Read luo Ezekiel 44 Bible Online

Ezekiel 44 - luo bible

Ezekiel 44

¹Ng’atno nochako otera e dhorangach maoko man yo wuokchieng’ mar kuma Hekalu nitie, mi wanwang’o ni dhorangajno olor.

²Ruoth Nyasaye nowachona niya, “Dhorangajni nyaka sik kolor, kendo ok nochak oyawe ngang’. Onge dhano ma oyiene kadhoe, nikech an Ruoth Nyasaye ma Nyasach Israel asekadhoe. Emomiyo nyaka osik kolore.

³Ruodh piny Israel kende ema nyalo dhi kanyo kaka ruoth, mondo ocham sawo e nyima. To nyaka odonji kendo owuogi kokadho mana e ot maduong’ ma iye mogik.”

⁴Bang’e ng’atno nokadho koda e dhorangach ma yo nyandwat mar hekalu. Ne apodho piny auma.

⁵Mi Ruoth Nyasaye nowachona niya, “Wuod dhano, rang maber, kendo chik iti ni gimoro amora ma anyisi, nikech koro amiyi chike mag hekalu. Nyaka ing’e joma oyienigi donjo e Hekalu.

⁶“Nyis jo-Israel ma jopiemgo ni an ruoth Nyasaye ok nachak ayie gi gik makuodo wich ma gisebedo ka gitimo.

⁷Gisedwanyo Hekaluna, ka giyie ni jopinje mamoko ma ok ter nyangu kendo mochaya donjo e Hekalu e kinde ma itimona misango gi boche kod remo. Kamano joga oseketho singruok mane atimo kodgi, kuom gik mamono ma gisetimo.

⁸Kar timo tich ma onego utina e Hekalu, too use mana keto jopinje mamoko mondo otim.

⁹“An Ruoth Nyasaye awacho kama: Japiny moro amora ma ok ter nyangu kendo mochaya ok nochak odonj e Hekaluna kata obed mana japiny moro modak e Israel.

¹⁰“Jo-Lawi mane oringo oweya kaachiel gi jo-Israel mamoko, mi olamo nyiseche manono, nyaka kum kuomm richogino.

¹¹Ginyalo toyona e Hekalu, ka girito dhorangeye, kendo ka gitiyona tije mamoko mag Hekalu. Ginyalo yang’o jamni ma ji chiwo kaka misengni miwang’o pep kod misengni mamoko, kendo nyaka gichung’ e nyim ji ka gitiyonigi.

¹²To kaka ne gitiyo ni jo-Israel e tij lemo kuonde milamoe nyiseche manono, mi gimiyo jo-Israel odonjo e richo, omiyo an Ruoth Nyasaye akuong’ora ni nyaka kumgi.

¹³Ok ginichak gitina kaka jodolo, bende ok ginidhi but gik maler mowalna, kendo ok ginidonj Kama Ler Moloyo. Mano e wichkuot ma ginine kuom gik maricho ma gisebedo ka gitimo.

¹⁴To abiro miyogi tije mamoko duto mag Hekalu.

¹⁵“An Ruoth Nyasaye awacho kama: Jodolo ma jo-Lawi ma nyikwa Zadok to ne odhi nyime katiyona maber e Hekalu, ka jo-Israel mamoko to oringo oweya, kuom mano, koro gin ema nyaka gitina, kendo gibi e nyma mondo gichiwna boche kod remo mag misengni.

¹⁶Gin e joma nodonj e Hekaluna, mi ti e kendona-mar-misango, kendo los kaka ilemo e Hekalu.

¹⁷ Ka gidonjo e dhorangach madhi e laru ma iye mar Hekalu, to nyaka girwakre gi lewni mabeyo mayom. Ok ginyal rwako law moro amora molos gi yie rombo e sa ma ginie tich e laru maiye, kata e Hekalu.

¹⁸To nyaka girwak kilemba, kod sirueche molos gi law maber mayom, to bende kik gitue nungogi gi okanda, nimar dipo ka luya ochamogi.

¹⁹ Kapok giwuok gidhi e laru maoko kuma ji nitie, to nyaka gikuong gilony lepgi ma girwako ka gitiyo e Hekalu, mi gikan e udi mowal ni tich Nyasaye, nimar dipo ka lepgi malergo ogere kuom ng’ato, mohinyo.

²⁰ “Jodolo ki liel wigi, to bende kik giwe wigi yugno ahinya, to nyaka ging’adgi maber.

²¹ Kik gimadh kong’o e kinde ma gidwaro donjo e laru maiye.

²² Bende jadolo kik kend dhako ma chwore otho, kata dhako moweyo chwore to nyaka okend mana nyako ma silili ma nyar Israel, kata chi liel ma chwore ne jadolo.

²³ “Jadolo nyaka puonj joga pogruok manie kind gik maler gi gik ma ok ler, kendo manie kind gik ma ogak gi gik ma ok ogak.

²⁴Ka wach moro owuok ma ji laroree, to jodolo nyaka yal wachno, mi ng’ad bura mana moluwore gi chikna. Ginirit ndalo mag sewni maga, kaluwore gi chikena, kendo ginirit ndalo mag Sabatona maler.

²⁵ “Jadolo kik mul ringre ng’at motho, ma dimi obed mogak, mak mana ka ng’atno en wuon kata min, nyathine kata owadgi, kata nyamin ma pok odhi tedo.

²⁶To komulo watne motho kamano, to nyaka opwodhre. Bang’ puodhruokno nyaka oyue kuom ndalo abiriyo.

²⁷Eka enodhi e laru maiye mondo otim misango mar golo richo, mondo eka ochak oti e Hekalu kendo. An Ruoth Nyasaye ema awacho kamano.

²⁸ “Jodolo ok noyud lowo mopognigi e piny Israel ka mwandugi, to an Ruoth Nyasaye ema nabed mwandugi.

²⁹ Misengni mag cham kod misengni mag golo richo gi ketho ema nobed chiembgi. Bende giniyud gik moko duto mowalna e Israel.

³⁰Gin ema giniyud cham mabeyo duto mokwongo chiek mochiwna. E kinde ka kinde ma ji otedo makati, to ginimi jodolo makati mokwong tedi kaka chiwo mondo oguedh miechgi.

³¹ Jadolo kik cham gimoro amora motho kende, kata ma ondiek onego, bed ni en winyo kata le.”