Read luo Ezekiel 24 Bible Online

Ezekiel 24 - luo bible

Ezekiel 24

¹Chieng’ due apar, due mar apar, e higa mar ochiko, Ruoth Nyasaye nowuoyo koda, mowachona niya,

² “Wuod dhano, ndik odiechieng’ ma kawuono e kitabu, nikech enie chieng’ ma ruodh Babulon chakoe goyo ageng’aa ni Jerusalem.

³Nyis joga ma jopiem ni an Ruoth Nyasaye agoyonigi ngero kama: Keturu agulu e mach, kendo olieuru pi.

⁴Ketieuru ring’o mamit kaka bat kod em, kendo pong’euru gi choke mabeyo.

⁵To nyaka gibed ring rombe machwe. Eka chwakieuru mach matek, mondo ochieg maber koda ka choke.

⁶“Koro an Ruoth Nyasaye awacho kama: Mano kaka dala jonek none malit! Ochalo gi agulu ma nyal ochamo, ma ok nyal lwokore. Goluru ring’o duto e iye, achiel ka achiel, ma ok uweyo moro kata achiel.

⁷Dalano ne otimo remo, to remono ne ok ochwer e lowo, kama buru ne nyalo umee, to ne ochwer mana e lwanda lilo.

⁸An bende aseweyo remono e lela kanyo, kama enie tangalare, mondo owang’ iya, achul kuor.

⁹“Koro ma e gima an Ruoth Nyasaye awacho; Mano kaka dala jonek none malit, nikech an awuon ema abiro chwako mach matek!

¹⁰Keturu yien mang’eny e kendo, kendo kudhuru mach obed mamiyo. Teduru ring’o nyaka kate duon, mi choke wang’.

¹¹Bang’e keturu agulu modong’ nono e mach mondo ochwakre, nyaka chuma molosego bed maliet ha, mi nyal man kuome wanyre, mi lal nono. To mano tich manono.

¹²Nimar kata da ichwake machal nade, to nyal mopoto kuome ok nyal rumo.

¹³In Jerusalem bende, timbeni mag chode osemiyo ibet modwanyore. Kata obedo ni ne atemo pwodhi kamano, to pod ne isiko asika ka idwanyori. Kuom mano, ok nichak ibed maler kendo, nyaka chop ka akumi gi mirimba duto mager.

¹⁴An Ruoth Nyasaye ema awacho kamano, kendo gima asewacho biro timore mak orem! Ok nakech ng’ato, kendo ok nang’won ni ng’ato, bende ok nalokra. Anakumi mana maromre gi timbeni duto. An Ruoth Nyasaye ema awacho kamano.”

¹⁵Ruoth Nyasaye nowuoyo koda, mowachona niya,

¹⁶“Wuod dhano, abiro mayi ng’at ma ihero moloyo, apoya. To kik ing’ur, kata kik iywagi, kendo pi wang’i kik chuer.

¹⁷Chunyi to om aoma mos. Kik itim timbe mag ywak, kaka wuotho gi wich nono, kata wuotho gi tielo maonge wuoche. Bende kik ium dhogi, kata kik icham chiemo ma joywak chamo.”

¹⁸Chieng’no gokinyi, ne awuoyo gi ji, to kochopo odhiambo, to chiega notho. Eka kinyne natimo mana kaka nosenyisa.

¹⁹Ji ne openja gima omiyo atimo kamano,

²⁰mi adwokogi niya, “Ruoth Nyasaye ema nowuoyo koda,

²¹mowachona ni mondo anyisu, un jo-Israel, ni owacho kama: Usungoru ni Hekalu otegno. Kunene, to umor kendo uhero donjoe. To koro an Ruoth Nyasaye abiro loke gima kuero, kendo yawuotu gi nyiu modong’ Jerusalem none e lweny.

²²Kuwinjo wachno to unutim mana kaka Ezekiel osetimo. Ok unum dhou, kendo ok unucham chiemo ma joywak chamo.

²³Bende ok unutim timbe ywak ma ji timo pile, kaka wuotho gi wich nono, kata wuotho gi tielo nono. Ok unuywagi, kendo pi wang’u ok nochuer. Dendu nodhi adhiya mosmos nikech richou, kendo unuywagru e chunyu, ng’ato ka ng’ato gi wadgi.

²⁴“An Ruoth Nyasaye, amedo wacho kama: Ezekiel nobednu ranyisi, kendo unutim gik moko duto ma osetimo. Ka gik makamago duto otimore, eka unung’e ni an e Ruoth Nyasaye.

²⁵“Wuod dhano, abiro mayogi Hekalu motegno mane gisungorego kendo ma miyogi mor, mane gihero rango kendo donjoe. Bende anamagi yawuotgi kod nyigi.

²⁶Chieng’ ma atimo kamano, to ng’at moro motony e lweny nobi, kendo nonyisi gima osetimore.

²⁷Odiechieng’no ema inichak iwuoe, mi iwe bedo momo, kendo inilos gi ng’atno. Kamano inibed ranyisi ni ji, mi gining’e ni an e Ruoth Nyasaye.”