Read luo Ezekiel 25 Bible Online

Ezekiel 25 - luo bible

Ezekiel 25

¹ Ruoth Nyasaye nowuoyo koda,

²mowachona niya, “Wuod dhano, chung’ kichomo piny Amon, kendo ikwede.

³Nyis jopinyno ni an Ruoth Nyasaye awacho kama: Un jo-Amon, ne ubedo mamor ka uneno ka Hekalu mara odwany, kendo ka piny Israel okethi, kendo ka itero jo-Juda e tuech.

⁴Kaka ne ubedo mamor kamano, abiro miyo dhoudi modak e thim man yo wuok chieng’ maku, mi kaw pinyu. Ginigur kembegi e pinyu, mi gidag kuno. Bende ginicham olembeu kendo ginimadh chau.

⁵Abiro miyo dala mar Raba bed mana kama ikwayoe ngamia, kendo piny Amon duto abiro miyo bedo kama ikwayoe rombe, mi unung’e ni an e Ruoth Nyasaye.”

⁶Ruoth Nyasaye nomedo wachonigi niya, “Kaka ne upamo lwetu kuchikoru gi mor, kendo ujaro piny Israel,

⁷omiyo abiro ketou e lwet ogendini mamoko mondo oyaku. Abiro tiekou chuth, mi ok unuchak ubed oganda, bende ok nubed gi pinyu uwegi. Eka unung’e ni an e Ruoth Nyasaye.”

⁸ Ruoth nyasaye nowacho niya, “Kaka jo-Moab osewacho ni jo-Juda chalo gi ogendini mamoko duto,

⁹omiyo abiro miyo wasigu monjo miech Moab manie tong’ pinygi, koda ka mier mabeyoe moloyo, kaka Beth-jeshimoth, gi Baal-meon kod Kiriathaim.

¹⁰Abiro miyo dhoudi modak e thim man yo wuok chieng’ kaw piny Moab kaachiel gi piny Amon, mondo jo-Moab kik chak bed oganda.

¹¹Kamano e kaka anakum jo-Moab, mi gining’e ni an e Ruoth Nyasaye.”

¹² Ruoth Nyasaye nowacho niya, “Jo-Edom nochulo kuor malit kuom Juda, kendo kuor mane gichulono osekelo ketho mosiko kuomgi.

¹³“Koro awacho ni abiro kumo piny jo-Edom, mi aneg ji duto kod le man kuno. Pinyno nodong’ nono, ka ji tho e lweny, chakre dala mar Teman nyaka dala mar Dedan.

¹⁴Joga Israel nochulna kuor kuom jo-Edom, kendo gitimnigi mana kaka mirimba mager chalo. Kamano jo-Edom nong’e kaka kuor ma achulo lit! An Ruoth Nyasaye ema awacho kamano.”

¹⁵ Ruoth Nyasaye nochako owacho niya, “Jo-Filistia osechulo kuor malit ni wasikgi manyaka nene, mi gitiekogi ka gisin kodgi.

¹⁶Kuom mano, awacho ni abiro monjo jo-Filistia, mi aywegi oko pep.

¹⁷Ji mamoko duto modak but nam Mediterenia kanyo bende abiro nego. Ka asechulonigi kuor kamano, eka gining’e ni an e Ruoth Nyasaye.”