Read luo Ezekiel 23 Bible Online

Ezekiel 23 - luo bible

Ezekiel 23

²mowachona niya, “Wuod dhano, chon ne nitie nyimine moko ariyo.

³Kane pod gitindo, ka gidak Misri, ne gikethore mi gilokore jochode.

⁴Nyako maduong’ ne nyinge Ohola, to matin ne nyinge Oholiba. Ne akendogi giduto, mi ginywolona nyithindo. (Ohola ochung’ kar Samaria, to Oholiba ochung’ kar Jerusalem.)

⁵“To kata obedo ni Ohola ne chiega kamano, to ne odhi adhiya nyime gi timbene mag chode, kendo ne osiko kogombo chodene ma jo-Asuria. Chodenego ne jolweny morwako lep lweny maralige. Moko ne jotelo man gi tije madongodongo, kendo moko ne jotend jolweny maidho farese. Giduto ne gin yawuowi mapod tindo, man gi chia.

⁶

⁷Ohola ne ohero dhogore gi jotend lweny mag Asuriago duto, kendo gombo mane en go ne omiyo odwanyore kolamo nyiseche manono mag jo-Asuria.

⁸Ne odhi adhiya nyime gi timbe chode mane osechako timo ka en Misri, kuma ne okethoree modoko jachode.

⁹Kuom mano ne ajwang’e e lwet chodene ma jo-Asuria mane ogombo malichgo.

¹⁰Ne gilonye duk, kendo ne gikawo yawuote gi nyige. Bang’e ne ginege gi ligangla. Gima ne otimoreneno nolokore ngero ma mon goyo kuonde duto.

¹¹“Kata obedo ni Oholiba ne oneno gigo duto, to ne odoko achach, mi otimo timbe maricho, kochodo moloyo kata mana Ohola.

¹²Gombo ne nege gi jodong Asuria, kod jotend lweny morwakore gi lep lweny mabeyo, kod jotend joidh farese, ma duto ne yawuowi ma pod tindo man gi chia.

¹³Ne aneno ni odwanyore chuth, kendo ni orach mana ka nyamin maduong’.

¹⁴“To en ne omedo nyumore matut e timbe mag dwanyruok.

¹⁵Ne oneno kido, mag jotend Babulon mogor e kor udi, kendo owir gi range makwar, ne otuenigi misibe e nungogi, kendo ne onalnigi kilemba mabeyo e wigi.

¹⁶Kane onenogi kamano, to gombo ne ohewe, mi ooro joote Babulon mondo oluongne joma ne ogorgo.

¹⁷Eka jo-Babulon-go nobiro mondo oterre kode. Ne giriwre kode, mi gidwanye nyaka ne ojok kodgi.

¹⁸Bang’e ne onyisore e lela, mi ji duto ong’eyo ni en jachode. Kuom mano ne ojoga mana kaka nyamin ne ojoga.

¹⁹Ne omedo dhi nyime moloyo gi timbe chode, kotimo mana kaka notimo e piny Misri kapod ne en nyako.

²⁰Gombo maduong’ ne omake gi joma ohero terruok, ma dendgi chalo gi dend kanyna, kendo ma nyotgi mol ka ohula.

²¹“In Oholiba, ne idwaro chako timo timbeni mag dwanyruok mane itimo Misri kane pod in nyako, kane chwo tugo kodi, moketho ringri.

²²To koro Oholiba, an Ruoth Nyasaye awachoni kama: Tinde iol gi chodenigo, to abiro miyo gibedo mamon kodi, kendo gibiro lwori, mi giketi diere.

²³Abiro kelo jo-Babulon kod jo-Kaldea duto, kaachiel gi jo Pekod gi jo-Shoa gi jo-Koa kod jo-Asuria duto. Giduto gin jotend lweny ma yawuowi mapod tindo man gi chia. Gin joma tiyo tije madongodongo kendo gin jotend joidh farese.

²⁴Gibiro monji gi yo nyandwat ka gin gi oganda lweny maduong’ kod geche lweny gi geche mamoko. Gin gi kuodi gi okumbni kod ogut lweny, kendo gibiro lwori mi giketi diere. Abiro chiwi e lwetgi, kendo gining’adni bura, kaluwore gi chikgi giwegi.

²⁵Kaka mirima mager omaka kodi, abiro weyo gitimi kaka gin ema gihero ka gikecho kodi. Gining’ad umi kod iti, kendo ginineg nyithindi. Adier, ginimayi yawuoti gi nyigi, mi giwang’gi ka gingima.

