Read luo Ezekiel 16 Bible Online

Ezekiel 16 - luo bible

Ezekiel 16

¹Ruoth Nyasaye nochako owuoyo koda, mowachona niya,

²“Wuod dhano, nyis Jerusalem gik makuero mosetimo,

³bende nyise ni an Ruoth Nyasaye awacho kama: Ne onywoli e piny Kanaan. Wuoru ne ja-Amor, to meru ne nyar jo-Hiti.

⁴Kane onywoli, to onge ng’ama ne ong’ado pendi, kata mane olwoki, kata mane owiri gi chumbi, kata mane oboyi gi nanga.

⁵Ooyo, onge ng’ama ne okechi, mi otimoni gigo, to ne owiti mana oko e pap, nikech onge ng’ama ne dwari.

⁶“Ne oyudo akadho machiegni gi kama ne intie, mi aneni, kichadhori gi rembi iwuon. Kata obedo ni ne itimo remo kamano, to ne awachoni ni mondo ibed mangima,

⁷mi ne amiyo idongo mana ka yath madongo maber. Ne idongo motegno, kendo marabora, mi idoko nyako mopong’. Thundi ne ochung’ maber, kendo yie dendi noseti, to kata kamano ne in duk.

⁸“Kane achako akadho machiegni kodi, ne ayudo ka iseromo mako osiep, omiyo ne ayaro lawa, mi aumogo dugi, kendo ne ayie ni abiro kendi. Adier, ne atimo kodi singruok, mi idoko mara. An Ruoth Nyasaye ema awacho kamano.

⁹“Ne akawo pi, mi alwokogo remo oko kuomi, kendo ne awiro dendi gi mo.

¹⁰Ne arwaki gi lewni mogorie gik mabeyo, mi amiyi wuoche ma nengogi tek, kaachiel gi kitamba wich maber, kod law arwaka mar las.

¹¹Bende ne amiyi tigo ma nengone tek, gi ronge mag lwedo, kod thiwni miketo e ng’uti.

¹²Ne arwakoni tere e umi, kod stadi e iti, kendo ne amiyi osimbo maber mondo isidh e wiyi.

¹³Kamano ne in gi gik mabeyo mag fedha kod mag dhahabu, bende pile ne irwako lewni mabeyo. Ne ichamo kuon molos gi mogo mayomie moloyo, kaachiel gi mor kich kod mor zeituni. Ne ijaber malich, kendo ne ibedo ruoth madhako.

¹⁴Humb berni nolak e pinje dutu, kendo onge nyako moro amora mane oloyi gi ber, nikech an ema ne achueyi kamano. Mano e gima an Ruoth Nyasaye awacho.

¹⁵“To ka ineno ni ijaber ahinya, ne iyie mondo ng’ato ang’ata madwari oterre kodi.

¹⁶Ne ikawo lepi moko ma ilicho kuondeni mag lemo, kendo ne idwanyori gi ji duto kuondego, mana ka dhako ma jachode.

¹⁷Ne ikawo gik mabeyo mag fedha gi dhahabu mane amiyi, mi ilosogo nyiseche manono machwo, kendo idwanyorigo.

¹⁸Bende ne ikawo lewni mogorie gik mabeyo mane amiyi, mirwako ni nyiseche manonogo, kendo ichiwonigi mor zeituni kod ubani mane asemiyi.

¹⁹Ne ikawo mogo mayomie moloyo, kaachiel gi mor zeituni kod mor kich mane asemiyi, mi ichiwo ka misango ni nyiseche manonogo, mondo gibed mamor kodi. An Ruoth Nyasaye ema awacho kamano.

²⁰“Bang’e ne ikawo yawuowi kod nyiri mane isenywolona, mi ichiwo ka misango ni nyiseche manono. Iparo ni wech mane iweyago ne gima tin,

²¹ma pod ne ikawoe mana nyithinda, ichiwo ka misango ni nyiseche manono?

