Read luo Ezekiel 33 Bible Online

Ezekiel 33 - luo bible

Ezekiel 33

¹Ruoth Nyasaye nowuoyo koda, mowachona niya,

²“Wuod dhano, penj jou kama: Ka akelo lweny e piny moro, donge jopinyno diyier ng’atgi achiel mondo obed jarito?

³Ka ng’ato oneno wasigu ka biro, mi ogoyo koko mondo ji otang’,

⁴to ng’at mowinjo kokono ok odewo, mi wasigu obiro monege, to en owuon ema nochaye kuom thone.

⁵Adier, onegore kende owuon nikech ne owinjo siem, to ok odewo. Ka dine oyie owinj siem, to dotony.

⁶“To ka jarito oneno wasigu ka biro, to ok ogoyo koko mondo ji otang’, mi wasigu obiro, monego ng’ato, to ng’atno notho kapod en jaricho, to anakwan jaritono ka e ng’at ma onego ng’atno.

⁷“Koro in, wuod dhano, aketi jarito mar oganda Israel duto. Tiji biro bedo siemogi gi siem moro amora ma amiyi.

⁸Ka awachoni ni ng’at marach biro tho, mi ok isieme mondo owe yorene maricho, to enotho kapod en jaricho, kendo in ema nakwani ka ng’ama onege.

⁹To ka isiemo ng’at marach, to ok oweyo timbene maricho, to enotho kapod en jaricho, to in isereso ngimani.”

¹⁰Ruoth Nyasaye nowachona niya, “Wuod dhano, jo-Israel ywagore ni kethogi kod richogi turogi, kendo ni dendgi dhi adhiya. Gipenjore kaka digiyud ngima.

¹¹To nyisgi ni an Ruoth Nyasaye akuong’ora ni ok berna ka ng’at ma timbene richo tho, to abedo mamor mana ka oweyo timbene maricho, mobedo mangima. Un jo-Israel, weuru timbeu maricho! Adier, wegiuru! Ere gima omiyo udwaro ni mondo utho!

¹²“Wuod dhano, koro nyis jo-Israel ni ka ng’at makare odonjo e richo, to gik mabeyo mosetimo ok nokonye. To bende ka ng’at ma timbene richo oweyo timo richo, to ok noyud kum. Ng’at makare to ka odonjo e richo to timbene mabeyo mosebedo kotimo ok nomi obed mangima.

¹³Ka awacho ni ng’at makare ni nobed mangima, to odonjo e richo, kogeno kuom gik mabeyo mosetimo, to ok napar kata mana gimoro achiel kuom gik mabeyo mosetimo, to enotho athoya nikech richone.

¹⁴To bende ka asiemo ng’at marach ni obiro tho, mi oweyo timbene maricho,

¹⁵Kodwoko gik mane oholo, kendo ochulo gik mane osekwalo, mi oluwo chike makelo ngima, kotimo gik makare kendo mabeyo, to enobed mangima.

¹⁶Anawene richo duto ma osetimo, kendo enobed mangima nikech otimo gik makare kendo mabeyo.

¹⁷“Jou wacho ni gima an Ruoth Nyasaye atimo ok ni kare! To chutho, gin ema timbegi ok ni kare.

¹⁸Ka ng’at makare oweyo tim makare, mi odonjo e richo, to enotho nikech richone.

¹⁹To bende ka ng’at marach oweyo timbene maricho, mi otimo gik makare kendo mabeyo, to nobed mangima.

²⁰To un jo-Israel, pod uwacho ni gima atimo ok ni kare! Koro abiro ng’ado ni ng’ato ka ng’ato kuomu bura moromo gi timbene.”

²¹ Chieng’ due abich, due mar apar, kane wasetieko higni apar gariyo e tuech, ng’at moro mane otony mowuok Jerusalem ne obiro mowachona ni dalano osekaw.

²²To odhiambo mane kinyne obiroe, ne oyudo asewinjo ka teko mar Ruoth Nyasaye ni kuoma. Omiyo kinyne gokinyi, kane ng’atno obiro, to Ruoth Nyasaye noduogona teko mar wuoyo.

²³Bang’e Ruoth Nyasaye nowuoyo koda, mowachona niya,

²⁴“Wuod dhano ji modak e miech Israel modong’ gundni wacho kama, ‘Ibrahim ne en ng’at achiel kende, to ne omiye pinyni duto. Wan to wan ji mang’eny, omiyo pinyni koro en marwa!’

²⁵“To nyisgi ni an Ruoth Nyasaye awachonigi kama: Uchamo ring’o man gi remo, kendo ulamo nyiseche manono, bende uchuero remo. Koro ere gima omiyo uparo ni pinyno en maru?

²⁶Ligangla mau ema ugeno kuomgi. Timbeu mono, kendo ng’ato ka ng’ato terore gi chi wadgi. To eka pod uparo ni pinyno en maru!

²⁷“Nyisgi bende ni an Ruoth Nyasaye akuong’ora ni kaka an Nyasaye mangima, ji modak e mier modong’ gundni ibiro nego, kendo joma odak oko e risaf, ondiegi nocham, to joma opondo e gode kod buche, tuoche nonegi.

²⁸Anaketh pinyno mi lokre thim, kendo tekregi ma gisungorego norum. Gode mag Israel nobed moyugno, maonge ng’ama nyalo wuothoe.

²⁹Ka akumo ji kuom richogi, kendo aloko pinyno thim, eka gining’e ni an e Ruoth Nyasaye.”

³⁰Ruoth Nyasaye nowachona niya, “Wuod dhano, jou wuoyo kuomi ka gichokore e tok ohinga kendo ka gin e dhoutegi. Ng’ato ka ng’ato wacho ni wadgi niya, ‘Wadhiyo mondo wawinj wach moa kuom Nyasaye kawuono.’

³¹Kuom mano joga chokore mondo owinj gima iwacho, to kata obedo ni iwachonigi gima onego gitim, to ok gitim. Miriambo ema gihero kendo pesa ema giketoe chunygi.

³²Gikwani mana ka jawer ma weronigi wende mamit, kata magoyonigi thum. Wecheni duto giwinjo, to onge ma gimako kata achiel.

³³To ka wechenigo duto otimore, kaka en adier ni gibiro timore, mak orem, to eka gining’e ni kara janabi osebet ka ni e kindgi!”