Read luo Ezekiel 17 Bible Online

Ezekiel 17 - luo bible

Ezekiel 17

¹Ruoth Nyasaye ne owuoyo koda,

²mowachona niya, “Wuod dhano, nyis jo-Israel ngeroni,

³mondo ging’e gima an Ruoth Nyasaye adwaro wachonigi: “Ne nitie ongo moro maduong’ ahinya mane nigi buombe madongodongo. Dende duto ne yier mabeyo opong’o. Chieng’ moro ne ohuyo modhi e piny Lebanon, mi ojako wi yadh sida.

⁴Ne oting’e, mi otere e pinyy joohala, mokete e dala maduong’ mar Babulon, ma duke ng’enyie.

⁵Bang’e ne okawo yath mapod tin e piny Israel, mi opidho kuno e lowo momew ma pi ng’enyie.

⁶Yadhno noloth mi odoko yadh mzabibu mayoreyore gi piny. Bedene ne otimo otiep kochomo kuma ongo nitie, to tiendene nodonjo matut ei lowo. Bedene kaachiel gi pote ne onya mang’eny.

⁷“To bende ne nitie ongo moro maduong’ man gi buombe madongodongo, kendo ma yier opong’o dende. Yadh mzabibuno ne otero tiendene gi bedene kochomo kuma ongo machielono nitie, koparo ni ongono biro miye pi mang’eny moloyo mane nie puodho kama nopidheeno.

⁸To chutho, yadh mzabibuno ne osepidh e lowo momew ma pi oromo, omiyo ne onyalo golo pote mathoth, kendo onyag olemo, mi obed yath maber ahinya.

⁹“Kuom mano, koro an Ruoth Nyasaye, apenjo kama: Bende yadh mzabibuno biro betie, mi dongi? Donge ongo mokwongo cha biro dhuole gi lop tiende, mi lwar olembene piny kendo tur bedene, mi pote wang’? Pudhe oko yot, ma ok nyal dwaro oganda maduong’ kata ng’ama ratego!

¹⁰En adier ni osepidhe, to bende obiro betie, mi odongi? Donge obiro two ka yamb oro moa yo wuok chieng’ okudhe kama entieno?”

¹¹Ruoth Nyasaye nochako owachona niya,

¹² “Penj ane joma jopiemgi ka bende ging’eyo tiend ngerono, nyisgi ni ruodh Babulon ne obiro Jerusalem, mi omako ruodh Jerusalem, kaachiel gi jodonge, odokgo Babulon.

¹³Ne okawo owadgi ruoth moro, mi otimogo winjruok, komiyo kuong’ore. Joma dongodongo to nokawo, mi otero e tuech,

¹⁴mondo ogandano kik chak ting’re, to mondo obed gi adiera ni winjruok mane otimo ok okethore.

¹⁵To ruodh Juda ne ong’anyo, mi ooro joote Misri, mondo oyudne farese kod oganda lweny maduong’. To bende dolo lweny adier? Bende dotony adier, kuom timo gima kamano? Koso bende doketh winjruok, mi weye mak okume?”

¹⁶“An Ruoth Nyasaye awacho kama: Kaka an e Nyasaye mangima, ruodhni biro tho e piny Babulon, nimar oseketho singruok mane otimo kokuong’ore ni ruodh Babulon, mane okete e tich ruoth.

¹⁷E kinde ma jo-Babulon obiro donjoe Jerusalem, ka gingo pidhe mag lowo kendo kunyo buche e dir ohinga, to Farao ok noorne oganda lweny maduong’ mondo okonye, omiyo ji notho mang’eny.

¹⁸Kaka ruodh Juda ne oketho winjruok mane otimo kokuong’ore, mi otimo gik makamago, omiyo ok notony.”

¹⁹“An Ruoth Nyasaye amedo wacho kama: Kaka an Nyasaye mangima, abiro kumo ruodh Juda kuom ketho winjruok mane otimo kokuong’ore gi nyinga.

²⁰Abiro chikone obadho, mi amakego. Eka anatere Babulon, mi akume kuno nimar ne oweya.

²¹Jolwenje marateke noneg e lweny, to modong’ noke kuonde duto. Eka unung’e ni an Ruoth Nyasaye ema asewuoyo.”

²²Ruoth Nyasaye wacho kama: “An bende abiro jako wi yadh sida marabora, mi akaw chunye mayom,

²³apidhi ewi god Israel maborie moloyo. Bedene nojany, kendo nonyag kodhi, mi odok yadh sida maber ahinya. Koth winy duto noged kuome, mi yud yueyo e tipone.

²⁴Yien duto mae piny nong’e ni an Ruoth Nyasaye ema atong’o yien maraboche, to amiyo yien matindo dongo maboyo. Bende an ema amiyo yien mang’ich two, kendo amiyo yien motwo chako doko mang’ich. An Ruoth Nyasaye ema awacho kamano, kendo abiro timo gima asewacho.”