Read luo Ezekiel 46 Bible Online

Ezekiel 46 - luo bible

Ezekiel 46

¹Ruoth Nyasaye nowacho niya, “Dhorangach ma yo wuokchieng’ midonjogo e laru maiye nyaka bed kolor kuom ndalo achiel ma ji tiyoe, to nyaka yawe chieng’ Sabato ka Sabato, kod ndalo ka ndalo ma due oporie.

²Ruoth marito piny nyaka wuog e laru maoko mi dhi e ot maduong’ manie dhorangach ma yo wuokchieng’no, mi ochung’ e bath sirni mag dhorangajno, ka jodolo timone misengni miwang’o pep, kod misengni mag sawo. Nyaka olem e dhorangach kanyo, eka bang’e owuog oko. To dhorangach kik lor nyaka odhiambo.

³Chieng’ Sabato ka Sabato, kendo ndalo ka ndalo ma due opor, ji duto nyaka kulre mondo olam Ruoth Nyasaye e nyim dhorangajno.

⁴Chieng’ Sabato, ruoth morito piny nyaka kel ni Ruoth Nyasaye nyirombe auchiel gi im auchiel, duto maonge songa, kaka misango miwang’o pep.

⁵Im ka im nyaka okel gi cham moromo debe achiel, obed misango mar cham mitimego, to kuom nyarombo ka nyarombo onyalo chiwoe cham mang’eny kaka en ema ohero. To kuom debe ka debe mar misango mar cham nyaka ochiwe mor zeituni moromo lita ang’wen.

⁶Ka due opor, to nyaka ochiw nyarwath gi nyirombe auchiel kod im achiel, duto maonge songa.

⁷Misango mar cham nyaka bed moromo debe achiel kuom rwath ka rwath gi im ka im, to kuom nyarombo ka nyarombo, onyalo chiwoe cham mang’eny kaka en ema ohero. Kuom debe ka debe mar cham to nyaka ochiw mor zeituni moromo lita ang’wen.

⁸Ruoth marito piny nyaka wuog oko gi dhorangach koluwo ot maduong’, mana kaka ne otimo kodonjo.

⁹“E kinde ma ji obiro lamo Ruoth Nyasaye e sawo moro amora, to joma odonjo gi dhorangach ma yo nyandwat nyaka wuog gi dhorangach ma yo milambo, kendo jogo modonjo gi dhorangach ma yo milambo, nyaka wuog gi dhorangach ma yo nyandwat. Onge ng’ama onego owuog gi dhorangach modonjogo, to ng’ato ka ng’ato nyaka wuog mana gi dhorangach momanyore gi mane odonjogo.

¹⁰Ruoth marito piny bende nyaka donji mana kaka ji mamoko donjo, kendo wuogi mana kaka giwuok.

¹¹E ndalo mag sewni to misango mar cham nyaka bed debe achiel kuom rwath ka rwath, kata kuom im ka im, to kuom nyarombo ka nyarombo, jalemo nyalo chiwoe cham mang’eny kaka en ema ohero. Kuom debe ka debe mar cham to nyaka chiwie mor zeituni moromo lita ang’wen.

¹²“Ka ruoth marito piny dwaro timo ni Ruoth Nyasaye misango kuom herone owuon, bed ni en misango miwang’o pep, kata misango mar sawo, to dhorangach ma yo wuokchieng’ midonjogo e laru maiye nyaka yawne. Nyaka otim misango mana kaka otimo misango chieng’ Sabato, to ka osewuok, to dhorangach nyaka lor.

¹³“Okinyi ka okinyi nyarombo maonge songa ma hike achiel nyaka chiw ni Ruoth Nyasaye. Misangono nyaka tim pilepile.

¹⁴Bende misango mar mogo moromo kilo ariyo nyaka tim okinyi kokinyi, kendo nyaka chiwe gi mor zeituni moromo lita achiel, midwalego. Chike mag misango mitimo ni Ruoth Nyasaye nyaka sik mochwere.

¹⁵Nyarombo gi mogo kod mor zeitunigo nyaka chiw ni Ruoth Nyasaye okinyi kokinyi nyaka chieng’.”

¹⁶Ruoth Nyasaye ogolo chik niya, “Ka ruoth marito piny omiyo wuode moro lowo moro amora kaka chiwo, to lowono nobed mar wuodeno chuth, kaka mwandu moyudo kuom wuon mare.

¹⁷ To ka ruoth ochiwo lope moro ni ng’ato matiyone, to lowono nochak odog ni ruoth ka higa miweyoe ji thuolo ochopo. En lope owuon, omiyo en kod yawuote kende ema ginyalo bet kode nyaka chieng’.

¹⁸To ruoth marito piny moro kik thir joge kamayogi mwandu moro amora, to nyaka opog ni yawuote lowo kuom lowo mopogne, mondo kik othir joga komayogi lopgi.”

¹⁹Ng’atno nokawa motera e dhoot midonjogo e udi man yo rangach ma yo milambo mar laru maiye. Udigo ne udi maler, mowal ni jodolo. Ne osiemo kamoro yo podhochieng’ mar udigo,

²⁰mowacho niya, “Mano e kama jodolo onego ochwakie ring’o ma gitimogo misengni mag golo richo kod mago mipwodhogo ketho mag gowi, kendo kanyo ema gitedoe misengni mag cham. Kamano onge gimoro maler ma diter e laru maoko, kuma gino nyalo miyoe ji hinyruok!”

²¹Bang’e ne otera e laru maoko mi onyisa laru matin e kona ka kona mar laruno,

²²ma borne mita piero ariyo, to lachne mita apar gabich.

²³Moro ka moro ne nigi ohinga mar kite molwore, kod kite mag tedo moger komakore gi ohinga.

²⁴Ng’atno nomedo nyisa niya, “Magi e kuonde tedo ma jotich Hekalu onego ochwakie misengni ma ji chiwo.”