Read luo Ezekiel 41 Bible Online

Ezekiel 41 - luo bible

Ezekiel 41

¹Bang’ mago duto, ng’atno notera e ot madiere mar Hekalu, miluongo ni Kama Ler. Ne opimo yo midonjogo e odno, mi oyudo ni borne mita adek,

²to lachne mita abich, kendo lach mar kor ot mita ariyo gi nus koni gi koni. Eka ne opimo ot madiereno, moyudo ni borne romo mita piero ariyo, to lachne mita apar.

³Bang’ mano, nodhi e ot maiye man tung’ mogik. Nopimo yo midonjogo, moyudo ni borne mita achiel, to lachne mita adek, kendo lach mar kor ot ne romo mita adek gi nus koni gi koni.

⁴Eka ne opimo odno, moyudo ni borne gi lachne mita apar maromre. Bang’ mano nowachona niya, “Odni e Kama Ler Moloyo.”

⁵Ng’atno nopimo lach mar kor udi maoko mag Hekalu, moyudo ni oromo mita adek. Udi moko ma lachgi mita ariyo, noger alwora, komakore gi Hekalu.

⁶Udigo ne mag gorofe adek, ma udi piero adek adek kuomgi nie gorofa ka gorofa. Kia malo, to lach mar kor udi mag Hekalu ne dongo mi bath udigo konchiel norenjore ewi ohinga, mondo yien moriw masirogi kik pow kor udi mag Hekalu.

⁷Lach mar kor udi mag Hekalu ne nenore maromre gi oko, chakre piny nyaka malo, nikech udigo. Ne nitie raidhi ma oger e tok udi molworo Hekalugo gi oko. Mano omiyo ng’ato ne nyalo a e gorofa mapiny, to dhi e madiere nyaka gorofa mamalo.

⁸Ne aneno ndiri mochwe molworo Hekalu duto gi oko. Borne modhi malo ne mita adek, kendo wiye ne romre gi mise mar udi mane oger momakore gi Hekalugo, to lachne ne romo mita ariyo gi nus.

⁹Lach mar kor udigo gi oko ne romo mita ariyo gi nus.

¹⁰Bende ne nitie kama odong’ nono molworo Hekalu, e kind ndiri gi udi ma jodolo tiyoe, ma lachne mita apar.

¹¹Ne nitie dhoot moro midonjogo e udi man yo nyandwat mar Hekalu, kendo machielo midonjogo e udi man yo milambo.

¹²Ne nitie ot moro yo podho chieng’ momanyore gi Hekalu. Borne ne romo mita piero adek gabich, to lachne mita piero ang’wen gabich. Lach mar kor ute ne mita ariyo gi nus koni gi koni.

¹³Ng’atno ne opimo oko mar Hekalu, moyudo ni borne oromo mita piero abich. Chakre e tok Hekalu, kadhi ariwa mar laru nyaka chop e tok ot koma ogik yo podho chieng’ bende ne romo mita piero abich.

¹⁴Lach madhi ariwa kanyim Hekalu, kaachel gi kama odong’ nono koni gi koni, noromo mita piero abich.

¹⁵Bende ng’atno nopimo lach mar ot man yo podho chieng’ mar Hekalu, kaachiel gi lach mar kor udi koni gi koni, moyudo ni oromo mita piero abich. Ot ne ni kama idonjogo e Hekalu kaachiel gi Kama Ler, kod Kama Ler Moloyo,

¹⁶duto nobaw gi bao, chakre dier ot nyaka dirise. Dirisego ne inyalo umo.

¹⁷Kor udi ma yo ka i Hekalu, kadhi maloo nyaka ewi dhoudi, ne ogorie

¹⁸yiend othidhe kod kido mag malaika miluongo ni kerubi kuonde duto. Ne ogorgi molworo ot, ka kido mar kerubi gi kido mar yadh othidhe okikore. Kerubi ka kerubi ne nigi lela wenge ariyo.

¹⁹Lela wang’ achiel ne mar dhano, mochomo kuma yadh othidhe nitie e bathe konchiel, to lela wang’e machielo ne mar sibuor, ma bende nochomo yadh othidhe e bathe komachielo. Mano e kaka kor udi duto ne ogor,

²⁰chakre dier ot nyaka ewi dhoudi.

²¹Bor kod lach mag sirni mag dhoot mar Kama Ler ne romre koni gi koni.

²²E nyim dhoot midonjogo Kama Ler Moloyo ne nitie gimoro molos gi bao machalo kendo-mar-misango. Borne modhi malo ne mita achiel gi nus, to lachne mita achiel. Sirni mane nie kona mage, kaachiel gi siandane kod bethene, duto ne mag bao. Ng’atno nonyisa niya, “Mano e mesa mochung’ e nyim Ruoth nyasaye.”

²³Kama Ler kod Kama Ler Moloyo ne nigi dhoudi madongo, mayawore gie diergi,

²⁴kendo banore diriyo.

²⁵Dhood Kama Ler nogorie yiend othidhe kod kido mag kerubi, mana kaka nogor e kor udi. E nyim kama idonjogo e Hekalu ne nitie gama molos gi bao.

²⁶Bende ne nitie dirise e bethe odno koni gi koni, kendo kor udi mage ne ogorie yiend othidhe.