Read luo Daniel 1 Bible Online

Daniel 1 - luo bible

Daniel 1

¹ E higa mar adek mar loch Jehoyakim ruodh Juda, Nebukadnezar ruodh Babulon nobiro molworo jerusalem mondo okaw.

² Ruoth Nyasaye nochiwo Jehoyakim e lwet Nebukadnezar, kaachiel gi gik lemo moko mane pod odong’ ei Hekalu, Jerusalem. Ruoth Nebukadnezar nokawogi, moterogi Babulon ei hekalu mar nyisechene, mi okano gik Hekalu mane oyakogo e od kenone.

³Bang’e nogolo chik ni Ashpenaz mane jatelo maduong’ mondo oyier yawuot joka ruodh Israel gi mag jotend Israel.

⁴Yawuowigo ne nyaka bed joma nigi chia maber ma onge gi songa moro e dendgi, kendo mariek motiegore moromo tiyo e od ruoth. Ashpenaz ne nyaka puonjgi ndiko kendo somo dho Babulon.

⁵Bende ruoth nogolo chik ni nyaka mi yawuowigo chiemo gi divai pile mana kaka imiyo jood ruoth mamoko. Ne onego gitiegre kuom higni adek, eka bang’e ne ginyalo tiyo ni ruoth.

⁶Kuom joma ne oyiergo ne nitie yawuot jo-Juda ma nyinggi Daniel gi Hanania gi Mishael kod Azaria.

⁷To jatelo maduong’ nochakogi nying manyien. Daniel nochako ni Bethshazar, to Hanania ni Shadrak; Mishael to nochako ni Meshak, kendo Azaria ni Abednego.

⁸Daniel ne oparo ni ok onego obed mogak kuom chamo chiemo kendo madho divai mane ibiro miyogi kaa e od ruoth. Omiyo ne okwayo Ashpenaz ma jatelo maduong’ mondo kik ochune chamo gigo.

⁹Nyasaye nomiyo Ashpenaz okecho Daniel, kendo obedone mang’won.

¹⁰To kata kamano nowacho ni Daniel niya, “Aluoro ruodha, nikech en ema osegolo chik konyiso gik monego ucham kendo umadhi, to kapo ni oneno ni in dendi ok ber ka dend yawuowi mamokogo, to onyalo nega.”

¹¹Mano omiyo Daniel nodhi ir jarit mane Ashpenaz oketo mondo orite kaachiel gi jowetene adek ka.

¹²Nowachone niya, “Kiyie, to miwa mana alot wacham, gi pi wamodhi kuom ndalo apar.

¹³Bang’ mano to mondo ing’iwa ane gi yawuowi mamoko machamo chiemb od ruoth, mondo ine ane joma oloyo jowadgi gi del maber.”

¹⁴Jaritno noyie ni mondo gitim ane kamano kuom ndalo apar.

¹⁵To kane ndalogo orumo, ne ginenore machwe kendo man gi teko moloyo yawuowi mane chamo chiemb od ruoth.

¹⁶Mano omiyo jarit ne ok omiyogi chiemb od ruoth, to nomiyogi mana alot.

¹⁷Nyasaye ne omiyo yawuowi ang’wen-go rieko mar kitabu kod rieko moro amora. To bende nomiyo Daniel rieko mar loko tiend fweny kod lek duto.

¹⁸Kane higni adek mane ruoth Nebukadnezar oketo oserumo, Ashpenaz notero yawuowigo duto e nyime.

¹⁹Ruoth nowuoyo kodgi duto, mi oyudo ni Daniel gi Hanania gi Mishael kod Azaria riek moloyo yawuowi mamokogo duto. Kuom mano ne gidonjo e tich ruoth.

²⁰E kinde akinda mane ruoth openjoe wach moro, kata mane okeloe gimoro matek manade, to ne oyudo ni yawuowi ang’wen-go ong’eyo wachno nyadipar moloyo johul wach kata ajuoke duto mae pinye.

²¹Daniel nobet kuno nyaka higa mokwongo mar loch Kuros ruodh Babulon.