Read luo Daniel 10 Bible Online

Daniel 10 - luo bible

Daniel 10

¹E higa mar adek mar loch Kuros ruodh Persia, wach nofwenyore ni Daniel, ma bende niluongo ni Belteshazar. Kata obedo ni wachno ne en wach ma adier, to winjo tiende ne ok yot. Kata kamano ne onyise tiende e yor fweny.

²E kindeno, an Daniel, ne ayudo ka asebedo ka asando ringra kuom jumbe adek,

³ka ok acham chiemo mabeyo, kendo ring’o kata divai ne ok amul. Bende ne ok awir denda gi mo kuom ndalogo duto.

⁴Chieng’ due piero ariyo gang’wen due mokwongo e higano, ne aneno ni achung’ e bath aora maduong’, tiende ni aora Tigris.

⁵ Ne ating’o wang’a mi aneno ng’at morwako law maber, kendo otueyo okanda mar dhahabu.

⁶Dende ne ng’ang’ni ka kidi ma nengone tek. Pat wang’e ne rieny mana ka mil polo, kendo wang’e ne liel ka mach. Bedene gi tiendene bende ne rieny ka mula moyue, kendo duonde ne wuo ka koko mar ji mang’eny.

⁷An Daniel kenda ema ne aneno fwenyno, to ji mamoko mane wan go ne ok oneno gimoro. Kata kamano ne gibwok ahinya, mi giringo gipondo.

⁸Ne adong’ kenda kanyo ka arango fweny malichno. Teko norumona kendo denda nolokore maonge ng’ama ne nyalo ng’eya.

⁹Ne awinjo ka ng’atno wuoyo, mi apodho piny ka rieko olalna, kendo ka wiya ochomo piny.

¹⁰Bang’e ne awinjo ka ng’ato maka, kendo keta piny gi chongena kod luetena, to denda kirni.

¹¹Ne owachona niya, “Daniel in ng’at ma Nyasaye ohero ahinya. A malo mondo ichik iti iwinj gima adwaro wacho, nimar oseora iri.” Kane osewachona kamano, ne aa malo ka pod denda kirni.

¹²Eka ne ochako owachona niya, “Daniel, kik iluor, nikech Nyasaye nowinjo lemoni mana chieng’ mane ikwongo ketoe chunyi, kisandori e nyime, omiyo koro asebiro mondo adwoki.

¹³ To malaika ma jarit piny Persia ne okedo koda kuom ndalo piero ariyo gachiel. Eka Mikael ma achiel kuom malaike madongo nobiro mondo okonya, nikech ne adong’ kenda e piny Persia kuno.

¹⁴Koro asebiro mondo anyisi gima biro timore ni jou e ndalo mabiro, nikech ma bende en fweny manyiso gik mabiro timore e ndalo mabiro.”

¹⁵Kane owuoyo koda kamano, to ne akulo wiya, ka dhoga omoko.

¹⁶Eka gimoro machalo gi dhano nomulo pien dhoga, mi achako wuoyo, ne awacho ni gima chalo dhano mane ochung’ e nyimano niya, “Jaduong’, fweny ma asenenoni ochwowo chunya, omiyo tekra orumo.

¹⁷Achalo gi misumba mochung’ e nyim ruodhe. Koro ere kaka dalos kodi, to aonge gi teko kata muya modong’ e denda?”

¹⁸Eka ne ochako omula kendo, mi awinjo ka ayudo teko.

¹⁹Nowachona niya, “Nyasaye oheri, omiyo kik chunyi parre kata kik iluor, to bed abeda gi chir.” Kane osewuoyo koda kamano, ne awinjo ka achako yudo teko moko, mi awachone niya, “Jaduong’ wachna gima idwaro nyisa nikech koro iseduogona teko.”

²⁰Eka ne openja niya, “Bende ing’eyo gima omiyoo asebiro iri?

²¹Asebiro mana ni mondo ahulni gima ondiki e kitap weche ma adiera. To koro onego adog mondo aked gi malaika ma jarit piny Persia. Bang’e malaika ma jarit piny Gris biro wuok, to onge ng’at manyalo konya mak mana Mikael ma malaika ma jarit piny Israel.