²⁶Bende ginilonyi duk, kendo ginikaw gik milichorigo ma nengogi tek.

²⁷Kamano anatiek gombo ma in go kod timbe modwanyore ma isebedo kitimo chakre kinde mane idak Misri. Ok nichak irang nyiseche manono, bende ok nichak ipar Misri kendo.

²⁸“An Ruoth Nyasaye awacho kama: Abiro chiwi e lwet joma imon-go, kendo ma ijokgo,

²⁹kendo kaka gin bende gimon kodi, gibiro kawo gimoro amora ma ingo, mi gilonyi duk. Inidong’ e lela, mi nong’ere ratiro ni in dhako ma jachode. Mago e gik ma gombo ma in go kod timbe chode

³⁰osekeloni, nikech ne in dhako ma ogendni terorego, mi idwanyori gi nyisechegi manono.

³¹Ne iluwo timbe nyameru, omiyo agwata mar kum mane amiye, ema in bende abiro miyi!

³²“An Ruoth Nyasaye awacho kama: Ibiro madho agwata nyameru. En agwata maduong’ kendo matut. Ji duto nojari kendo nonyieri, nikech agwatano opong’ du.

³³En agwata ma luoro gi masira opong’o. Mane Samaria nyameru omadho. Enomi ibed momer, kendo chunyi nobed malit.

³⁴Inimadhe, mi ilung’e pep, kendo inigwar kori gi pedni mage mobarore. An Ruoth Nyasaye ema awacho kamano.

³⁵“Koro an Ruoth Nyasaye awacho kama: Kaka ne wiyi owil koda, mi ilokona ng’eyi, ibiro yudo sand kuom gombo ma in go kod timbeni mag chode.”

³⁶Bang’ mano, Ruoth Nyasaye nopenja niya, “Wuod dhano, donge iikori mag ng’ado ni Ohola gi Oholiba bura? Donjnigi kuom gik modwanyore ma gisetimo.

³⁷Gisebedo ka giterore kendo giseneko. Giseterore gi nyiseche manono, kendo gisenego nyithindo mane ginywolona. Adier, ne gichiwo yawuota ka misango miwang’o ni nyisechegi manono!

³⁸To mago kende ok e gik mane gitimo! Hekalu mara bende ne gidwanyo, mi giketho Sabatona.

³⁹Kane gisenego nyithinda ka misango miwang’o ni nyiseche manono, ne gibiro e Hekalu mara, mi gidwanyo mana chieng’ onogo. Adier, mano e gima ne gitimo e Hekalu mara!

⁴⁰“Bende ne gioro joote mondo oluong joma odak e piny moro mabor, mi jogo nobiro. Eka mon ariyogo nolwokore, mi owiro wang’gi kendo olichore gi gik ma nengogi tek.

⁴¹Ne gibet e kitanda molos maber, kendo mesa mopedh malich ne nie nyimgi. Ne gikawo ubani kod mor zeituni ma an ema ne asemiyogi, mi giketo ewi mesano.

⁴²Bang’e mahu mar oganda joma ok dew gimoro ne owinji. Ne gin joma oa e thim. Ne girwako ronge e bede mon-go, kendo gisidhonigi osimbe mabeyo e wigi.

⁴³Eka ne awacho e chunya niya, ‘Gikonyore gi dhako ma jachode, ma terruok oolo,

⁴⁴kendo gisiko gidhi adhiya ire, kaka ji dhi ir dhako ma jachode.’ Adier, ne gidhi ir Ohola gi Oholiba mane mon modwanyore.

⁴⁵Ji makare to nokwed mon-go kuom timbegi mag terruok kod nek, nimar giterore kendo gichuero remo.

⁴⁶“An Ruoth Nyasaye awacho kama: Kel oganda mar jomahundu mondo otunggi, kendo oyakgi.

⁴⁷Jogo mondo ogogi gi kite kendo omonjgi gi ligangla, ka nego nyithindgi, kendo wang’o utgi.

⁴⁸Abiro tieko timbe dwanyruok e pinyni duto mondo obed siem ni mon mamoko kik oterre kaka ne mon ariyogo osetimo.

⁴⁹To un nyimine ariyo, abiro kumou kuom timbeu mag dwanyruok kod richou mar lamo nyiseche manono. Eka unung’e ni an e Ruoth Nyasaye.”