Read luo Ezekiel 40 Bible Online

Ezekiel 40 - luo bible

Ezekiel 40

¹Due apar mar higa manyien, ma en higa mar apar gang’wen bang’ kawo Jerusalem, kane wasetieko higni piero ariyo gabich e tuech, ne awinjo ka teko mar Ruoth Nyasaye obiro kuoma, mi oting’a.

² Ne aneno e fweny ka Nyasaye otera e piny Israel, moketa ewi got mabor. Kuno ne anenoe udi mochokore kanyachiel e nyima, machalo dala.

³ Ruoth Nyasaye ne otera machiegni gi udigo, mi apo kaneno ng’at moro marieny ka mula. Ne ochung’ e dhorangach, koting’o tol mipimogo gik moko, kod rapim mar bao e lwete.

⁴Ng’atno nowachona niya, “Wuod dhano, rang maber, kendo chik iti malong’o, mondo iwinj weche duto ma abiro wachoni, nimar mano ema omiyo osekeli ka. Bang’e idhi inyis jo-Israel gimoro amora ma iseneno ka.”

⁵ Gima ne aneno ne en Hekalu, kendo ne nitie ohinga molwore. Ng’at mane aseneno cha nogolo rapim mar bao ma borne mita adek, mi opimogo ohinga. Borne noromo mita adek to lach mar kore bende mita adek.

⁶Eka ng’atno nodhi e rangach ma yo wuokchieng’. Ne oidho raidhi manie dhorangach, mi opimo dhorangach, moyudo ni lachne modhi iye romo mita adek.

⁷E tok dhorangajno ne nitie yo ma ji kadhoe man gi udi mag rito adek e bathe koni gi konu. To ot ka ot ne borne kod lachne mita adek maromre, kendo lach mar kor ot mane ni e kindgi ne mita ariyo gi nus. Kisekadho ut ritogo, to nitie yo madhi e ot maduong’ momanyore gi Hekalu. Bor mar yorno ne mita adek.

⁸Ng’atno nopimo odno, moyudo ni lachne modhi iye oromo mita ang’wen. Ne omakore gi dhorangach kendo en ema ne ochiegnie moloyo gi Hekalu.

⁹Lach mar kor ot mogik tung’ mar odno ne romo mita achiel.

¹⁰Udi mag rito mane ni e bath yo koni gi koni ne romre duto, kendo korgi bende ne romre duto koni gi koni.

¹¹Bang’e ng’atno nopimo lach mar dhorangach. Ne oromo mita auchiel gi nus, to kane thike oyaw, to lach kama idonjogo ne romo mita abich.

¹²E nyim od rito ka od rito ne nitie ohinga machiek ma borne modhi malo romo nus mita. Bor kod lach mar udigo ne mita adek adek maromre.

¹³Bang’e ng’atno nopimo lach mar rangach, chakre e kor ot ma katok od rito achiel gi ka iye nyaka kor ot ma katok ot machielo momanyore kode, monwang’o ni oromo mita apar gariyo gi nus.

¹⁴Ot mane ni tung’ mogik ema nidonjogo e laru. Ne opime, moyudo ni lachne mita apar.

¹⁵Bor duto mar yo makadho e kind udino, chakre oko mar rangach nyaka bath ot mogik tung’ ne romo mita piero ariyo gabich.

¹⁶Ne nitie dirise matindotindo e kor udi maoko mag udi duto, kendo e kor udi maiye manie kind udi. Kor udi ma yo ka iye, momanyore gi yo makadho e kind udino ne ogorie yiend othidhe.

¹⁷Ng’atno nokawa mokadho koda e dhorangach nyaka e laru moro. Kuno ne nitie udi piero adek momakore gi ohinga maoko, to e nyim udigo ne nitie kama ochanie kite mopamore

¹⁸molworo laruno duto. To laru ma okono ne ni piny moloyo laru maiye.

¹⁹Ne nitie rangach moro moting’ore gi malo mane idonjogo e laru ma iye. Ng’atno nopimo kind rangach maiye gi maoko, mi oyudo ni bor mae kindgi romo mita piero abich.

²⁰Bang’e ng’atno nodhi mopimo rangach ma yo nyandwat midonjogo e laru maoko.

²¹Udi mag rito adek mane ni e bath yo koni gi koni, kod kor udi mane ni e kindgi, kaachiel gi ot maduong’, duto ne romre gi mago mane nie rangach ma yo wuokchieng’. Bor duto mar rangach gi utene ne mita piero ariyo gabich, to lachne mita apar gariyo gi nus.

²²Ot maduong’ kod dirise gi kido mag yiend othidhe mane ogor, ne chalo gi mago manie rangach ma yo wuok chieng’. Kaeri bende ne nitie raidhi man gi ondembe abiriyo midhigo e dhorangach, kendo ot maduong’ ne ni tung’ mogik, kuma omanyore gi laru.

²³Ne nitie rangach moro machielo midonjogo e laru maiye momanyore gi rangach maokono, mana kaka ne nitie e rangach ma yo wuokchieng’. Ng’atno nopimo bor manie kind rangach maoko gi maiyeno, moyudo ni oromo mita piero abich.

²⁴Eka ng’atno notera yo milambo, mi kuno ne wanenoe rangach machielo. Ne opime moyudo ni oromre gi rangeye mamoko duto.

²⁵Udi mag rangajno ne nigi dirise mana kaka rangeye mamoko. Bor duto mar rangajno bende ne mita piero ariyo gabich, to lachne apar gariyo gi nus.

