Read luo Ezekiel 6 Bible Online

Ezekiel 6 - luo bible

Ezekiel 6

¹Ruoth Nyasaye nowacho kama:

²“Wuod dhano, rang gode mag Israel, mondo inyisgi wachna niya,

³‘Un gode mag Israel, chikuru itu, uwinj weche ma an Ruoth Nyasaye ema awachonu. Anyisou, un gode madongo gi matindo kod hohni gi holni ni akelo lweny kuomu, mabiro ketho kuonde ma ji lamoe nyiseche manono.

⁴Kendeu mag misango ibiro jwang’o, kendo gik ma iwang’oe ubani ibiro turo, mi ji duto man kuondego noneg mana e nyim nyisechegi manonogo.

⁵Anabol ringre jo-Israel moketho e nyim nyisechegi manono, kendo anake chokegi kuonde duto ma gitimoe misango.

⁶Mier madongo duto mag Israel nomuki, kendo kuonde moting’ore ma gilamoe nyiseche manono bende nokethi, mondo kendegi gi nyisechegi manono oketh matindotindo, kaachiel gi gik ma giwang’oe ubani, kendo gik moko duto mane giloso nolal nono.

⁷Ka jou ma otony oneno kinego ji kuomgi kamano to gining’e ni an e Ruoth Nyasaye.’

⁸“Anawe jomoko otony mak onegi, mi nakegi e pinje mamoko.

⁹To ginipara kuonde motergie e tuechgo mi ging’e ni ne asekumogi mana ni mondo wigi okuodi, nikech chunygi marach oseweya, mi gihero nyiseche manono moloya Ginichare kendgi nikech timbe maricho kendo makuodo wichh ma gisetimo.

¹⁰Kamano gining’e ni an e Ruoth Nyasaye, kendo ni siem mane asiemogigo ne ok mar oyuma!”

¹¹Ruoth Nyasaye wacho niya, “Chwaduru lwetu kedo gouru tiendu piny kuywak malit nikech timbe makuero kod gik mamono duto ma jo-Israel osetimo. Kech gi tuoche biro negogi, kendo gibiro tho e lweny.

¹²Joma ni kuonde maboyo, tuo ema noneg, to man machiegni notho e lweny. Mago modong’ to kech ema nonegi. Kamano anakumgi gi mirimba mager.

¹³Bang’e ringre joma otho noriere e kind nyisechegi manono, but kendegi mag misango, ewi gode matindo gi madongo, kendo e bwo yien duto motimo otiep, ma tiende ni kuonde duto mane giwang’oe ubani mang’ue ng’ar ni nyisechegi. Eka ng’ato ka ng’ato nong’e ni an e Ruoth Nyasaye.

¹⁴Adier, anarie bada kuomgi mi aketh pinygi ka aloke thim, chakre piny motwo ma yo milambo, nyaka dala mar Ribla man yo nyandwat, ma ok aweyo kamoro ma jo-Israel odakie mak aketho. Bang’e ji duto nong’e ni kara an e Ruoth Nyasaye.”