Read luo Ezekiel 20 Bible Online

Ezekiel 20 - luo bible

Ezekiel 20

¹Chieng’ due apar, due mar abich, e higa mar abiriyo, jodong’ Israel moko nobiro ira mondo openj Ruoth Nyasaye wach. Kane oyudo gibet e nyima,

²Ruoth Nyasaye nowuoyo koda, mowachona niya,

³“Wuod dhano, nyis jogi ni an Ruoth Nyasaye awacho kama: Bende usebiro ni mondo upenja wach adier? Kaka an Nyasaye mangima, ok anayienu mondo upenja gimoro! An Ruoth Nyasaye ema awacho kamano.

⁴“Wuod dhano, ng’adnigi bura! Adier, kiparonigi timbe modwanyore mane kweregi otimo.

⁵ Nyisgi ni an Ruoth Nyasaye awacho ni, kane ayiero jo-Israel, ne afwenyoranigi e piny Misri, mi akuong’ora ni an Ruoth Nyasaye ma Nyasachgi.

⁶Mano e kinde mane asingorae ni abiro gologi e Misri mondo atergi e piny momew kendo maberie moloyo pinje mamoko duto, mane aseyieronigi.

⁷Ne awachonigi ni mondo giwit nyiseche manono mag Misri ma gihero, kendo ni kik gidwanyre kodgi, nikech an e Ruoth Nyasaye ma Nyasachgi.

⁸“To ne gipiem koda, mi gitamore winja. Ne ok giwito nyiseche modwanyore mag Misri, kata weyo lamogi ne ok giweyo. Kuom mano, ne achano mondo atiekgi gi mirimba mager e piny Misri kuno.

⁹To ne ok atimo kamano, nikech mano dine oketho nyinga, nimar ne asewacho ni jo-Israel, ka joma ne odak e igi kod ogendini mokiewo kodgi winjo, ni abiro gologi Misri.

¹⁰“Kamano ne agologi Misri, mi aterogi e thim.

¹¹ Eka ne amiyogi chikena, kendo apuonjogi buchena, ma ka ng’ato orito, to yudo ngima.

¹² Ne aketo ndalo mag Sabatona obed ranyisi mar winjruok e kinda kodgi, mondo oparnigi ni an Ruoth Nyasaye ema ayierogi mondo gibed maga.

¹³To ne gipiem apiema koda, kata mana e thim, ka giketho buchena, kendo gidagi chikena, ma ka ng’ato orito, to yudo ngima. Bende ne giketho ndalo mag Sabatona chuth. Mano ema omiyo ne achano mondo atiekgi gi mirimba mager e thim kuno.

¹⁴“To ne ok atimo kamano, nikech mano dine oketho nyinga, nimar ogendini mamoko ne oseneno ka agolo jo-Israel e piny Misri.

¹⁵ To ne akuong’ora e thim ni ok natergi e piny momew kendo maberie moloyo pinje mamoko duto mane asingora ni namigi.

¹⁶Ne akuong’ora kamano nikech ne gidagi rito chikena, kendo ne giketho buchena. Ndalo mag Sabato bende ne ok girito, nikech ne gihero mana lamo nyisechegi manono.

¹⁷“To kata kamano, ne akechogi, mi ok atiekogi chuth e thim kuno.

¹⁸Bende ne akwero nyithindgi kuno niya, ‘Kik urit chike mane kwereu oketo, kendo kik uluw puonjgi, kata kik udwanyru kuom lamo nyisechegi manono.

¹⁹An Ruoth Nyasaye e Nyasachu, omiyo rituru buchena kod chikena.

²⁰Nyaka une ni ndalo mag Sabatona orit maler, mondo obed ranyisi mar singruok manie kinda kodu, mondo oparnu ni an Ruoth Nyasaye e Nyasachu.’

²¹“To kata obedo ni ne akwerogi kamano, to gin bende ne gipiem koda. Ne giketho chikena, kendo ne ok girito buchena, ma ka ng’ato orito, to yudo ngima. Ne giketho ndalo mag Sabatona, omiyo ne achano mondo atiekgi duto gi mirimba mager e thim kuno.

²²To ne ok atimo kamano, nikech mano dine oketho nyinga kuom ogendini mane oneno ka agolo jo-Israel e piny Misri.

²³ To ne achako akuong’ora e thim ni anakegi e kind ogendini mopogore opogore e piny ngima.

²⁴Ne akuong’ora kamano nikech ne gisedagi chikena kendo ne giketho buchena, mi ne ok girito ndalo mag Sabatona, bende ne gilamo nyiseche manono mag kweregi.

²⁵Bang’e ne amiyogi buche maricho kod chike ma ok kel ngima.

