manie puodho ma winyo awinya piyoe, kata ka ringre ng’ama otho mowit oko e mudho.

⁷¹Lewni maratiglo gi mag bafta maber matow e dendgi nyisou ni ok gin nyiseche. To achien bie nochamgi gin giwegi, kendo ji duto nochagi.

⁷²Ber bedo ng’ama kare maonge gi nyiseche manono. Ng’ama kamano ok nobed gi wichkuot nyaka chieng.