Read luo Ezekiel 43 Bible Online

Ezekiel 43 - luo bible

Ezekiel 43

¹Bang’ mago duto, ng’atno notera e rangachh mochomo yo wuookchieng’,

² mi aneno duong’ maler mar Nyasach Israell kabiro koa yoo wuokchieng’. Dwond Nyasaye ne wuo ka apaka mar nam, kendo duong’ne maler nomiyo piny rieny.

³Fwenyno ne chalo gi fweny mane aneno kane Nyasaye obiro ketho Jerusalem, kendo ochal gi moro mane aneno e bath aora Kebar. Bang’e ne apodho piny auma.

⁴Duong’ maler mar Ruoth Nyasaye nokadho e dhorangach ma yo wuokchieng’, modonjo e Hekalu.

⁵Roho noting’a, motera e laru maiye, mi aneno ka duong’ maler mar Ruoth Nyasaye opong’o Hekalu.

⁶Kane ng’atno pod ochung’ e dira kanyo, ne awinjo ka Ruoth Nyasaye wuoyo koda gie Hekalu niya,

⁷“Wuod dhano, Hekaluni e koma mar duong’, kendo en e kama atenoe tienda. Abiro dak kaeri e kind jo-Israel nyaka chieng’. Jo-Israel, kata ruodhigi, ok nochak okel ni nyinga maler wichkuot kuom lamo nyiseche mamoko, kata kuom chungo kite ma giparogo ruodhigi motho.

⁸Ruodhigigo nogero utegi mana momakore gi Hekaluna, mi kor ot kende ema opogo kinda kodgi. Gik modwanyore mane gitimo nokelo ni nyinga maler wichkuot, omiyo ne atiekogi ka an gi mirima mager.

⁹To koro nyaka giwe lamo nyiseche mamoko, kendo giwit kite ma giparogo ruodhigi. Ka gitimo kamano, to anadag e kindgi nyaka chieng’.”

¹⁰Ruoth Nyasaye nomedo wacho niya, “Wuod dhano, nyis jo-Israel wach Hekalu, mondo ging’e kaka ochalo, eka wigi okuodi kuom timbegi maricho.

¹¹To ka ineno ni wigi okuot kuom gik ma gisetimo, to nyisgi kido mogergo Hekalu, kaachiel gi gik moko duto manie iye, kod dhorangeye midonjogo gi miwuokgo, kendo kaka gik moko duto ochan e iye. Bende nyisgi chike duto man kanyo. Ndik gigo duto mondo ging’e kaka gik moko ochan, kendo gimak chikego duto.

¹²To chik Hekalu chalo kama: Kuonde duto molworo wi godni gin kuonde maler moloyo.”

¹³ Kendo-mar-misango, kipimo gi rapim mane opimgo Hekalu, ne chalo kama. Bor modhi malo mar kama kendo-mar-misango orenjore romo nus mita, kendo olach moloyo kendo-ma-misango gi nus mita. To lake koni gi koni oting’ore malo moromo lwedo achiel.

¹⁴Gi yo ka piny, to bor mar kendo-mar-misango kadhi malo ne romo mita achiel, to borne gi lachne mita aboro aboro maromre. To e wiye ne nitie kamaa borne gi lachne oromo mita abiriyo abiriyo maromre, to borne modhi malo mita ariyo. To bor gi lach mar wiye mogik, kama iwang’oe misango, ne romo mita auchiel maromre, to borne modhi malo bende mita ariyo. Wiyeno ne nigi tunge ang’wen. Kendo-mar-misangono ne nigi raidhi miidhego e bathe ma yo wuokchieng’.

¹⁸ Ruoth Nyasaye nowuoyo koda, mowachona niya, “Wuod dhano, chik iti mondo iwinj gima awachoni. Ka oseger kendo-mar-misango, to nyaka iwale ni tich Nyasaye, kiwang’oe misengni, kendo ikiroe remb jamni motimgo misengnigo.

¹⁹Jodolo ma jo-Lawi ma nyikwa Zadok kende ema nyaka bi e nyima mondo otina. An Ruoth Nyasaye ema agolo chikno. “Nyaka imigi nyarwath mondo gitimgo misango mar golo richo.

²⁰To nyaka ikaw remb nyarwadhno moko mondo iwirgo tunge ang’wen mag kendo-mar-misango, kendo iwirgo konde ang’wen mag kore kod ndiri man koni gi koni. Kamano e kaka ibiro pwodho kendo-mar-misango, kendo walogo ni Nyasaye.

²¹Bang’e kaw nyarwath motimgo misango mar golo richono, mondo iwang; pep kama onego wangg’ie, oko mar Hekalu.

²²Kinyne to kaw nyuok maonge gi songa mondo itimgo misango mar golo richo. Pwodh kendo-mar-misango gi remb nywogno mana kaka ne ipwodhe gi remb nyarwath.

²³Ka isetieko timo kamano, to kaw nyarwath gi nyaim maonge gi songa,

²⁴ikel ira, an Ruoth Nyasaye. Jodolo mondo okir kuomgi chumbi, otimnagoo misango miwang’o pep.

²⁵Odiechieng’ ka odiechieng’ kuom ndako abiriyo onego chiw nywok gi nyarwath kod im ka misango mar golo richo. Giduto nyaka gibed maonge gi songa.

²⁶Kamano jodolo nyaka pwodh kendo-mar-misango kuom ndalo abiriyo mondo obed moikore ni tich Nyasaye.

²⁷Ka ndalo abiriyo orumo, to jodolo nyalo chako timo misengni miwang’o pep, kod misengni mag sawo ma ji kelo, e kendono. Bang’e anabed mamor kodu. An Ruoth Nyasaye ema awacho kamano.”