Read luo Ezekiel 35 Bible Online

Ezekiel 35 - luo bible

Ezekiel 35

¹ Ruoth Nyasaye nowuoyo koda, mowachona niya,

²“Wuod dhano, chung’ kichomo yo Edom, mondo ikwedi.

³Nyis jopinyno ni an Ruoth Nyasaye awacho kama: An jasiku un gode mag Seir. Abiro rieyo lweta kuomu, mi akethu ulokru thim.

⁴Abiro miyo miechu dong’ gundni, mi udok kama owe nono. Eka unung’e ni an e Ruoth Nyasaye.

⁵“Ne umako sadha mosiko gi jo-Israel, mi umiyo oneggi e kinde mane masira omakogie, kikumogi mogik kuom richogi.

⁶Kuom mano, koro kaka an Ruoth Nyasaye mangima, akuong’ora ni tho ema ochomou, kendo ok unyal tony ngang’! Un joketho kuom chuero remo, kendo remono dong’ e wiu uwegi.

⁷Anami piny gode mag Seir lokre thim, kendo naneg ng’ato ang’ata mawuotho kuno.

⁸Anaum gode gi ringre joma otho, nikech joma oneg e lweny nopodh e gode gi holni kod hohni.

⁹Anami pinyu kethre chuth, kendo onge ng’ama nochak odag e miechu. Eka unung’e ni an e Ruoth Nyasaye.

¹⁰“Ne uwacho ni ogendini ariyo ma Juda gi Israel, kaachiel gi pinjegi gin mau, kendo ni ubiro kawogi, kata obedo ni an Ruoth Nyasaye e Nyasachgi.

¹¹Kuom mano, kaka an Ruoth nyasaye an Nyasaye mangima, abiro kumou kuom mon mane umon-go gi joga, kendo kuom mirima kod nyiego nikech gik mane utimonigi.

¹²Bang’e unung’e ni an Ruoth Nyasaye ne awinjo ka uchaya, kuwacho niya, ‘Gode mag Israel oselokore thim, kendo osemiwagi.’

¹³Bende asewinjo ka uwuoyo kuoma gi sunga, ka uyanya.

¹⁴“Emomiyo, an Ruoth Nyasaye awacho kama: Abiro miyo pinyu kethre, mi piny ngima nogonu siboi kuom masira momakouno,

¹⁵mana kaka ne ugoyo siboi kane masira omako jo-Israel, ma gin mwanduna awuon. Kuom mano gode mag Seir nowe kokethore. Adier, piny Edom duto nodong’ mana gunda. Bang’e ji duto nong’e ni an e Ruoth Nyasaye.”