Read luo Ezekiel 19 Bible Online

Ezekiel 19 - luo bible

Ezekiel 19

¹In Ezekiel, ywag jotend Israel, kiwacho kama:

²“Mano kaka meru ne chalo sibuor madhako maratego! Ne odak e kind sibuoche, kendo ne onywolo nyithindo mang’eny.

³Ne opuonjo nyathine achiel, mi opuonjore mako le, kendo odoko jacham ji.

⁴Ogendini nowinjo humbe, eka ne gikunyone bur, mi onyumoree. Bang’e ne giywaye gi nyororo mi gitere Misri.

⁵Kane min oneno ni gima ne ogeno osekethore, ne ochako opidho nyathine machielo, mi en bende nolokore sibuor mager.

⁶Kane odoko maduong’, ne owuotho gi sibuoche mamoko, mi opuonjore mako le, kendo odoko jacham ji.

⁷Ne omuko ut ruodhi, mi oweyo miechgi gundni, kendo pile kane oruto, to kibaji goyo joma odak e pinyno.

⁸Eka ogendini moa kuonde duto nochokore mondo oked kode. Ne gikunyone bur, mi onyumoree.

⁹Bang’e ne gitueye gi nyororo, mi gitere ni ruodh Babulon. Ne obole e od tuech, mondo kik ochak owinj dwonde kendo e gode mag Israel.”

¹⁰“Meru ne chalo gi mzabibu mopidhi e bath aora, motimo oboke mathoth, kendo manyak maber, nikech ne nitie pi mang’eny.

¹¹Bede mzabibuno ne otegno, moromo loso ludhe ruodhi. Ne odongo mabor mi otundo e polo, kendo ji duto neno kaka orabora kendo otimo otiep maber.

¹²To ne odhuole oko gi lop tiende gi mirima mager, mi opodho piny. Yamb oro moa yo wuokchieng’ notwoyo olembene. Bedene bende ne otur, kendo otwo, mi owang’ e mach.

¹³To mzabibuno me ochak opidh kendo e piny motwo ma pi ongee.

¹⁴Ne omuoch mach, mi majno owang’o bedene gi olembene. Kamano bedene ok nochak obed motegno, moromo loso ludhe ruodhi.” Mano en wend ywak ma osewer ndalo mang’eny.