Read luo Ezekiel 45 Bible Online

Ezekiel 45 - luo bible

Ezekiel 45

¹Ka piny opogi mondo dhoot ka dhoot oyud lope, to lowo ma borne romo kilomita apar nyaka wal ni Ruoth Nyasaye. Kanyo duto nobed kama ler.

²Bath lowono, ma borne gi lachne mita mia ariyo gi piero abich maromre noket tenge mondo ogerie Hekalu. E alwora mar lop Hekaluno nobedie kama odong’ nono ma lachne romo mita piero ariyo gabich.

³Bath lowono ma borne romo kilomita apar gariyo gi nus, to lachne kilomita abich, noket tenge mondo ogerie Hekalu, ma bende iluongo ni Kama Ler Moloyo,

⁴kendo mondo jodolo matiyo ni Ruoth Nyasaye e Hekalu odagie. Utegi nobed kanyo kaachiel gi Kama Ler mogerie Hekaluno nobed mita mia ariyo gi piero abich maromre, kaachiel gi kama odong’ nono molwore ma lachne mita piero ariyo gabich.

⁵To bende bath lowono komachielo ma borne bende oromo kilomita apar gariyo gi nus, kendo lachne kilomita abich, noket tenge ni jo-Lawi matiyo e Hekalu. Ginibed gi mier kuno ma gidakie.

⁶To lowo modong’ ma borne oromo kilomita apar gariyo gi nus to lachne kilomita ariyo gi nus bende nyaka ket tenge mondo ogerie dala moro maduong’. Enobed mokiewo gi lowo mowal ni Nyasayeno, kendo nobed mar jo-Israel duto.

⁷Ruoth marito piny bende nyaka podne lowo, momakore gi kama owal ni Nyasaye kod lowo ma dala maduong’ nitie, koni gi koni. Yo podhochieng’, lop ruoth nochwe nyaka nam Mediterenia, to yo wuokchieng’ nogik e tong’ piny. Kamano borne moa yo podhochieng’ nobed maromre gi lowo mopog ni dhoot ka dhoot.

⁸Mano ema nobed lop ruoth marito piny Israel, mondo kik ochak othir ji, to owe bath piny koma odong’ obed mar dhout Israel.

⁹Ruoth Nyasaye nowacho niya, “Usetimo richo aming’a un jotend Israel. Weuru timbeu mag mecho kod mag thir muthirogo ji. To timuru mana gik makare kendo mowinjore. Bende kik uchak uriemb joga e lopgi kendo. An Ruoth Nyasaye ema awacho kamano.

¹⁰ “Nyaka ji duto ti gi rapim makare kama:

¹¹Rapim miluongo ni efa, mipimogo gik machalo cham, nyaka bed maromre gi rapim miluongo ni bath, mipimogo gik maliw. To rapim miporogo rapim nyaka bed rapim miluongo ni homer.[1] Homer achiel nyaka bed maromre gi efa apar, kendo kod bath apar.

¹²“Bende rapim mag pek gik moko nyaka chal kama: Gera piero ariyo nyaka bed maromre gi shekel achiel, kendo shekel piero auchiel nyaka bed maromre gi mina achiel.

¹³“Koro chiwo ma onego uket tenge e magi: Kukayo chambu, to nyaka uket tenge achiel kuom piero auchiel mag chamugo.

¹⁴Mor zeituni bende nyaka uket tenge achiel kuom mia achiel muyudo kuom olemo ma yiendu onyago. Nyaka upim morno gi rapim miluongo ni kor.

¹⁵To bende kuom rombe mia ariyo nyaka uchiw rombo achiel. Gigo ema unukel mondo obed chiwo mitimogo misengni mag cham gi misengni miwang’o pep, kod mago mag sawo, mondo richou owenu. An Ruoth nyasaye ema agolo chik kamano.

¹⁶“Jopinyu duto nyaka ter chiwogo ir ruoth marito piny Israel.

¹⁷En ema nobed kochiwo jamni mitimogo misengni mag cham kod mago miolo piny, ni oganda duto mar Israel e sewni duto, koda ka sewni mitimo ka due opor, kod mitimo ndalo Sabato. Bende en ema nobed kochiwo misengni mag golo richo kod misengni mag cham gi mago miwang’o pep kod mag sawo mondo opwodhgo richo mag jo-Israel.”

¹⁸Ruoth Nyasaye nowacho niya, “Chieng’ mokwongo mar due mar achiel nyaka utim misango gi rwath maonge songa, mondo upwodhgo Hekalu.

¹⁹Jodolo nyaka kaw remo moko mag chiayo motimgo misango mar golo richo mondo owir e sirni mag dhood Hekalu, kod tunge ang’wen, mag kendo-mar-misango, kendo e sirni mag dhorangeye midonjogo e laru maiye.

²⁰Nyaka utim kamano bende chieng’ due abiriyo mar dueno, mondo upwodhgo richo ng’ato ang’ata ma oketho ka ok ong’eyo, kata moketho kobothne. Mano e yo ma unumigo Hekalu sik ka ler.

²¹ Chieng’ due apar gang’wen unuchak timo sawo mar Pasaka, kendo kuom ndalo abiriyo ng’ato ka ng’ato nyaka cham makati ma ok ketie thowi.

²²Chieng’ mokwongo mar sawo, ruoth marito piny nyak chiw rwath ka misango migologo richone owuon kaachiel gi richo mag ji mamoko duto.

²³To odiechieng’ kodiechieng’ mar ndalo abiriyo mag sawogo, nyaka ochiw ni Ruoth Nyasaye ruedhi abiriyo kod imbe abiriyo maonge songa, ka misango miwang’o pep. Bende nyaka ochiw nywok odiecheng’ kodiechieng’ ka misango mar golo richo.

²⁴Nyaka chiw debe mar cham gi lita ang’wen mag mor zeituni kuom rwath ka rwath kod im ka im motimgo misango.

²⁵ “Kuom Sawo Maduong’ machakore chieng’ due apar gabich, due mar abiriyo, ruoth marito piny Israel nyaka tim misengni mag golo richo gi misengni miwang’o pep pilepile kuom ndalo abiriyo, mana machalre gi mago mitimo e Sap Pasaka, kendo bende nyaka bed maromre gi mago michiwo e Sap Pasaka.”