Read luo Ezekiel 37 Bible Online

Ezekiel 37 - luo bible

Ezekiel 37

¹Ne awinjo ka teko Ruoth Nyasaye ni kuoma, mi Roho mare noting’a motera e holo kama choke opong’o.

²Ne omiyo awuotho e holo duto e kind chokego, mi aneno ka ging’eny ahinya, kendo gitwo kururu.

³Eka nopenja niya, “Wuod dhano, bende chokego dichak lokre ji mangima kendo?” An to ne adwoke niya, “Ruoth Nyasaye, in kendi ema inyalo ng’eyo wachno.”

⁴Ne owachona niyaa, “Kor ni chokegi wach, kinyisogi ni, ‘Un choke motwo, winjuru wach Ruoth Nyasaye!

⁵An Ruoth Nyasaye awachonu kama: Abiro miyo muya lor kuomu, mi uchak ubed ji mangima.

⁶Abiro keto leche kuomu, mi amiu ring’o kod pien. Eka anami muya donj kuomu, mi uchak ubed ji mangima. Bang’ mano, unung’e ni an e Ruoth Nyasaye.’ ”

⁷Kuom mano, ne achako koro wach kaka nosewachona. To kane oyudo awuoyo, ne apo ka awinjo ka choke rwadore, ka chogo ka chogo chako tudore gi wadgi.

⁸Kane arango chokego, naneno ka leche gi ring’o kod pien oumogi. Muya to ne giongego.

⁹Eka Ruoth Nyasaye nowachona niya, “Wuod dhano, kor wach ni yamo, kinyise ni Ruoth Nyasaye ochike mondo oa e tunge ang’wen mag piny, kokudho kuom joma othogi, mondo gichak gibed mangima.”

¹⁰ Kuom mano, ne akoro wach mana kaka ne osewachona, eka muya nodonjo kuom joma othogo, mi gidoko ji mangima, kendo gichung’ gi tiendegi. Ne gin ji mang’eny, moromo bedo oganda lweny mang’ongo.

¹¹Nyasaye nowachona niya, “Wuod dhano, jo-Israel chalo mana gi chokego. Giwacho ni gitwo kururu, kendo ni gionge gima gigeno.

¹²Kuom mano, kor ni joga Israel wach, kinyisogi, ni an Ruoth Nyasaye, awacho kama: ‘Abiro elo lieteu, mi agolu oko, kendo adwoku e pinyu.

¹³Ka aelo lieteu, kendo agolou oko kamano, to unung’e ni an e Ruoth Nyasaye.

¹⁴Anaket Roho mara kuomu, mi ubed mangima, kendo anami udag e pinyu uwegi. Eka unung’e ni an e Ruoth Nyasaye. Asesingora ni anatim kamano, kendo abiro time mak orem. An Ruoth Nyasaye ema awacho kamano.’ ”

¹⁵Ruoth Nyasaye ne ochako owuoyo koda, mowachona niya,

¹⁶“Wuod dhano, kaw luth moro, indikie ni, ‘Jo-Juda’, eka ichak ikaw luth machielo, indikoe ni, ‘Jo-Israel ma nyikwa Josef, kata nyikwa Efraim.’

¹⁷Koro riw ludhe ariyogo e lueti, mondo onenre ka luth achiel.

¹⁸To ka jou openji mondo inyisgi tiend gima itimono,

¹⁹to dwokgi ni an Ruoth Nyasaye awacho ni abiro kawo luth mochung’ kar jo-Israel, mi ariw gi luth mochung’ kar jo-Juda. Kamano anariwgi gibed luth achiel ma amako e lweta.

²⁰“Ka isemako ludhego e lueti, mi ji duto onenogi,

²¹to nyisgi ni an Ruoth Nyasaye awacho ni abiro choko jo-Israel, kagolo kuom ogendini mane okegie, mi adwokgi e pinygi giwegi.

²²Anariwgi mondo gibed oganda achiel e piny gode mag Israel. Ginibed gi ruoth achiel maritogi, bende ok ginichak gipogre ogendini ariyo, kata pinje ariyo.

²³Ok ginichak gidwanyre gi nyiseche manono kendo makuero, bende ok ginindhogre gi richo. Anaresgi, kagologi e yore duto mag richo koda ka mago ma gindhogago. Anapwodhgi, mi gibed joga, kendo anabed Nyasachgi.

²⁴ Jatichna Daudi ema nobed ruodhgi. Kamano giduto giniriwre e bwo ruoth achiel, mi gimak chikena.

²⁵Ginidag e piny mane amiyo Jakobo jatichna. En e piny mane kweregi odakie. Ginidag kuno kaachiel gi nyithingdi kod nyikwagi nyaka chieng’, kendo jatichna Daudi nobed ruodhgi mochwere.

²⁶Abiro timo kodgi singruok mochwere makelonigi kue. Anami gimedre, mi aket Hekaluna e pinygi, kendo nobed kuno nyaka chieng’.

²⁷ Anadag kodgi kanyo, mi abed Nyasachgi, kendo gibed joga.

²⁸Ka aketo Hekaluna kanyo mondo obed e kindgi nyaka chieng’, eka ogendini nong’e ni an, Ruoth Nyasaye, ema aseyiero jo-Israel obed joga awuon.”