Read luo Ezekiel 7 Bible Online

Ezekiel 7 - luo bible

Ezekiel 7

¹Ruoth Nyasaye nowachona niya,

²“Wuod dhano, ma e gima an Ruoth Nyasaye awacho ni piny Israel: Giko mar pinyu ochopo!

³Un jo-Israel, giko osechopo, mabiro kumoue gi mirimba mager kuom gik ma usetimo. Abiro chulou maromre gi timbeu makuero,

⁴ka ok akechou kata ka ok ang’wononu. To anakumu kuom timbe modwanyore musetimo, eka unung’e ni kara an e Ruoth Nyasaye.

⁵“An Ruoth Nyasaye awacho kama: Koro masiche mang’eny biro makou.

⁶Gik moko duto orumo! Giko osechopo! Adier, osepoyou, mi urumo!

⁷Masira osebironu un joma odak e pinyni. Kinde mar mor muyudo kuondeu moting’ore mag lemo ema orumo, to nditi kende ema nitie.

⁸Piyopiyo nono abiro olo kuomu mirimba duto mager. Anang’adnu bura mana maromre gi timbeu, mi akumu kuom gik makuero duto musetimo.

⁹Ok anakechu kata ok anang’uonnu, to anakumu kuom timbe makuero musetimo. Eka unung’e ni an e Ruoth Nyasaye ma jakum ji.

¹⁰“Odiechieng’ masiche osechopo! Sunga gi timbe ma ok ni kare osemedore.

¹¹Timbe mahundu bende osemedore marach, to onge joricho mabiro dong’. Mwandugi kod duong’gi bende biro rumo.

¹²Kindeno biro! Adier, ndalono sudo machiegni! Jong’iewo gi joloko ok onego obed mamor, bende ok onego giywagre, nikech mirimb Nyasaye ni kuomgi giduto.

¹³Joloko ok nochak oyud gik ma giseloko. Osekor wach marach kuomgi, kendo wachno ok nolokre! Joma timbegi mono ok nyal dak!”

¹⁴Tung’ ywak, kendo ji duto ikore, to onge ng’ama dhi e lweny, nikech mirimb Ruoth Nyasaye biro lwar kuom ji duto machalre.

¹⁵Lweny gore oko, to tuo kod kech nie mier. Ng’ato ka ng’ato man oko biro tho e lweny. Joma nie mier to tuo gi kech biro nego.

¹⁶Kata ka moko notony mi dhi e gode, ka akuche maluor, to ginitho kuro nikech richogi.

¹⁷Lwet ji duto nowengni, kendo chongegi nokirni.

¹⁸Ginirwak piende gugru, kendo kibaji nogogi marach. Wigi noliel, mi giduto giyud wichkuot.

¹⁹Giniwit dhahapgi kod fethgi e wang’yore, mana ka yugi, nikech dhahabu kata fedha ok nokonygi chieng’ mirimb Nyasaye. Adier, mwandugo ok nonegnigi kech, bende ok noyieng’gi, nimar mwandugo ema ne oterogi e richo.

²⁰Ne gisungore gi kite ma nengogi tek, mane gilosogo nyiseche manono makuero. Mano ema omiyo Ruoth Nyasaye nomiyo mwandugi othing’ogi.

²¹Ruoth Nyasaye nowacho niya, “Abiro miyo jopinje mamoko yakgi, mi joma timbegi richo maketho chik nomagi mwandugi duto, mi dwany.

²²Kata ka jomecho odonjo e Hekalu mara mahero, modwanyo mi obet mogak, to ok anatim gimoro.

²³“Losuru ni joga nyoroche, nikech nek opong’o piny, kendo mier otimo mahundu lilo.

²⁴Omiyo abiro kelo ogendini marichoe moloyo mondo okaw miechu. Abiro tieko sunga jou marateke, mi ami ogendini keth kuondeu mag lemo.

²⁵Kibaji biro goyou mi unumany kue, to ok unuyudi.

²⁶Masiche mathoth nomaku, kendo weche maricho kende ema unuwinji. Unugomb jonabi mondo onyisu gik mabiro timore, to ok unuyudi. Jodolo bende ok nobed gi gima gipuonjo ji.

²⁷Ruoth noywagi, kendo jotelo chunygi nonyosre. Ji duto kihondko nomaki mi tetni. Anakumu mana maromre gi gik moko duto ma usetimo, kendo anang’adnu bura mana kaka useng’ado ni joma moko. Kamano unung’e ni an e Ruoth Nyasaye.”