Read luo Ezekiel 8 Bible Online

Ezekiel 8 - luo bible

Ezekiel 8

¹Chieng’ due abich, due mar auchiel, e higa mar auchiel koseterwa e tuech, ne oyudo abet e oda gi jodong Juda kapenjo Nyasaye wach. Ne apo ka teko mar Ruoth Nyasaye obiro kuoma.

² Ne ating’o wang’a, mi aneno gima chalo gi dhano. Chakre e nungone kadok piny ne otimo mach, to chakre e nungone kadok malo ne mil ka mula moywe.

³Ne orieyo gima chalo gi lwedo, mi omaka gi yie wiya. E fwenyno. Roho noting’a malo e kor polo, mi otera Jerusalem, moketa piny e dhoranga laru maiye mar Hekalu mochomo yo nyandwat, kuma nitie nyasaye manono ma Nyasaye mon-go.

⁴ Ne aneno duong’ maler mar Nyasach Israel kanyo, mana kaka ne asenene e fweny mane aneno e holo cha.

⁵Ruoth Nyasaye nowachona niya, “Wuod dhano, rang yo nyandwat.” Ne arango kuno, mi aneno nyasaye manono ma Ruoth Nyasaye mon-go, kobet yo nyandwat mar kendo-mar-misango manie dhorangach.

⁶Ruoth Nyasaye nomedo wachona niya, “Wuod dhano, bende ineno gik makuero ma jo-Israel timo mondo oriemba adhi mabor gi Hekalu mara? To pod ibiro mana neno gik maricho moloyo mago!”

⁷Ne otera e dhoranga laru, mi onyisa kor ot kama otuchi.

⁸Ne owacho niya, “Wuod dhano, muk kor ot ka.” Ne amuke, mi apo ka ayudo dhoot.

⁹Nowachona ni, “Donji, ine gik makuero kendo modwanyore ma gitimo kanyo.”

¹⁰Kuom mano, nadonjo mi aneno ka kor udi ogorie gik mamol kod le mang’eny ma chik okwero, kaachiel gi nyiseche manono mamoko duto mane jo-Israel lamo.

¹¹Jodong Israel piero abiriyo ne ni kanyo, ka Jaazania wuod Shafan nie diergi. Moro ka moro noting’o gima iwang’oe ubani, ka ubani dum iro.

¹²Ruoth Nyasaye nopenja niya, “Wuod dhano, bende ineno gik ma jodong Israel timo kama opondo kae? Ng’ato ka ng’ato lemo mana e od nyasache manono. Giwuondore niya, ‘Ruoth Nyasaye ok newa! Osejwango pinyni.’ ”

¹³Bang’e Ruoth Nyasaye nowachona niya, “Pod ibiro neno kakaa gitimo gik modwanyore moloyo kata mago!”

¹⁴Eka ne otera e dhorangach man yo nyandwat, mi onyisa mon maywago nyasaye moro miluongo ni Tamuz.

¹⁵Ne openja niya, “Wuod dhano, bende ineno mano? To pod ibiro neno koda ka gik makuero maricho moloyo mano!”

¹⁶Eka ne otera e laru maiye mar Hekalu, kuma ne nitie ji piero ariyo gabich but dhoranga Hekalu, e kind kendo-mar-misango gi kama ikadhoe. Ne giseloko dieng’egi ni Kama Ler, ka gikulore koma ochomo yo wuok chieng’, kendo gilamo chieng’ mawuok gokinyi.

¹⁷Ruoth Nyasaye nopenja niya, “Wuod dhano, donge ineno mano? Timbe makuero ma isenenogo pok oromo jo-Judagi koso, ma pod gimedoe mana pong’o piny gi timbe mahunduni, ka gimedo miyago mirima? Neye kaka giyanya marach moloyo!

¹⁸Abiro kumogi gi mirimba mager, ka ok ang’wononigi, kata ka ok akechogi. Kata da bed ni gilama matek manade, to ok anadewgi.”