²⁶Ne amiyo gibedo mogak kuom gik mane gichiwo ni nyiseche manono, kendo kuom chiwo misango gi yawuotgi makayo. Ne atimo kamano mondo abwoggigo, mi ging’e ni an e Ruoth Nyasaye.

²⁷“Kuom mano, wuod dhano, koro nyis jo-Israel ni awacho kama: Yo machielo mane kwereu oweyago, ka yanya e ma:

²⁸Kane akelogi e piny mane asingora ni namigi, to kamoro amora mane ginenoe got mabor kata yath motimo otiep ne gitimoe misengni. Misengni miwang’o kod mago miolo piny mane gitimo, ne omiya mirima.

²⁹(Ne apenjogi ni, ‘Kuonde moting’ore ma udhiyegi, to gin gik manade?’ Mano emomiyo pod iluongogi ni kuonde moting’ore kamano nyaka chil kawuono.)

³⁰Koro nyis jo-Israael ni an Ruoth Nyasaye awacho kama: Ere gima omiyo udhogoru gi nyiseche manono mana kaka kwereu notimo?

³¹Kata kawuono ka uchiwo mich kendo ka uwang’o yawuotu ka misango, to pod udhogoru mana gi nyiseche manono. To eka un jo-Israel pod uparo mana ni anyalo yie mondo upenja wach! To kaka an Ruoth Nyasaye mangima, ok ayienu mondo upenja gimoro kata matin!

³²Uparo ni ubiro bedo machal gi ogendini modak e pinje mamoko, malamo yien gi lwendni, to akwerou ni mano ok timre.

³³“An Ruoth Nyasaye mangima akuong’ora ni abiro tiyo matek gi tekona duto kod mirimba mager.

³⁴Adier, ka agolou e pinje mane akeyoue, mi achokou kanyakla, to abiro nyisou tekona maduong’ kod mirimba mager!

³⁵Anateru e Thim Ogendini, mi ayalu kuno mana e wang’u kuneno!

³⁶Kaka ne akumo kwereu e Thim Sinai, e kaka koro abiro kumou kuno. An Ruoth Nyasaye ema awacho kamano.

³⁷“Abiro tiyou matek, mi ami ubed joma orito singruokna.

³⁸Bende anagol kuomu joma jopiem, kendo maketho chikena. Anagolgi e pinje ma koro gidakie, to ok anayienigi giduogi e piny Israel. Eka unung’e ni kara an e Ruoth Nyasaye.

³⁹“An Ruoth Nyasaye awacho kama: Ara, un jo-Israel, koro dhiuru adhiya nyime gi tiyo ni nyisecheu manonogo! To aramo ni e giko to ubiro luora, mi ok unumi nyinga maler kethre kuom chiwo mich ni nysecheu manono.”

⁴⁰Ruoth Nyasaye nochako owacho niya, “Un jo-Israel duto, unudog e pinyu, mi ulama ewi god Israel marabora ma en goda maler. Anabed mamor kodu, kendo anadwar mondo ukelna misengni mau kod chiwo mabeyo mosewalna.

⁴¹Ka asegolou e pinje mane okeue, mi achokou kanyakla, to anayie misengni mang’ue ng’ar ma uwang’o. Ka ulama kamano, to ogendini nong’e ni an Nyasaye maler,

⁴²kendo ka aduogou e piny Israel mane asingora ni anami kwereu, to unung’e ni an e Ruoth Nyasaye.

⁴³Bang’e unupar timbeu maricho mane udhogorugo, mi unucharu kendu nikech richo mane utimogo.

⁴⁴Un jo-Israel, ka unune ni ok asekumou moromo gi timbeu maricho kendo mamono, to atimonu mana kelo ni nyinga duong’, to unung’e ni an e Ruoth Nyasaye. An Ruoth Nyasaye ema awacho kamano.”

⁴⁵Ruoth Nyasaye nowuoyo koda, mowachona niya,

⁴⁶“Wuod dhano, rang yo milambo, kendo wuo marach kuom piny man milambo, ka ikoro masira kuom bungu man kuno.

⁴⁷Nyis bungu man yo milambono ni an Ruoth Nyasaye awacho kama: Abiro moko mach, kendo abiro wang’o yiendi duto motwo, koda ka mago mang’ich! Onge gima noneg majno, to nolandre chakre yo milambo nyaka nyandwat, korewo wenge ji duto.

⁴⁸Ng’ato ka ng’ato nong’e ni an Ruoth Nyasaye ema amoko majno, kendo ni onge ng’ama nyalo nege.”

⁴⁹To an Ezekiel, ne adwoko Ruoth nyasaye niya, “Yaye Ruoth Nyasaye, ji duto wacho ni, ‘Jali obembowa gi ngeche mathoth!’ ”