Read luo Ezekiel 47 Bible Online

Ezekiel 47 - luo bible

Ezekiel 47

¹ Ng’atno nochako odwoka e dho Hekalu mi aneno pi kawuok gie bwo dhoodno, ka mol kochomo yo wuokchieng’, koma Hekalu bende ochomo. Ne omol koridore mwalo, kokadho yo nyandwat mar kendo mar misango.

²Bang’e ng’atno nogola oko mar Hekalu gie dhorangach ma yo nyandwat, mi otera oko nyaka e rangach ma yo wuokchieng’. Kuno to nanenoe aora matin mamol kawuok e bath rangajno gi yo milambo.

³Ng’atno nochomo yo wuokchieng’, koting’o tol mipimogo. Nowuotho e bath aora nyaka koma oromo mita mia abich. Eka nomiyo ayoro aorano kanyo, manwang’o ni pi ochopo mana e ombong’na.

⁴Ne ochako opimo kama oromo mita mia abich. Eka nomiyo ayoro kanyo kendo, to koro ne ochopo e chonga. Bang’ mano ne ochako opimo mita mia abich, mi kane ochako omiyo ayoro pigno, to ne otundo e nungona.

⁵Ne ochako opimo mita mia abich, to koro aora nodoko matut mane ok anyal yoro, mak mana ka agoyo abal.

⁶Ng’atno nowachona niya, “Wuod dhano, donge iseneno gima atimonino? Make maber!” Eka nogola e pi, modwoka e geng aora,

⁷to kane wachopo kanyo, ne aneno yien mang’eny e bath aora koni gi koni.

⁸Ng’atno nowachona niya, “Aorani mol kochomo yo wuokchieng’, kendo omol e holo mar aora Jordan, nyaka e Nam Kado. To kotundo e Nam Kado kuno, to pi namno nodok maliw.

⁹Kamoro amora ma aorani molie, kit le duto kod rech ng’enyie. Adier, aorani nomi pi Nam Kado bed maliw, kendo kamoro amora momolie, nokelie ngima.

¹⁰Jolupo nobed ka moyo tondegi e geng nam, chakre Engedi nyaka Eneglaim. Kit rech mang’eny mopogore opogore machalo mago manie Nam Mediterenia noyudre kuno.

¹¹To pi man kuonde motimo siany kod degni manie bath namno ok nolokre maliw. Ginisik mana kaka gichalo, mondo gibed kuonde ma ji yudoe bala.

¹² E bath aora koni gi koni kit yien duto ma olembegi ichamo nodongie. Obokegi ok notwo, bende ok giniwe mak ginyago olemo, to ginibed ka ginyak due ka due, nikech pi ma giyudo mol ka wuok e Hekalu. Olemb yien-go ema ji nocham, to obokegi nothiedhruokgo.”

¹³Ruoth Nyasaye nowacho niya, “Tong’ mag piny midwaro pogo e kind dhout Israel apar gariyo, ka joka Josef to yudo diriyo moloyo dhoudi mamoko, e magi:

¹⁴Ne akuong’ora ni kwereu, kating’o bada, ni anamigi pinyni. Omiyo koro pogreuru maromre.

¹⁵“Tong’ ma yo nyandwat noring kochomo yo wuokchieng’, chakre Nam Mediterenia nyaka dala mar Hethlon, kendo nyaka kama idonjogo Hamath. Eka nodhi nyime nyaka dala mar Zedad,

¹⁶gi dala mar Berotha kod Sibraim manie kind piny Damaski gi piny Hamath, mi otund nyaka dala mar Tikon manie tong’ piny Hauran.

¹⁷Kamano tong’ ma yo nyandwat nobed koa e Nam Mediterenia kochomo yo wuokchieng’ nyaka dala mar Enon ka ogoyo tong’ gi pinje mag Damaski gi Hamath, man yo nyandwat.

¹⁸“Tong’ ma yo wuokchieng’ noring koa dala moro manie kind piny Damaski gi piny Hauran, kochomo yo milambo. Bang’ mano, aora Jordan nobed tong’ mopogo kind piny Israel yo podho chieng’, kod piny Gilead, yo wuokchieng’, nyaka Dala Othidhe man e bath Nam Kado.

¹⁹“Tong’ ma yo milambo nochom yo milambo ma podhochieng’, chakre Dala Othidhe nyaka sokni mag Meriba-kadesh. Eka bang’e nochom yo nyandwat ma podhochieng’, koluwo aora manie tong’ piny Misri, nyaka Nam Mediterenia.

²⁰“Nam Mediterenia ema nobed tong’ ma yo podhochieng’, kendo noring kochomo yo nyandwat nyaka moro man yo podhochieng’ mar kama idonjogo Hamath.

²¹“Mano e piny ma nyaka upogru gi ombulu e kind dhout Israel,

²²mondo obed mwandugi mosiko. Jopinje mamoko modak kuomu, kendo mosenywolo nyithindgi e pinyu, bende nyaka yud lowo ka upogo piny. Nyaka kwan gi ka jo-Israel hie.

²³Jo-pinje mamoko duto nyaka yud lopgi machalre gi dhoot ma gidak kuomgi. An Ruoth Nyasaye ema awacho kamano.”