Read luo Ezekiel 29 Bible Online

Ezekiel 29 - luo bible

Ezekiel 29

¹ Chieng’ due apar gachiel due mar apar, e higa mar apar, Ruoth Nyasaye nowachona niya,

²“Wuod dhano, chung’ kichomo piny Misri, mondo ikwed Farao ruodh Misri, kaachiel gi pinyno duto.

³Nyise ni an Ruoth Nyasaye awachone kama: Iwacho ni aora Nael en mari, kendo ni ne ichueri kendi.

⁴To abiro keto olowu e dhogi, mi ami rech manie aochi mok kuomi.

⁵Anaboli e thim kaachiel gi rechgo duto, mi ringri norodhre piny kuno. Ok noyiki to wachiwi ni winy kod ondiegi mondo ochami.

⁶ Eka jo-Misri duto nong’e ni an e Ruoth Nyasaye.” Ruoth Nyasaye nochako owachona niya, “Jo-Israel nogeno kuomu ni dukonygi, un jo-Misri, to unyap mana ka odundu.

⁷Ne gimakou mi utur, mi umiyo onding’gi owil.

⁸Emomiyo an Ruoth Nyasaye anyisi in Farao ni abiro kelo ji mondo omonji, kendo gibiro nego jogi, kaachiel gi jambi duto.

⁹Piny Misri biro dong’ nono kokethore, eka ining’e ni an e Ruoth Nyasaye. “Kaka ne iwacho ni aora Nael en mari, kendo ni in ema ne ichueye,

¹⁰omiyo an jasiki, kendo amon gi Naelni nogo. Bende abiro miyo piny Misri duto doko piny mokethore kendo modong’ nono, chakre dala mar Migdol yo nyandwat, nyaka dala mar Saiyene yo milambo, kendo nyaka tong’ Ethiopia.

¹¹Onge dhano kata le ma nokadh e iye, kendo kuom higni piero ang’wen onge ng’ama nodag kuno.

¹²Anami Misri bed piny mokethore moloyo pinje mamoko duto e piny. Anake jo-Misri e pinje, mi gidag e kind ogendini mamoko.”

¹³Ruoth Nyasaye nomedo wacho niya, “Bang’ higni piero ang’wen anadwok jo-Misri ka agolo e pinje mane akeyogie,

¹⁴mi anami gidag e piny Misri ma milambo, kuma ne giaye. Ginibed oganda mayomyomie moloyo ogendini mamoko duto,

¹⁵mi ok ginichak gilo oganda moro kendo. Anami gibed oganda marachrach ma ok nyal bedo gi loch kuom oganda machielo.

¹⁶Kamano jo-Israel ok nochak oket genogi kuomgi. Masira momako Misrino nonyis jo-Israel kaka ne giketho ka giketo genogi kuom jo-Misri. Bang’e jo-Israel nong’e ni an e Ruoth Nyasaye.”

¹⁷Chieng’ mokwongo mar due mar achiel, e higa mar piero ariyo gabiriyo, Ruoth Nyasaye nowuoyo koda, mowachona niya,

¹⁸“Wuod dhano, Nebukadnezar ruodh Babulon nomonjo Turo. Ne om iyo jolweny mage otiyo matek, mi wigi oluny kendo gokgi obuth. To ruoth Nebukadnezar, kata mana oganda jolwenje, ne ok oyudo gimoro kuom chandruokgino duto.

¹⁹Kuom mano, koro an Ruoth Nyasaye awacho kama: Abiro chiwo piny Misri e lwet ruoth Nebukadnezar, mi oyak pinyno, kendo okaw mwandugi duto, mondo ochulgo lwenje.

²⁰Abiro miye piny Misri kaka chudo kuom tichne, nikech jolwenje ne tiyona. An Ruoth Nyasaye ema awacho kamano.

²¹“E ndalogo anami jo-Israel bed oganda matek, mi in Ezekiel nami iwuo kama ji duto nyalo winjie mondo ging’e ni an e Ruoth Nyasaye.”