²²E kinde duto mane itimo timbe maricho mag chode, ne ok iparoe ngang’ ndalo mane in nyathi, ka in duk, kendo ichadhori gi remo.”

²³To Ruoth Nyasaye ne omedo wacho ni Jerusalem niya, “Inine malit nikech kane isetimo timbe mamonogo duto,

²⁴to ne igero kuonde milamoe nyiseche manono, kendo mitimoe timbe mag chode.

²⁵Ne ikawo berni, irucho e buru, mi ichiwo ringri ni ng’ato ang’ata ma dwari, kimedo bedo jachode odiechieng’ kodiechieng’.

²⁶Bende ne iweyo jo-Misri ma jogombo mokiewo kodi oterre kodi, mi imiya mirima gi timbeni mang’eny mag chodego.

²⁷“Koro aserieyo bada mondo akumi, kendo amayi gueth mane aguedhigo. Asechiwi e lwet jo-Filistia ma mon kodi, kendo mojok gi timbeni mag dwanyruok.

²⁸Joma ne isebedo ka idwanyorigo ok oromi, omiyo ne idwanyori gi jo-Asuria, to gin bende ne ok giromi.

²⁹Ne ichako idhi ir jo-Babulon, ma johala, to gin bende ne ok giromi!

³⁰“Koro in dhako ma jachode, an Ruoth Nyasaye awacho kama: Mago duto isetimo mana ka dhako ma jachode ma onge wichkuot, kimiyago mirima.

³¹Ne igero kuonde ma ilamoe nyiseche manono e wang’yore duto to kendo itimoe timbe chode. To in ok ikaw pesa, ka mon mamoko ma jochode!

³²Ichalo dhako ma weyo chwore to terore gi chwo mamoko nono.

³³Dhako ma jachode ichulo pesa. In to, in ema ne ichiwo gik moko ni osiepeni, kendo ne imiyogi asoya mondo giduto gibi giterre kodi.

³⁴Omiyo in ipogori gi mon moko ma jochode. Onge joma ne dwari mondo ochodi, omiyo kar yudo pesa kuomgi, to in ema ne ichulogi! Kamano ipogori gi mon mamoko ma jochode adier!

³⁵“Koro in dhako ma jachode, winji gima an Ruoth Nyasaye awacho.

³⁶Awacho kama: Ne ilonyori duk, mi ichiwo ringri ka jachode ni osiepeni, kendo ni nyiseche manono makuero. Bende ne inego nyithindi ka misango ni nyiseche manonogo.

³⁷Mano omiyo abiro choko osiepeni duto, mane ihero kod mane ok ihero, kanyakla. Abiro kelogi duto iri mondo gilwori ka giketi diere, mi olony lepi mondo gine dugi.

³⁸Anang’adni buch tho ka an gi mirima mager, nikech terruok kod nek mane itimo.

³⁹Anaketi e teko osiepenigo, mi gimuk kuonde ma itimoe timbe chode, kendo ilamoe nyiseche manono. Ginikaw lepi, kaachiel gi gigi mabeyo mag fedha gi dhahabu, mi giweyi duk sikit.

⁴⁰“Ginikelni oganda maduong’, mi chieli gi kite, kendo chadhi matindotindo gi ligangla.

⁴¹Giniwang’ uti, mi gikumi, mana ka mon mang’eny neno. Kamano anatiek timbeni mag chode, mi iwe chiwo gik moko ni osiepeni.

⁴²Bang’e mirimba noto, kendo nabed gi kue, mi ok nachak akech kodi kendo.

⁴³Wiyi ne owil gi rit mane aritigo kapod itin, mi iwang’o iya gi gik moko duto mane itimo. Mano emomiyo anakumi moromo gi timbeni duto, nimar ne imedo timbe mag dwanyruok kuom timbe duto makuero ma isetimo! An Ruoth Nyasaye ema awacho kamano.”

⁴⁴Ruoth Nyasaye ne ochako owacho niya, “Yaye Jerusalem, ji biro goyi ngero kama: ‘Awendo ok we yiere.’

