Read luo Ezekiel 36 Bible Online

Ezekiel 36 - luo bible

Ezekiel 36

¹Ruoth Nyasaye nowachona niya, “Wuod dhano, wuo gi gode mag Israel, mondo inyisgi giwinj wach ma an Ruoth Nyasaye awachonigi.

²Wasik Israel ne ogoyonigi siboi, kawacho ni gode machon tinde gin maggi.

³Omiyo koro kor wach, kihulo ni an Ruoth Nyasaye awacho kama: Kane ogendini mokiewo gi Israel okawo gode mag Israel, moyako, ji duto ne onyiero Israel.

⁴Kuom mano, un gode mag Israel, winjuru gima an Ruoth Nyasaye awacho ni gode madongo gi matindo kendo ni aore kod holni, kaachiel gi kuonde mane owe kokethore kod mier mane odong’ gundni, mane ogendini mokiewo gi jo-Israel oyako kendo onyiero.

⁵“Ruoth Nyasaye ohero jo-Israel ahinya, omiyo asewuoyo ka an gi mirima mager kuom ogendini mokiewo kodgi, to moloyo asewuoyo kuom jo-Edom. Ne gimako piny ka gin gi siboi kod sunga marach e chunygi, mi gikawo legene.

⁶“Kuom mano, kor wach ni piny Israel, kinyiso gode madongo gi matindo kod aore gi holni ni an Ruoth Nyasaye aherogi, omiyo asewuoyoo gi mirima mager, nikech ogendini mamoko duto oseyanyogi marach.

⁷“Emomiyo an Ruoth Nyasaye akuong’ora ni ogendini mokiewo gi Israel noyud wichkuot.

⁸To un joga Israel, yien nochak odongnu e gode mag Israel, mi nyagnu olembe, nikech ubiro dok e pinyu mak odeko.

⁹An kodu, omiyo abiro konyou, mi puotheu pur, kendo ketie kodhi.

¹⁰Un dhood Israel duto, abiro miyo unya mang’eny, kendo uchak udog e miechu, mi uger kuonde duto mane owe kokethore.

¹¹Anami ji kaachiel gi jamni medre, kendo unubed mang’eny kaka ne un chon, mi ubed gi nyithindo mathoth. Unudag kuno kaka ne udak chon, mi ami udhi nyime maber moloyo. Eka unung’e ni an e Ruoth Nyasaye.

¹²Un joga Israel, anadwoku mondo uchak uwuoth e pinyu. Enobed pinyu uwegi, kendo nochieg maber, mi kech ok nochak oneg nyithindu.

¹³“An Ruoth Nyasaye awacho kama: Ang’eyo ni ji luongo godego ni jocham ji, kendo giwacho ni godego mayo jo-Israel nyithindgi.

¹⁴To chakre kawuono, ok ginichak gibed jocham ji ma mayou nyithindu. An Ruoth Nyasaye ema awacho kamano.

¹⁵Ok anayie mondo ogendini onyier godego, kata mondo ji ojargi. Bende ok ginichak gima jo-Israel nyithindgi. An Ruoth Nyasaye ema awacho kamano.

¹⁶Ruoth Nyasaye nochako owuoyo koda, mowachona niya,

¹⁷“Wuod dhano, e ndalo mane jo-Israel odak e pinygi, ne gidwanye gi yoregi kod timbegi makuero. Ne akwano timbegigo ka gima ochido, mana ka boke.

¹⁸Ne akumogi gi mirimba mager, nikech remo mane gichuero e pinygi, kod nyiseche manono mane gidwanyorego.

¹⁹Bende ne ang’adonigi bura kuom yoregi gi timbegi makuero, mi akeyogi e pinje mamoko, mi gidak e kind ogendini mopogore opogore.

²⁰To kamoro amora mane gidhiye, ne gikeloe wichkuot ni nyinga maler, nikech ji ne wacho niya, ‘Jogi gin jo-Ruoth Nyasaye, to ne oriembgi e piny mane omiyogi.’

²¹Mano ne omiyo aparo nyinga maler, nikech jo-Israel nokelone wichkuot, kamoro amora mane gidhiye.

²²“Koro nyis jo-Israel ni an Ruoth Nyasaye awachonigi kama: Gima abiro timo ok abi timo nikech un, jo-Israel, to abiro timo mana nikech nyinga maler, ma usekelone wichkuot kamoro amora ma usedhiye e kind ogendini duto.

²³Ka anyiso ogendini kaka nyinga maduong’ mane ukelone wichkuot, en nying maler, to eka gining’e ni an e Ruoth Nyasaye. An Ruoth Nyasaye ema awacho kamano. Gima abiro timonu ema nonyis ogendini ni an Ng’ama Ler.

²⁴Anagolu e kind ogendini modak e pinje mopogore opogore, mi adwoku e pinyu uwegi.

²⁵Anakir kuomu pi maliw, mi apuodhu kuom nyisecheu mamono, kod gimoro amora mane odwanyou.

²⁶ Anamiu chuny manyien kod paro manyien. Bende anagol kuomu chuny matek ka lwanda, mi amiu chuny malong’o.

²⁷Anaket Rohona awuon kuomu, mondo uluw chikena, kendo urit buchena duto ma asemiyou.

²⁸Bang’e unudag e piny mane amiyo kwereu, mi unubed joga, kendo anabed Nyasachu.

²⁹Anaresu kuom gik moko duto ma miyo ubedo mogak, bende anamiu cham mogundho, mi ok unuchak ubed gi kech kendo.

³⁰Adier, anami olembu nyag mang’eny, kendo chambu chieg mathoth, mondo kik uchak ubed gi kech ma dikuod wiu e kind ogendini.

³¹Unupar timbe mamono mane utimo, mi unucharu kendu nikech richou kod timbeu makuero.

³²To un jo-Israel, adwaro ni mondo ung’e ni ok natim gigo duto nikech un, to adwaro ni mondo une wichkuot kuom gik ma utimo. An Ruoth Nyasaye ema awacho kamano.

³³“An Ruoth Nyasaye awacho niya, ‘Ka apwodhou kuom richou duto, to anami uchak udag e miechu, mi uger kuonde mane omukore.

³⁴Ng’ato ang’ata mane okadho machiegni gi puotheu noneno kaka giyugno marach. To abiro miyo uchak upurgi kendo,

³⁵mi ji duto nowach niya, “Piny ma yande thimni tinde chalo gi puoth Eden, kendo mier mane omukore mi oyaki kendo owe gundni, tinde ochiel motegno, kendo ji odakie.”

³⁶Bang’e ogendini mokiewo kodu ma osetony e lweny nong’e ni an Ruoth Nyasaye ema asewacho ni abiro timo kamano, kendo abiro time mak orem!’

³⁷“An Ruoth Nyasaye amedo wacho niya, ‘Abiro timo gik moko madongo kata moloyo mago. Abiroo yie jo-Israel okwaya mondo akonygi, mi ami ginya mathoth mana ka kueth rombe.

³⁸Mier ma tinde omukoregi ji nopong’ mana kaka rombe mitimogo misengni chieng’ sawo ne pong’o Jerusalem. Kamano gining’e ni an e Ruoth Nyasaye.’ ”