Read luo Daniel 3 Bible Online

Daniel 3 - luo bible

Daniel 3

¹Ruoth Nebukadnezar noloso kido mar dahabu ma borne mita piero adek, to lachne mita adek, mi ogolo chik mondo ochunge e paw Dura e gweng’ Babulon.

²Bang’e nochiko mondo jotelo madongo gi matindo duto mag pinye obi ochokre e rueko mar kido mane osechungono.

³Kamano jotelogo duto nochokore, mochung’ e nyim kidono.

⁴Eka jago milome nolando wach gi duol maduong’ niya, “Un ji duto mae piny ngima, bed ni ua e dhoot mane kata bed ni uwacho dhok mane,

⁵ka uwinjo tung’ gi thum nyatiti gi asili kod thumbe mamoko kaywak, to nyaka ukulru piny kendo ulam kido ma ruoth Nebukadnezar osechungo.

⁶To ng’ato ang’ata ma ok okulore piny kendo olemo, ibiro wit piyopiyo e mach makakni.”

⁷Kuom mano e sa mane giwinjoe thumbe ka ywak, ji duto mae piny, bed ni gia e dhoot mane, kata bed ni giwacho dhok mane, nokulore piny, molamo kido mar dhahabu mane ruoth Nebukadnezar ochungo.

⁸E ndalogo ema ne jo-Babulon moko oyudoe thuolo mar donjo ni jo-Yahudi.

⁹Ne giwacho ni ruoth Nebukadnezar niya, “Ruoth, mondo idag aming’a!

¹⁰Ne igolo chik ni e sa ma ji owinjoe ka thumbe ywak, to ng’ato ka ng’ato nyaka kulre piny mi lam kido mar dhahabu.

¹¹To ng’at ma ok okulore mi olame nyaka wit piyopiyo e mach makakni.

¹²To nitie jo-Yahudi moko ma nyinggi Shadrak gi Meshak kod Abednego mane iketo jotelo mag gweng’ Babulon. Ruoth, gin gitamore winjo chikni. Gisedagi lamo nyasachi kata kulruok ni kido mane ichungo.”

¹³Kane ruoth owinjo kamano, mirima mager nomake, mi ogolo chik mondo okel ji adekgo ire.

¹⁴Kane okelgi ire, nopenjogi niya, “Shadrak gi Meshak kod Abednego, bende en adier ni utamoru lamo nyasacha, kendo utamoru kuloru piny ni kido mar dhahabu ma asechungo?

¹⁵Koro sani ka uwinjo tung’ gi thum nyatiti gi asili kod thumbe mamoko ka ywak, to nyaka ukulru piny kendo ulam kidono. To kudagi timo kamano, to ibiro witu e mach makakni, piyopiyo ma ok odeko. Koso uparo ni nitie Nyasaye moro manyalo resou?”

¹⁶Shadrak gi Meshak kod Abednego ne jodwoke niya, “Ruoth wan to ok wabi temo mondo waresre.

¹⁷To kapo ni Nyasaye ma walamo nyalo resowa e mach kendo e tekoni, to kara obiro resowa.

¹⁸To kata ka ok oresowa, to onego ing’e malong’o ruoth ni ok wanyal lamo nyasachi, bende ok wanyal kulore piny ni kido mar dhahabu ma isechungo.”

¹⁹Eka mirima mager nomako Nebukadnezar, mi wang’e olokore remo ni Shadrak gi Meshak kod Abednego. Nochiko joge mondo ochwak mach obed maliet nyadibiriyo moloyo kaka ne oliet pile,

²⁰mi ogolo chik ni joge mag lweny marateke moloyoe mamoko mondo otue ji adekgo kendo owit e mach makaknino.

²¹Kamano ne gitueyogi mana ka girwakore gi lepgi duto kod kondegi, mi giwitogi e mach.

²²To nikech chik ruoth ne ger, kendo mach ne liet malich, omiyo joma ne oting’o Shadrak gi Meshak kod Abednego katero e mach ne jowang’, mi orumo pep.

²³To Shadrak gi Meshak kod Abednego ne joling’ore e chuny mach kotuegi kamano.

²⁴Eka Nebukadnezar nochung’ piyopiyo kobwok, mi openjo jong’adne rieko niya, “Donge ne watueyo ji adek, mi wanyumo e mach?” Ne gidwoke ni “Ee ruoth, ne watimo kamano.”

²⁵To nomedo penjogi niya, “Ka kamano, to ang’o momiyo aneno ji ang’wen kawuotho e mach, ka ok otue, to bende ok wang’? To ng’at mar ang’wen kuomgi chalo mana gi Nyasaye!”

²⁶Mano omiyo Nebukadnezar nodhi e dho mach, mi oluongo niya, “Shadrak gi Meshak kod Abednego, un jotich Nyasaye maduong’ moloyo, wuoguru!” Mi ne giwuok.

²⁷Jotelo duto mag ruoth kaachiel gi jong’adne rieko, nochokore mondo oneye joma ne mach otamore wang’ogo. Yie wigi ne ok orewore, kata lepgi ne ok owang’ to bende ne ok gidum much iro ka joma ne owuok e mach adier.

²⁸Nebukadnezar nowacho niya, “Pakuru Nyasach Shadrak gi Meshak kod Abednego! Nende ooro malaika mare moreso joma lame kendo mogeno kuomegi. Ne gidagi winjo chikna, mi giyie tho, kar kulruok piny mondo gilam nyasaye moro amora ma ok mana Nyasachgi.

²⁹Kuom mano, koro agolo chik ni, ng’ato ang’ata ma owuoyo marach kuom Nyasach Shadrak gi Meshak kod Abednego, to ibiro jak embene gi bedene, bed ni oa e oganda mane, kata dhoot mane, kata owacho dhok mane, kendo nolok ode gunda, nimar onge nyasaye moro amora manyalo reso ji kamano.”

³⁰Eka ruoth nomiyo Shadrak gi Meshak kod Abednego tije madongo moloyo e gweng’ Babulon.