Read luo Ezekiel 27 Bible Online

Ezekiel 27 - luo bible

Ezekiel 27

¹Ruoth Nyasaye nowachona niya,

²“Wuod dhano, ywag Turo gi wend ywak.

³En dala manie dhonam, kendo oloko ohala gi ji modak kamoro amora e dhonam. Nyise ni an Ruoth Nyasaye awacho kama: In Turo, ne isungori kiparo ni iber gilala.

⁴Tong’ ni ochueyo nyaka ei nam. Joma ne ogeri ne olosi ka yie ma jaber.

⁵Ne giloso bepeni gi yien mabeyo moa got Senir, bende ne gikawo yadh sida moa Lebanon, ema gilosonigo murungot.

⁶Ngeyni magi to ne giloso gi yiend ober moa Bashan, kendo tati ne giloso gi yiend saipras, mogol e chulni mag Kitim. Eka ne gibawi gi lak liech.

⁷Tangani ne olos gi law maber mar Misri, mogorie kido mabeyo, kendo ne ginenore kata mana gi kuma bor. Tandarua miumigo nolos gi nanga maralik maber, mogol e chula mar Saipras.

⁸Jo-Sodom gi jo-Arvad ne odoko jogi makiewo ngayi. Ne in gi jotich molony ma kwang’i, yaye Turo!

⁹Jopecho maloso kuonde mokethore e yie, ne jo-Biblos motiegore maber e tijgi. Bende jokwang’ mag yiedhi duto manie nam, ne ging’iewo gik moko mana e dukeni.

¹⁰“Jo-Persia gi jo-Lidia gi jo-Libya ne odoko jolweny magi. Ne ging’awo kuodigi kod ogutegi mag lweny kuomi. Gin ema ne gimiyo nyingi obedo gi huma.

¹¹Jolweny ma jo-Arvad norito ohingani, kendo joma ne oa Gamad norito kuondeni mochiel motegno mag siro lweny. Ne ging’awo kuodigi e ohingani. Gin e joma ne olosi, mi ibedo jaber.

¹²“Ne iloko ohala e piny Tarshish, kikawo fedha gi kit nyinyo moko mopogore opogore kaka chudo kuom gik mogundho mane itimogo ohala.

¹³Bende ne iloko ohala e piny Yunani gi Tubal kod Meshek, kendo ne ikawo wasumbini kod gik molos gi mula kuom gik ohala mane in go.

¹⁴Jo-Beth-togarma ne miyi farese matiyo, gi mago miidho, kod kenje kar gigi.

¹⁵Jo-Rodo noloko kod ohala, kendo ji moa e pinje mang’eny manie dhonam nomiyi lak liech kod bepe mabeyo maratenge kaka chudo kuom gigi.

¹⁶Jo-Aram bende ne ng’iewo gigi mag ohala kaachiel gi gik mamoko mang’eny mane iloso. Ne gimiyi kite ma nengogi tek miluongo ni emerald gi koral kod rubi, gi law maralik gi nanga mayom mogorie kido mabeyo, kuom gigi.

¹⁷Jo-Juda gi jo-Israel to ne ng’iewo gik mane in go, ka chuli ngano gi mor kich gi mor zeituni kod gik mamilimili.

¹⁸Jo-Damaski bende ne ng’iewo gigi mag ohala kaachiel gi gik mang’eny mane iloso, ka gichuli divai mogol Helbon kod yie rombe mogol Sahar.

¹⁹Ne giwilo gigi gi nyinyo mothedhi kod gik mamilimili.

²⁰Jo-Dedan ne miyi barangede mibolo kiidho farese kuom gigi.

²¹Jo-Arabu kod ruodhi mag Kedar bende ne ng’iewo gigi mag ohala ka gichuli nyirombe gi rombe kod diek.

²²Jolok ohala mag Sheba kod Rama to ne jong’iewo gik mane in go, ka gimiyi gik mamilimili mabeyoe moloyo, kod kite mopogore opogore ma nengogi tek kod dhahabu.

²³Joma ne odak e mier ma Haran gi Keneh gi Eden gi Ashur kod Kilmad, kaachiel gi joohala mag Sheba, duto ne joloko ohala kodi.

²⁴Ne gikeloni lewni ma nengogi tek kod mago maralik mogorie kido mabeyo, kaachiel gi mikeka mag dier ot, mokiew gi range malombo wang’, kod tonde mokadi motegno.

²⁵ Mwanduni duto ne iting’o e yiedhi madongodongoe moloyo. Ne ichalo gi yie manie nam, moting’ore mapek.

²⁶Kane jokwang’ magi oteri e chuny nam, yamb yo wuok chieng’ nogoyi, moketi kuma bor gi dhowath.

²⁷Mwanduni duto mag ohala gi jokwang’ magi, gi jopecho gi joohala magi, kod jolweny duto mane in go nolal pep e nam, kane yie obarore.

²⁸Uwi mane jokwang’ matho goyo nowinjore gie dhonam.

²⁹Yiedhi mamoko koro odong’ nono, nikech jokwang’ duto osewuok, mochung’ e dhowath.

³⁰Giduto giywagi malit, ka gibuko wigi buru, kendo ging’ielore e lowo.

³¹Giselielo wigi ka giywagi, kendo girwako piende gugru. Giywak matek, ka chunygi lit ahinya.

³²Gisechuogoni wend ywak kama: Ere dala moro machielo, machalo gi Turo, ma koro oling’ thi e dier nam?

³³Kane ioro gigi mag ohala loka nam, to ne ikonyo ogendini duto. Ruodhi ne odoko momew mana gi gigi mogundho.

³⁴To koro, ibarori e nam, mi isiko e nam matut. Mwanduni kod joma ne tiyoni, duto oselal nono e nam kaachiel kodi.”

³⁵Ng’ato ka ng’ato modak e dhonam, kihondko goyo kuom gima osetimoreni. Kata mana ruodhi maggi bende obwok, mi renb ringregi oo.

³⁶Ilal! Adier, iselal chuth, kendo joohala mae piny duto kihondko goyo, ka giparo ni gin bende masira makamano biro makogi.