Read luo Ezekiel 48 Bible Online

Ezekiel 48 - luo bible

Ezekiel 48

¹Tong’ piny ma yo nyandwat noring koa e Nam Mediterenia, kochiko yo wuokchieng’ nyaka dala mar Hethlon, kendo nyaka kama idonjogo Hamath, nyaka dala mar Enon, mochomo e tong’ manie kind piny Damaski gi piny Hamath. Lowo mopog ni dhoot ka dhoot onego chakre e tong’ man yo wuokchieng’ nyaka tong’ man yo podhochieng’. Dhood Dan ema noyud lopgi yo nyandwat tung’ mogik.

²To lop dhood Asher ema nobed yo milambo mar lop Dan.

³Bang’ Asher to lop dhood Naftali ema nobedie.

⁴Eka lop joka Manase nobed kaluwo lop Naftali.

⁵Bang’ lop Manase, to lop joka Efraim ema nobedie.

⁶Eka lop dhood Reuben

⁷gi lop dhood Juda nobed kaluwore kamano.

⁸To yo milambo mar lop Juda lowo mowal ni Nyasaye nobedie. Enochakre e tung’ piny ma yo wuokchieng’ nyaka yo podhochieng’, kendo borne nobed kilomita apar gariyo gi nus, mana machalre gi lowo mopog ni dhoudi duto. E dier lowono tir e kama nogerie Hekalu.

⁹Bor mar lowo mowal ni Ruoth Nyasaye nyaka bed kilomita apar gariyo gi nus, to lachne kilomita apar.

¹⁰Jodolo nyaka yud pok kuom lowo mowalno. Bethene ma yo nyandwat gi ma yo milambo nobed kilomita apar gariyo gi nus, maromre, to bethene ma yo wuokchieng’ nobed kilomita abich abich. Hekalu mar Ruoth Nyasaye to nyaka bed e dier lowono.

¹¹Lowono nobed mar jodolo ma nyikwa Zadok. Ne gitiyona maber, mi ok giriwore gi jo-Israel mamoko kuom timo richo kaka jo-Lawi mamoko notimo.

¹²Kuom mano nyaka gibed gi kargi giwegi e bath jo-Lawi mamoko, kendo kanyo nobed kama lerie moloyo.

¹³Jo-Lawi nyaka yud lowo ma borne kilomita apar gariyo gi nus, to lachne kilomita abich, e bath lop jodolo.

¹⁴Lowo ma owal ni Ruoth Nyasaye e lowo maberie moloyo lowo duto, kendo onge kamoro amora kuome ma inyalo ng’iewo, kata wilo kata miyo ng’at moro machielo. Oler, kendo owale ni Ruoth Nyasaye.

¹⁵Bath lowono koma odong’, ma borne romo kilomita apar gariyo gi nus, ok nobed kama ler, to en kama ji duto nyalo konyorego kaka ohero. Ginyalo dak kuno, mi giti gi lowono kaka gidwaro, to dala nyaka bed e diere tir.

¹⁶Bor gi lach mar dala nyaka bed kilomita alufu ariyo gi mia ariyo gi piero abich maromre koni gi koni.

¹⁷Alwora mar dalano koni gi koni e bethene duto nobedie kama odong’ nono, ma ariwa mare oromo mita mia achiel gi piero ariyo gabich.

¹⁸Ka oseger dalano, to lowo modong’, moromo kilomita abich yo wuokchieng’ kendo kilomita abich yo podhochieng’ ma omanyore gi kama ler to nobed puothe ma joma odak e dalano puro. Ng’ato ang’ata matiyo e dala kanyo, nyalo puro lowono, ka ok odew dhoot ma aoye.

²⁰Lowo ma owal ni Nyasayeno duto nyaka bed kilomita apar gariyo gi nus koni gi koni maromre, kendo kama dala nitie nobed e iye.

²¹Ka gweng’ mowal ni Ruoth Nyasaye, kod lowo mowe ni dala, ma lachne gi borne kilomita apar gariyo gi nus maromre osekaw, to lowo duto modong’ e bath lowo mowalno koni gi koni, nobed mar ruodh piny. Bathe ma yo podhochieng’ nodhi nyaka Nam Mediterenia, to bathe ma yo wuokchieng’’ nodhi nyaka tong’ piny Israel. Hekalu gi lowo mowal ni Ruoth Nyasaye, gi mano nomi jo-Lawi,

²²kod kama dala nitie nobed e kind lope ruodhigo. Lowono duto ni e kind lowo mopog ni dhood Juda yo nyandwat, kod mopog ni dhood Benjamin, yo milambo.

²³Yo milambo mar lowono ema dhoudi modong’ noyudie lopgi, chakre tong’ ma yo wuokchieng’ nyaka tong’ ma yo podhochieng’. Dhood Benjamin ema noyud lowo momakore gi lowono,

²⁴to lop dhood Simeon ema nobed yo milambo mar lop Benjamin.

²⁵Bang’ lop Simeon, to lop dhood Isakar ema nobedie.

²⁶Eka lop dhood Zebulun nobed kaluwo lop Isakar,

²⁷to dhood Gad ema noyud lowo tung’ mogik.

²⁸Yo milambo mar lowo mopog ni dhood Gad, tong’ piny Israel nochakre e Dala Othidhe kochomo yo milambo ma podhochieng’, nyaka sokni mag Meriba-kadesh. Eka bang’e nochom yo nyandwat ma podhochieng’ koluwo aora manie tong’ piny Misri nyaka Nam Mediterenia.

²⁹Ruoth Nyasaye nowacho niya, “Mano e kaka piny onego opogi ni dhout Israel, mondo obed mwandugi mosiko.”

³⁰ Dalano nobed gi dhorangeye apar gariyo. Bor mar bath ohinga ka bath ohinga nobed mita alufu ariyo gi mia ariyo kod piero abich, kendo nobed gi dhorangeye adek mochak dhoudi adek mag Israel.

³¹Dhorangeye mae bath ohinga ma yo nyandwat nochakk Reuben gi Juda kod Lawi,

³²to mae bath ohinga ma yo wuokchieng’ nochak Josef gi Benjamin kod Dan.

³³Dhorangeye mae bath ohinga ma yo milambo nochak Simeon gi Isakar kod Zebulun,

³⁴to mae bathe ma yo podhochieng’ nochak Gad gi Asher kod Naftali.

³⁵Kamano bor ohingano duto nobed mita alufu ochiko. To nying dalano mosiko nobed, ‘Ruoth Nyasaye ni ka.’