Read luo Ezekiel 32 Bible Online

Ezekiel 32 - luo bible

Ezekiel 32

¹Chieng’ mokwongo mar due mar apar gariyo e higa mar apar gariyo, Ruoth Nyasaye nowuoyo koda, mowachona niya,

²“Wuod dhano, ywag Farao ruodh Misri kinyise kama: Itimori sibuor e kind ogendini, to chutho in mana nyang’ pi ma mwomo aora. Iduwo pi gi tiendi, kendo iketho aore!

³Ka ogendini mang’eny ochokore, to namaki gi tonda, mi anyisgi giywayi oko gi tolno.

⁴Anaboli piny e pap, mi ami winy kod ondiegi duto mag piny nur kuomi, ka chami.

⁵Anadhur ringri motop e gode kod holni,

⁶kendo nami rembi mol, mi pong’ piny, koda ka gode gi holni.

⁷ Chieng’ ma atieki, to abiro miyo polo imore mi sulue ok norieny. Anaum wang’chieng’ gi boche poolo, mi due bende ok norieny.

⁸Kamano anagol ler duto mag polo, mi ami pinyi tim mudho. An Ruoth Nyasaye ema awacho kamano.

⁹“Ka atero jogi momak e lweny, e pinje mane pok ing’eyo, to kibaji biro goyo ogendini mathoth.

¹⁰Gima biro timoreni nobwog ogendini mang’eny, kendo ka amilo ligangla e nyim ruodhigi, to remb ringregi noo. Chieng’ ma ipodhoe, to giduto ginibed ka gitetni, ka giparo ni gin bende gibiro tho.”

¹¹Ruoth Nyasaye wacho niya, “Ligangla mar ruodh Babulon biro lwar kuomi,

¹²kendo abiro miyo jolweny moa kuom oganda magerie moloyo neg oganda maduong’ mar jolwenji. Gibiro ketho gik moko duto ma isungorigo, mi gineg jogi duto.

¹³Abiro nego dhou duto kamoro amora ma gimodhoe. Bang’e pi ok nochak oduwre, nikech dhano gi jamni ma diduwe nobed maonge!

¹⁴Anami aoreu kue, mi gibed maliw, kendo mol nyamonge. An Ruoth Nyasaye ema awacho kamano.

¹⁵“Ka aketho piny Misri, mi olokore thim, kendo anego ji duto modak kuno, to gining’e ni an e Ruoth Nyasaye.

¹⁶Wendni en wend ywak ma mond pinje mamoko noywaggo Misri kod joge duto. An Ruoth Nyasaye ema awacho kamano.”

¹⁷Chieng’ due apar gabich, due mokwongo, e higa mar apar gariyo, Ruoth Nyasaye nowuoyo koda, mowachona niya,

¹⁸“Wuod dhano, ywag jo-Misri, ma oganda maduong’. Witgi e Piny Joma Otho mondo gibed kuno gi ogendini mamoko marateke,

¹⁹kipenjogi niya, ‘Uparo ni ubeyo moloyo ji mamoko koso? Dhiuru urieru gi joma kia Nyasaye mane osetho!’

²⁰“Jo-Misri biro tho kaachiel gi joma inego e lweny, nikech ligangla oikore nego jo-Misri duto.

²¹Thuondi madongo kaachiel gi joma ne konyogi kedo, biro rwako jo-Misri gi mor e Piny Joma Otho, ka giwacho niya, ‘Joma kia Nyasaye mane onegi e lweny osebiro mwalo ka Eki giriere ka!’

²²“Jotend Asuria oriere piny kucha, ka liete jolweny mag pinyno olworogi. Giduto ne oneggi e lweny,

²³kendo lietegi nie bath Piny Joma Otho kuma bor. Jolweny mag pinyno duto notho e lweny, kendo lietegi olworo liete jotendgi. To chon ne gimiyo joma ngima kibaji.

²⁴“Ruodh Elam bende ni kuno, ka liete joge mag lweny olwore. Ne oneggi duto e lweny, mi owitgi e Piny Joma Otho mak otergi nyangu. Kane gingima to ne gibwogo ji, to koro giriere e liel ka wigi okuot.

²⁵Ruodh Elam oriere piny e kind joma onegi. Liete mag joge mag lweny olwore mokete diere. Giduto ne gin joma ok ter nyangu mane onegi e lweny. Kane gingima to ne gibuogo ji, to koro giriere e liel ka wigi okuot, kaachiel gi ji mamoko mane onegi e lweny.

²⁶“Ruodhi mag Meshek gi Tubal bende ni kuno, ka liete jogi mag lweny olworogi. Giduto ne githo e lweny mak otergi nyangu. Kane gingima, to ne gibwogo ji.

²⁷Ne ok oyikgi kaluwore gi chik mane oyikgo thuondi e ndalo machon. Thuondigo ne dhi e Piny Joma Otho ka omanore gi gilwenjgi. Ligangla ne gitenogo wigi, to kuodigi ne giumorego. Kane thuondigo ngima to ne gibwogo ji.

²⁸“To un jo-Misri, unurieru piny ka utur e kind ogendini ma ok ter nyangu, mane onegi e lweny.

²⁹“Jo-Edom gi ruodhigi kod jotendgi bende ni kuno. Chon ne gin jolweny marateke, to koro giriere e Piny Joma Otho, kaachiel gi joma ok ter nyangu, mane onegi e lweny.

³⁰“Jotelo duto mag ogendini modak yo nyandwat ni kuro, kaachiel gi jo-Sidon. Chon ne gin joma rateke ma bwogo ji, tinde to gisedonjo e Piny Joma Otho gi wichkuot ka ok otergi nyangu mi giriere kuno gi joma onegi e lweny. Gin bende gin gi wichkuot mana ka ji mamoko madhi e Piny joma Otho.”

³¹Ruoth Nyasaye wacho niya, “Ka Farao ruodh Misri oneno jogo duto, to chunye noduogi mi obed modhil kuom thone, kod tho jolwenje duto mane onegi e lweny.

³²Kane pod ongima, to ne amiyo obwogo ji, to koro en kaachiel gi joge mag lweny gibiro riere piny kaachiel gi joma ok ter nyangu mane onegi e lweny. An Ruoth Nyasaye ema awacho kamano.”