²⁶Ne nitie raidhi man gi ondembe abiriyo madhi e dhorangajno, kendo ot maduong’ mane ni kuno bende ne ni tung’ mogik, kama omanyore gi laru. Ne ogor yiend othidhe e kor udi maiye momanyore gi yo makadho e kind udi.

²⁷Kanyo bende ne nitie rangach machielo midonjogo e laru maiye. Ng’atno nopimo bor mae kind rangeyego, moyudo ni oromo mita piero abich.

²⁸Ng’atno nokawa mokadho koda e dhorangach ma yo milambo, mi wachopo e laru maiye. Ne opimo rangajno, moyudo ni orom gi rangeye mamoko.

²⁹Udi mage mag rito gi ode maduong’ kod kor ute maiye ne chalre gi mago mane ni e rangeye mamoko.

³⁰Bende udi mag rangeye ne nigi dirise. Borne duto ne mita piero ariyo gabich, to lachne mita apar gariyo gi nus.

³¹Ne en gi ot maduong’ momakore gi laru mamoko. Yiend othidhe bende ne ogor e kor udi momanyore gi yo makadho e kind udi. Raidhi man gi ondembe aboro ne dhi nyaka e dhorangajno.

³²Koro ng’atno nokawa mokadho koda e dhorangach ma yo wuokchieng’, mi wachopo e laru maiye. Eka ne opimo rangajno moyudo ni orom gi rangeye mamoko.

³³Ute mag rito gi ode maduong’ kod kor udi maiye ne romre gi mago mane ni e rangeye mamoko. Ne nitie dirise kuonde duto, koda ka e ot maduong’. Borne duto bende ne mita piero ariyo gabich, to lachne mita apar gariyo gi nus.

³⁴Ot maduong’ ne omanyore gi laru maoko, kendo yiend othidhe nogor e kor udi manie bath yo makadho e kind udi. Raidhi man gi ondembe aboro ne dhi nyaka e dhorangajno.

³⁵Ng’atno nochako okawa motera e rangach ma yo nyandwat. Ne opime, moyudo ni oromre gi mamoko.

³⁶Dhorangajno bende ne nigi udi mag rito, gi kor udi maiye mogor, gi ot maduong’, kod dirise kuonde duto. Borne duto ne mita piero ariyo gabich, to lachne mita apar gariyo gi nus.

³⁷Ot maduong’no ne omanyore gi laru maoko, kendo yiend othidhe ne ogor e kor udi manie bath yo makadho e kind udi. Raidhi man gi ondembe aboro ne dhi nyaka e dhorangajno.

³⁸E laru maoko ne nitie ot moro momakore gi rangach maiye, odno ne nigi dhoot madonjo e ot maduong’ mane omanyore gi laru. Kanyo ema ne ilwokoe jamni monegi, midwaro timogo misenghni miwang’o pep.

³⁹Ne nitie mesni ang’wen ei ot maduong’no, ariyo e bath ot konchiel, kendo ariyo e bathe komachielo. Ewi mesnigo ema ne inegoe jamni mitimogo misengni mopogore opogoore, kaka misengni miwang’o pep, kod mag golo richo, kod mago mipwodhogo richo mag gowi.

⁴⁰To oko mar odno bende ne nitie mesni ang’wen, ariyo e bath rangach ma yo nyandwat konchiel kendo, kendo ariyo e bathe komachielo.

⁴¹Kamano ne nitie mesni ang’wen e ot kendo ang’wen mamoko oko. Omiyo giduto ne gin mesni aboro mane inegoe jamni mitimogo misengni.

⁴²Mesni ang’wen mane ilosoe misengni miwang’o pep ne mag kite mopa. Borgi modhi malo ne nus mita to borgi kod lachgi ne mita achiel achiel maromre. Gik moko duto mane itiyogo kuom yang’o jamni mitimogo misengni ne iketo ewi mesnigo.

⁴³Ndiri ma lachne lwedo achiel ne oket molworo bath mesa ka mesa. Mesnigo ema ne iketoe ring’o duto mane itimogo misengni.

⁴⁴E bath rangach ma yo nyandwat e laru maiye, ne nitie ot moro mochomo yo milambo. Bende e bath rangach ma yo milambo ne nitie ot machielo machal gi mano mochomo yo nyandwat.

⁴⁵Ng’atno nonyisa niya, “Ot momanyo yo milambono en mar jodolo matiyo e Hekalu,

⁴⁶to ot mochomo yo nyandwatno en mar jodolo matiyo e kendo-mar-misango. Jodologo duto nyaka bed jo-Lawi ma nyikwa Zadok. Gin kende ema oyienigi dhiyoe nyim Ruoth Nyasaye mondo gitine.”

⁴⁷Ng’atno nopimo laru maiye, mi oyudo ni oromo mita piero abich koni gi koni. To e nyim Hekalu hie ne nitie kendo-mar-misango.

⁴⁸Eka ng’atno nokawa, motera e ot ma e dhood Hekalu. Ne opimo dhoot midonjogo ei Hekalu, mi oyudo ni borne oromo mita ariyo gi nus, to lachne mita abiriyo. Lach mar kor udi mage ne romo mita achiel gi nus koni gi koni.

⁴⁹Bor mar ot mane ni e dhootno ne romo mita apar, to lachne mita auchiel. Raidhi man gi ondembe apar ne nie dhoodno. Bende e bath dhoot koni gi koni ne nitie siro achiel achiel.