Read luo Ezekiel 39 Bible Online

Ezekiel 39 - luo bible

Ezekiel 39

¹Ruoth Nyasaye nowachona niya, “Wuod dhano, kwed Gog, ruoth maduong’ mar ogendini mag Meshek kod Tubal, kinyise ni an Ruoth Nyasaye awacho kama: Gog, an jasiki.

²Abiro wichi, mi agoli yo nyandwat kuma bor nyaka chop ibi e gode mag Israel.

³Eka anago atung’i e badi ma koracham, kod aserni e badi korachwich, mi lwar piny.

⁴In Gog, kod ogandani mar lweny kaachiel gi ogendini makonyi, ubiro tho e gode mag Israel, kendo anami kit winy duto gi ondiegi cham ringreu.

⁵Adier, unutho mana oko e pap. An Ruoth Nyasaye ema awacho kamano.

⁶“Abiro moko mach e piny Magog kod dhonembe duto ma ji odakie gi kue, mi ng’ato nong’e ni an e Ruoth Nyasaye.

⁷Anami joga Israel ng’e nyinga maler, kendo ok nawe nyinga chak kethre. Eka ogendini nong’e ni an Ruoth Nyasaye an Ng’ama Ler mar Israel.”

⁸Ruoth Nyasaye nochako owacho niya, “Chieng’ ma awuoyo kuomeno biro biro mak orem. An ema asewacho kamano.

⁹Bang’e joma odak e miech Israel nodhi mondo ochok gi-lweny mojwang’, mondo obed yien ma gichwako. Kuodi gi okumbni, kod aserni gi atunge, kaachiel gi arunge kod tonge ma gichoko nobed yien moromogi chwako kuom higni abiriyo.

¹⁰Ok ginidhi e thim mondo gimoti, kata dhi e bungu mondo gitong’ yien, nikech ginibed ka gichwako gi-lweny mojwang’go. Ginipe kendo giniyak jogo mane opeyogi kendo oyakogi. An Ruoth Nyasaye ema awacho kamano.”

¹¹Ruoth Nyasaye nowacho kendo niya, “Chieng’ ma gigo duto otimore to anami Gog kar yik e Israel, e holo miluongo ni, Holo Jowuoth, man yo wuokchieng ma yo Nam Kado. Gog kod jolwenje duto noyik kanyo, kendo holono noluong ni Holo mar Oganda Jolwenj Gog.

¹²Jo-Israel notiek dueche abiriyo ka yiko ringre joma otho duto, mondo gichak gipuodh pinygi kendo.

¹³Ng’ato ka ng’ato modak e pinyno noyikgi, kendo mano nomi giyud duong’, chieng’ ma alocho. An Ruoth Nyasaye awacho kamano.

¹⁴“Ka dueche abiriyogo oserumo, to noyier ji ma nosiki ka wuotho e piny mondo oyik ringre joma otho ma giyudo ka pod oriere ewi lowo. Kamano mondo gipuodh piny obed maler.

¹⁵Ka giwuotho e piny koni gi koni to kinde duto ma giyudoe chok dhano to giniket ranyisi e bathe mondo ka jokunyo obiro, to mondo oyike e Holo Oganda Jolwenj Gog.

¹⁶Kamano piny nochak opwodhi.” (Nitie dala moro machiegni gi kanyo mochak nyinge oganda jolwenjno.)

¹⁷ Ruoth Nyasaye nochako owacho niya, “Wuod dhano, nyis winy duto kod ondiegi duto man kuonde duto ni awachonigi kama: Biuru mondo ucham misango ma adwaro timonu. Obiro bet sawo maduong’ ahinya ewi gode mag Israel, kuma ubiro chamoe ring’o kendo madhoe remo.

¹⁸Adier, ubiro chamo ringre jolweny, kendo ubiro madho remb ruodhi mag piny. Giduto ginibednu ka imbe gi nyirombe gi diek gi ruedhi machwe mag Bashan mitimogo misango.

¹⁹Ka anego jogo ka misango kamano, to un winy kod ondiegi, unucham boche, mi uyieng’ kendo umadh remo mi umer.

²⁰E mesana to unuchamie farese gi joidhgi kod thuondi gi jolweny mamoko duto nyaka uyieng’. An Ruoth Nyasaye ema awacho kamano.”

²¹Ruoth Nyasaye nowacho niya, “Abiro miyo ogendini neno duong’na maler, kendo ka asekumo ji duto matek, to gibiro ng’eyo kaka ang’ado bura kare.

²²Chakre kanyo jo-Israel nong’e ni an e Ruoth Nyasaye ma Nyasachgi,

²³kendo ogendini mamoko nong’e ni ne oter jo-Israel e tuech nikech richo mane gitimo ka giweya. Ne ajwang’ogi e lwet wasikgi, kendo aweyo githo giduto e lweny.

²⁴Ne atimonigi maromre gi dwanyruokgi kod timbegi mamono, mi alokonigi ng’eya.”

²⁵Ruoth Nyasaye nochako owacho niya, “Koro abiro kecho jo-Israel ma nyikwa Jakobo, mi ami gichak gidhi nyime maber, kendo ok nayie nyinga maler kethre.

²⁶Ka gichako gidak gi kue e pinygi giwegi, ka onge ng’ama bwogogi, to ok ginipar wichkuot mane giyudo kuom ndhok mane gindhogago.

²⁷Anaduoggi, kagologi e pinje duto mag wasikgi mondo anyis ogendini mang’enygo ni an Nyasaye Maler

²⁸Eka joga nong’e ni an e Ruoth Nyasaye ma Nyasachgi, nikech ne aterogi e tuech, to koro achokogi kaduogogi e pinygi giwegi ma ok aweyo kata achiel chien.

²⁹Anapong’ jo-Israel gi Roho mara, mi ok nachak awegi kendo. An Ruoth Nyasaye ema awacho kamano.”