Read luo Ezekiel 30 Bible Online

Ezekiel 30 - luo bible

Ezekiel 30

¹Ruoth Nyasaye nowachona niya,

²“Wuod dhano, kor wach ni an Ruoth Nyasaye awacho kama: “Ywaguru,

³nikech chieng’ masira chiegni! Adier, chieng’ Ruoth Nyasaye chiegni! Enobed odiechieng’ ma piny dudoe, kendo ma ogendini yudoe chandruok.

⁴Lweny nobedie Misri, kendo jo-Ethiopia noparre malit. Ka gineno kaka oneg ji mang’eny Misri, kendo oyak pinyno, mi okethore kendo odong’ gunda.

⁵“Jolweny mane ogol Ethiopia gi Lidia gi Libya gi Arabia gi Kub koda ka joga awuon bende notho e lwenyno.”

⁶Ruoth Nyasaye wacho niya, “Jolweny ma konyo Misri noneg e lweny, chakre Migdol yo nyandwat nyak Saiyene yo milambo. Oganda lweny ma jo-Misri sungorego otieki. An Ruoth Nyasaye ema awacho kamano.

⁷Pinyno nobed mokethore moloyo pinje mamoko duto, kendo mier mage nodong’ gundni moloyo mier mamoko duto e piny.

⁸Ka awang’o Misri gi mach, mi anego jolweny makonye duto, eka gining’e ni an e Ruoth Nyasaye.

⁹“Ka ndalono ochopo, kendo Misri osekethi, to anaor joote gi yiedhi mondo odhi obwog jo-Ethiopia ma odak gi kue, mi ginibed gi kihondko malich. Adier, ndalono biro!”

¹⁰Ruoth Nyasaye wacho niya, “Abiro oro Nebukadnezar ruodh Babulon mondo otiek mwandu Misri.

¹¹Enobi gi jolwenje mager mondo oketh pinyno. Ginimonje, mi ringre joma onegi nopong’e.

¹²Anaduon aora Nael, mi aket Misri e lwet joma richo, kendo jopinje mamoko noketh pinyno duto. An Ruoth Nyasaye ema awacho kamano.”

¹³Ruoth Nyasaye wacho niya, “Abiro tieko nyiseche manono man Memfis, mi onge ng’ato ma nochak obed ruodh Misri kendo. Bende anago ji duto modak kuno gi kihondko.

¹⁴Yo milambo mar piny Misri abiro loko thim, to dala Zoan man yo nyandwat abiro wang’o gi mach. Anakum dala maduong’ mar Misri miluongo ni Thebes,

¹⁵kendo anaol mirimba kuom dala mar Pelisium, ma dala mochiel motegno moloyo e Misri. Mwandu mag Thebes bende nakethi,

¹⁶kendo nawang’ Misri gi mach, mi Pelisium chandre malit. Ohinga mar Thebes ibiro muko, mi pi pong’ dala.

¹⁷Yawuowi manie mier mag Hieropolis kod Bubastis notho e lwenjno, to ji mamoko duto nomaki mi ter e tuech.

¹⁸Ka atieko teko ma jo-Misri sungorego, to mudho noim Tapanhes. Adier, rumbi noim piny Misri, mi ji duto manie mieche nomaki mi ter e tuech.

¹⁹Ka akumo jo-Misri kamano, to gining’e ni an e Ruoth Nyasaye.”

²⁰Chieng’ due abiriyo, due mar achiel e higa mar apar gachiel, Ruoth Nyasaye nowuoyo koda, mowachona niya,

²¹“Wuod dhano, aseturo bad Farao, ruodh Misri, to onge ng’ama osetueyo badeno, kata mosechome mondo ochangi, obed motegno ma dochak omakgo ligangla kendo.

²²Koro an Ruoth Nyasaye awacho kama: An jasik ruodh Misri, omiyo abiro turo bade mangima gi bade mosetur, mi ligangla noa e lwete mi lwar piny.

²³Bende abiro keyo jo-Misri e pinje, mi gidag e kind ogendini mamoko.

²⁴Bang’e anami bad ruodh Babulon bed motegno, mi aket liganglana e lwete. Bad ruodh Misri to abiro turo, mi nochur ka otho e nyim ruodh Babulon.

²⁵Adier, anami ruodh Misri bed mayomyom. Ruodh Babulon to nami teko. Ka amiyo ruodh Babulon liganglana, mi omonjogo piny Misri, to ji duto nong’e ni an e Ruoth Nyasaye.

²⁶Anake jo-Misri e pinje, mi gidag e kind ogendini mamoko. Eka gining’e ni an e Ruoth Nyasaye.”