Read luo Ezekiel 9 Bible Online

Ezekiel 9 - luo bible

Ezekiel 9

¹Bang’e ne awinjo Nyasaye ka kok niya, “Un joma dhi kumo Jerusalem, biuru kaeri kuting’o gi lwenjeu.”

²Piyopiyo nono, ji auchiel nothinyre e dhorangach maoko mar Hekalu mochomo yo nyandwat, ka ng’ato ka ng’ato oting’o gi lweny. Kuomgi kanyo ne nitie ng’ato morwako lewni mabeyo, kendo oting’o kalam gi kalatas. Giduto ne gibiro, mi gichung’ but kendo-mar-misango mar mula.

³Eka duong’ maler mar Nyasach Israel nodum moa kuom malaika miluongo ni kerubi, mi odhi e dhood Hekalu. Ruoth Nyasaye noluongo ng’at mane orwako lewni mabeyo cha,

⁴ mowachone niya, “Dhiyo, iwuothi e Jerusalem duto, iket kido e lela wang’ ng’ato ka ng’ato ma chunye lit kendo maywagore nikech gik moko duto makuero matimore e dalani.”

⁵To bende ne awinjo ka Nyasaye wacho ni ji auchiel ka niya, “Luwuru bang’ ng’atno kamoro amora modhiye e dala duto, kendo neguru ji, kik uwe kata ng’at achiel, bende kik ukechgi.

⁶Neguru joma dongo gi joma tindo, chwo gi mon, mine gi nyithindo, to kik umul ng’ato ang’ata man gi kido e lela wang’e. To chakuru timo kamano mana gie Hekalu mara.” Omiyo ne gichako mana gi jodongo mane ochung’ e Hekalu.

⁷Bang’e Nyasaye nowachonigi niya, “Dwanyuru Hekalu mondo obed mogak, kudhuro ringre joma otho e lerni mage. Koro wuoguru uchak tich.” Kamano ne giwuok mi gichako nego ji e dala mar Jerusalem.

⁸To kane oyudo ginego ji kamano, ne adong’ kanyo kenda, mi apodho piny auma, ka aywak niya, “A Ruoth Nyasaye, bende ditiek jo-Israel duto modong’, kikumo Jerusalem gi mirimbi mager?”

⁹Nyasaye nodwoka niya, “Jo-Israel kod jo-Juda josetimo richo madongo ahinya. Gisenego ji mathoth e pinyni, mi gipong’o Jerusalem gi timbe maricho. Giwacho niya, ‘Ruoth Nyasaye osejwang’o pinywani. Ok onewa!’

¹⁰Omiyo koro ok anawe ng’ato kata achiel, bende ok anakechgi.”

¹¹Bang’e ng’at mane orwako lewni mabeyo cha ne oduongo ir Ruoth Nyasaye, mowacho niya, “Asetimo gik moko duto mane ichika.”