⁴⁵In nyar meru adier adier! Meru ne mon gi chwore kod nyithinde mana kaka isetimo. Bende ichalo gi nyimineni mane mon gi chwogi kod nyithindgi. In, kaachiel gi mier mamoko ma nyimineni, un nyi nyar jo-Hiti to wuoru ne en ja-Amor!

⁴⁶“Nyameru maduong’ en Samaria mane ni yo nyandwat kaachiel gi mier matindo mokiewo kode. To nyameru matin en Sodom, mane ni yo milambo kaachiel gi mier matindo mokiewo kode.

⁴⁷Niluwo yoregi, mitimo timbe makuero mane gitimo, to mano ne ok oromi ngang’. Omiyo bang’ kinde matin kende, ne ibedo kitimo gik maricho moloyogi e yore duto.

⁴⁸“An Ruoth Nyasaye awacho kama: Kaka an Nyasaye mangima, nyameru Sodom, gi mier matindo mokiewo kode ne ok otimo timbe mamono moromore gi mago ma in kaachiel gi mier matindo mokiewo kodi isetimo!

⁴⁹Sodom kaachiel gi mier matindogo, ne josunga, nikech ne gin gi chiemo mang’eny, kendo ne gidak maber gi kue. To ne ok gikony jochan kaachiel gi joma ok nyal konyore kendgi.

⁵⁰Ne gin josunga ma wigi tek, kendo ne gitimo gik ma amon-go, omiyo ne atiekogi, kaka inenono.

⁵¹“Richo mane Samaria otimo ok gimoro, kipimo gi richoni! Ne itimo timbe modwanyore maricho moloye. Timbenigo miyo nyimineni nenore ka joma onge ketho.

⁵²Kuom mano, koro wichkuot nie wiyi. Richoni dongo ahinya moloyo mag nyimineni, omiyo nyiminenigo nenore ka joma beyo. Emomiyo ting’ ating’a wichkuotni, nimar isemiyo nyimineni nenore ka joma ler!”

⁵³Ruoth Nyasaye nochako owacho ni Jerusalem niya, “Abiro miyo Sodom gi Samaria kaachiel gi mier matindo mokiewo kodgi, chak dhi nyime maber. In bende abiro chako amiyo idhi maber.

⁵⁴Wiyi biro kuot, kendo wichkuot mabiro makino noduog chuny nyimineni, mi gipar ni gin johawi.

⁵⁵Ginichak gidhi maber, kendo in, kaachiel gi mier matindo mokiewo kodi nochak ogeru kendo.

⁵⁶Donge ne inyiero Sodom kisungori,

⁵⁷e kinde mane timbeni mamono pok oel e lela? Koro ichalo mana kode, kendo joma mon kodi duto mokiewo kodi, kaka jo-Edom kod jo-Filistia, nyieri.

⁵⁸Koro nyaka iyud kum ma dhogruokni gi timbeni makuero okelo. An Ruoth Nyasaye ema awacho kamano.”

⁵⁹Ruoth Nyasaye nomedo wacho niya, “Abiro timoni mana kaka oromore gi timbeni, nimar ne ichayo winjruok mane wan go, mi ok irito singruok mane itimo koda.

⁶⁰An to abiro rito singruok mane atimo kodi kapod itin, kendo abiro timo kodi singruok machielo, mosiko nyaka chieng’.

⁶¹Inipar gik ma isetimo, mi wiyi kuodi, kineno ka nyameru maduong’ gi matin joduogo. Anami gichal nyigi, kata obedo ni ne ok asingora kodi kamano.

⁶²Abiro chako atimo kodi singruok, mi ining’e ni kara an e Ruoth Nyasaye.

⁶³Chieng’ ma anapuodh gik maricho duto ma isetimo, eka inipargi, mi wiyi kuodi, ma kata mana loso ok nilosi. An Ruoth Nyasaye ema awacho kamano.”