Read luo Ezekiel 34 Bible Online

Ezekiel 34 - luo bible

Ezekiel 34

¹Ruoth Nyasaye nowuoyo koda mowachona niya,

²“Wuod dhano, kwed jotend Israel, ma akwano ka jakwadh joga. Kornigi wach, kinyisogi ni an Ruoth Nyasaye awacho kama: Unune malit, un jokwath mag Israel! Uritoru mana un uwegi, to rombe to ok udew.

³Umadho chak, kendo urwako lewni molos gi yie rombe, bende rombe mabeyoe moloyo ema unego uchamo, to rombe ok uriti.

⁴Adier, ok urit rombe moyomno, kendo ok uthiedh mago matuo, bende ok uchom mago motur, bende ok uchok mago moke, kata manyo molal ok umany, to usandogi asanda.

⁵ Koro kaka rombe onge gi jokwath, giseke mi ondiegi osenegogi kendo ochamogi.

⁶Kamano romba bayo abaya ewi gode, kendo gike kuonde duto e pinyu, to onge ng’ama manyogi kata ma temo mondo ochokgi.

⁷“Kuom mano, un jokwath, winjuru gima an Ruoth Nyasaye awachonu.

⁸Ondiegi osemonjo romba, monego, kendo ochamo, nikech gionge jakwath. Jokwadha ok tem mondo omany rombe to giritore mana gin giwegi. Rombe to ok gidew.

⁹Omiyo un jokwath,

¹⁰an Ruoth Nyasaye awacho ni kaka an Nyasaye mangima, amon kodu. Abiro golo rombena oko kuomu, mi ok nachak awe kendo ubed jokwadhgi kendo, kuritoru mana kendu uwegi! Bende abiro resogi e lwetu, mi ok nawe uchamgi.

¹¹“An Ruoth Nyasaye awachonu ni abiro manyo rombena an awuon mi aritgi,

¹²mana kaka jakwath rito rombene mane olal moke, to ochako onwang’o. Abiro duogogi kagologi kuonde duto mane gikee, chieng’ masira mane piny otimo mudho.

¹³Abiro gologi oko kuom ogendini mamoko, mi achokgi kaachiel, kendo aduoggi e pinygi giwegi. Anakwagi e gode Israel kendo e bath aore, kod kuonde duto ma ji odakie.

¹⁴Anawe gikwa gi kue e lege mae gode gi holni, kendo e lege duto mabeyo manie piny Israel.

¹⁵An awuon ema nabed jakwadh romba, kendo anayudnigi kama giyueyoe. An Ruoth nyasaye ema awacho kamano.

¹⁶“Anamany rombe molal, mi achok mago moke, bende anachom mago motur, kendo anathiedh mago matuo, mi arit mago mangima kendo machue, nimar an e jakwath marito rombe e yo makare.

¹⁷“Koro un jamba, an Ruoth Nyasaye awachonu ni abiro ng’ado bura moro ka moro kuomu, mi apog mabeyo kuom maricho, kendo anapog imbe kuom nyuogi.

¹⁸Uchamo lum mabeyo moloyo, to eka pod unyono lum ma ok ucham piny. Bende umodho pi maliw, to udwaro mago ma ok umodhi!

¹⁹Kuom mano, umiyo rombena mamoko chamo mana lum ma usenyono piny, kendo modho mana pi ma useduwo.

²⁰“Emomiyo an Ruoth Nyasaye, anyisou ni abiro ng’ado bura e kindu un rombe machwe kod mago modhero.

²¹Ugoyo joweteu matuo gi mba, kendo utuomogi gi pat wiu, mi umiyo gipogore gia e kueth, kendo gike.

²²To abiro reso rombena mi ok nawe uchak usandgi. Anang’ad bura ni romba duto, mi apog mabeyo kuom maricho.

²³ Anamigi jakwath achiel, ma en jatichna Daudi, kendo enoritgi maber.

²⁴ An Ruoth Nyasaye anabed Nyasachgi, to jatichna Daudi nobed jatendgi. An ema awacho kamano.

²⁵Anatim kodgi singruok makelonigi kue, bende anatiek ondiegi duto e piny, mondo romba obed gi kue, ka kwayo e thim, kendo nindo aninda e bungu.

²⁶“Anaguedhgi kendo anawe gidag e alwora mar goda maler, kakelonigi koth e kinde mowinjore.

²⁷Yiendgi nonyag olembe, kendo puothegi nochieg cham, bende ng’ato ka ng’ato nodag gi kue e lope owuon. Ka achodo nyororo mane otuego joga, mi aresogi e teko mar joma ne olokogi wasumbni, to eka gining’e ni an e Ruoth Nyasaye.

²⁸Ogendini mamoko ok nochak oyakgi, bende ondiegi ok noneggi mi chamgi, to ginidag gi kue, maonge ng’ama bwogogi.

²⁹Anami puothegi chieg cham mang’eny, mi atiek kech e pinygi. Bende ogendini mamoko ok nochak ojargi kendo.

³⁰Ng’ato ka ng’ato nong’e ni arito jo-Israel kendo ni gin joga. An Ruoth Nyasaye ema awacho kamano.

³¹“Un joga, un e kueth jamba makwayo, kendo an e Nyasachu. An Ruoth Nyasaye ema awacho kamano.”