Read luo Ezekiel 38 Bible Online

Ezekiel 38 - luo bible

Ezekiel 38

¹Ruoth Nyasaye nowuoyo koda mowachona niya,

² “Wuod dhano, chung’ kichomo Gog, modak e piny Magog. En ruoth maduong’ mar ogendini mag Meshek kod Tubal. Kwede,

³kinyise ni an Ruoth Nyasaye awachone kama: In Gog, an jasiki.

⁴Abiro mbedo dhogi gi mbedo, mi awichi, kendo aywayi oko kaachiel gi jogi duto mag lweny. Ogandani mar lweny, kod farese gi joidh farese morwakore gi lep lweny, ng’eny ahinya. Jalweny ka jalweny omanore gi kuode kod liganglane.

⁵Jo-Persia gi jo-Ethiopia kod jo-Libya ni kodi. Giduto bende giting’o kuodi, kendo gisidho konde mag lweny.

⁶Jolweny duto moa e piny Gomer, kendo e piny Beth-togarma man yo nyandwat kuma bor, ni kodi, kaachiel gi ji mang’eny moa kuom ogendini mamoko.

⁷In Gog, anyisi mondo iikri, kaachiel gi jogi mag lweny.

⁸Bang’ higni mathoth, kinde nochopi ma ananyisie mondo imonj piny moro ma ji osebet kodakie gi kue maonge lweny, chakre ndalo mane oduoggie, kigologi kuom ogendini mang’eny. Inimonj gode mag Israel mane oselokore thim, kendo mane owe kokethore chon, to koro ji duto odakie gi kue.

⁹In gi jogi mag lweny, kod ogendini mang’eny man kodi, numonj pinyno mana ka yamb ahiti, kendo unuume mana ka rumbi.”

¹⁰Ruoth Nyasaye nomedo wacho ni Gog niya, “Ka kindeno ochopo, to inibed gi paro marach.

¹¹Iniwach e chunyi niya, ‘We adhi amonj piny kama ji odakie mos gi kueno. En gi mier ma ok ochiel gi ohinga, kendo maonge gi dhorangeye molor matek.’

¹²Eka in idhi iyak kendo ipe gik mantie, kendo inimonj kuonde mane okethore chon, to tinde ji odakie. Gin joma ne osechoki kigolo kuom ogendini mamoko, ma koro nigi jamni kod mwandu mamoko. Pinygi nie dier pinje madongo.

¹³Jo-Sheba gi jo-Dedan kod johala mag miech Tarshish biro penji kama: ‘Isechoko jogi mag lweny, idhigo koso?’

¹⁴“Kuom mano, wuod dhano, dhiyo inyis Gog ni an Ruoth Nyasaye awachone kama: ‘E kinde ma joga Israel odakie gi kueno,

¹⁵to iniwuogi ia thuru yo nyandwat kuma bor. Inibi ka in gi oganda lweny maduong’ maratego moa kuom ogendini mathoth. Giduto ginibi ka giidho farese.

¹⁶Ununur kuom joga Israel, mana ka rumbi maumo piny. Ka kindeno ochopo, anaori mondo imonj pinya, to gima natimni nonyis ogendini ni an Ng’ama Ler, mi ging’eya, yaye Gog!

¹⁷In e ng’at mane awuoyo kuome chon kane aoro jotichna ma jonabi mag Israel mondo owach pile ni e ndalo mabiro anakel ng’ato mondo omonj Israel.’ An Ruoth Nyasaye ema awacho kamano.”

¹⁸Ruoth Nyasaye nowacho bende niya, “Chieng’ ma Gog nomonjie Israel, mirima mager nomaka.

¹⁹Awacho ka akecho ahinya ni chieng’no piny Israel noyiengni malich.

²⁰Rech duto manie nam, gi winy manie kor polo, kod le mae thim gi gik mamol piny, kaachiel gi dhano duto mae piny notetni e nyima. Gode nomukre, kendo hohni bende noruombre piny, kendo ohingni duto nopodhi.

²¹“Anabwog Gog gi masiche mopogore opogore. An Ruoth Nyasaye ema awacho kamano. Joge noked kendgi ng’ato gi ng’ato.

²²Anakume gi tuoche kod nek. Bende anahon koth mang’ongo gi pe madongo gi mach kod kite maliel kuome, kendo kuom joge mag lweny kod ogendini mathoth man kode.

²³Mano e yo ma ananyisgo ogendini duto ni aduong’ kendo aler. Eka gining’e ni an e Ruoth Nyasaye.”