Read luo Ezekiel 14 Bible Online

Ezekiel 14 - luo bible

Ezekiel 14

¹Jodong Israel moko nobiro ira mondo openja wach Ruoth Nyasaye.

²Eka Ruoth Nyasaye nowuoyo koda,

³kawachona niya, “Wuod dhano, jogi oketo chunygi kuom lamo nyiseche manono, kendo giyie mondo nyisechego otergi e richo. Koro ere kaka giparo ni anyalo dwokogi?

⁴“Omiyo nyisgi ni an Ruoth Nyasaye awacho kama: An awuon ema nadwok ng’ato ang’ata ma ja-Israel moketo chunye kuom lamo nyiseche manono, kendo oyie mondo nyisechego otere e richo, to pod eka biro mondo openj janabi wach! Anadwoke dwok ma oromo gi lamo nyiseche mang’eny manonogo!

⁵Kamano ageno ni kum ma abiro kumogigo biro miyo giduogo ira, kata obedo ni giseweya ka gilamo nyiseche manonogo.

⁶“Kuom mano, koro nyis jo-Israel ni an Ruoth Nyasaye awacho kama: Duoguru ira mondo uwe nyisecheu manono kod timbeu modwanyorego.

⁷E kinde duto ma ja-Israel kata japiny moro modak kuom jo-Israel oweya, mi olamo nyiseche manono, kendo oyie nyisechegoo otere e richo, to eka pod biro mondo openj wach kuom janabi, an awuon ema nadwoke!

⁸Anabed mamon kode, mi atime ranyisi ma asetimogo ji, bende anagole kuom oganda joga, mi ung’e ni an e Ruoth Nyasaye.

⁹“Ka gimoro owuondo janabi, mi owacho wach ma ok adier, to an Ruorh Nyasaye ema awuonde, omiyo abiro rieyo bada mondo atieke, oa kuom jo-Israel.

¹⁰Janabi kaachiel gi ng’ama openje wach noyud kum achiel machalre.

¹¹Kamano jo-Israel ok nochak oweya, ka dwanyore gi richogi. Ginibed joga, kendo an bende nabed Nyasachgi. An Ruoth Nyasaye ema awacho kamano.”

¹²Ruoth Nyasaye nochako owachona niya,

¹³“In wuod dhano, ka jopiny moro otimo richo kendo oweya, to anabi, mi aketh chambgi. Anakel kech mondo oneg ji kod jamni machalre.

¹⁴To kata dabed ni ji adek ma Nowa gi Daniel kod Ayub odak kuno, to timbegi makare dires mana ngimagi giwegi kende. An Ruoth Nyasaye ema awacho kamano.

¹⁵“Ka akelo ondiegi mi onego ji, kendo piny okethore, ma onge ng’ama nyalo wuothoe,

¹⁶to kata da bed ni ji adekgo odak kuno, to ok digires kata mana nyithindgi giwegi, to ngimagi kende ema digiresi, kendo piny dilokre thim. An Ruoth Nyasaye mangima ema akuong’ora kamano.

¹⁷“Ka akelo lweny mager e piny, motieko ji kod jamni machalre,

¹⁸to kata da bed ni ji adekgo odak kuno, to ok digires kata mana nyithindgi giwegi, to ngimagi kende ema digiresi. An Ruoth Nyasaye ema awacho kamano.

¹⁹“Kata ka akelo tho marach e piny, ka an gi mirima mager, mi anego ji mang’eny kod jamni machalre,

²⁰to kata da bed ni Nowa gi Daniel kod Ayub odak kuno, to ok digires kata mana nyithindgi. Timbegi makare dires mana ngimagi giwegi kende.

²¹ “Koro an Ruoth Nyasaye awacho kama: Ka kamano, Jerusalem none malit machal nadi, ka akumogi gi lweny gi kech gi ondiegi kod tho marach, ma gin kumna ang’wen marichoe moloyo, mabiro nego ji kod jamni machalre?

²²To ka jomoko otony, mi obiro iru gi nyithindgi ma gisereso, to ranggiuru maber ane. Unune ka gin joma timbegi mono, mi unuyie ni kara kum ma akumogo Jerusalem ni kare.

²³Bende ka uneno kaka richogi chalo, to unuyie, mi ung’e ni kara ne akumogi mana e wang’e. An Ruoth Nyasaye ema awacho kamano.”