Read luo Daniel 9 Bible Online

Daniel 9 - luo bible

Daniel 9

¹E higa mokwongo mar loch Darius wuod Ahazuerus ja-Media, mane ruodh piny Babulon,

² an Daniel, nasomo kitepe maler, ka adwaro ng’eyo tiend higni piero abiriyo mane Jerusalem biro bedogo gunda, kaka ne Ruoth Nyasaye owacho ni Jeremia.

³Bang’e ne alamo Ruoth Nyasaye matek, kaywakne kendo ka ariyo kech. Bende ne arwako pien gugru, kendo ne abuko wiya buru.

⁴Ne alamo Ruoth Nyasacha kendo ahulo richo mag jowa, ka awacho niya, “A Ruoth Nyasaye in e Nyasaye maduong’ kendo malich. Irito singruok mitimo gi joma oheri kendo marito chikeni, kendo iherogi gi hera mosiko.

⁵Waseketho, kendo wabedo joricho kwatimo marach. Wasedagi timo gima ne ichikowa ni mondo watim, mi waweyo chikeni gi bucheni.

⁶Wasetamore winjo jotichni ma jonabi mane owuoyo e nyingi ni ruodhiwa kendo ni jotendwa gi kwerewa kod oganda duto.

⁷In Ruoth Nyasaye pile isebedo kitimo gik makare, to wan jo-Juda gi jo-Jerusalem gi jo-Israel duto mane ikeyo e pinje machiegni gi maboyo nikech ne waweyi, ema wasebedo ka watimo timbe mag wichkuot.

⁸Ee, Ruoth Nyasaye, wan gi ruodhiwa gi jotendwa kod kwerewa wayudo wichkuot nikech wasetimo richo e nyimi.

⁹In ijang’wono kendo iweyo ni ji richogi, kata obedo ni wan wasepiem kodi.

¹⁰A Ruoth Nyasaye, kane iwachonwa ni mondo waluw chike mane imiyo jotichni ma jonabi owachonwa, to ne watamore winji.

¹¹Jo-Israel duto noketho chikeni, mi otamore winjo gima ne iwacho. Ne watimo richoo e nyimi, mi ikelo kuomwa kuong’ duto mondik e kitap chik Musa jatichni.

¹²Ne ichopo mana gik moko mane iwacho ni nitimnwa kaachiel gi jotendwa, nimar ne ikumo Jerusalem malich moloyo dala moro amora e piny.

¹³Ne wayudo kum duto mondiki e kitap chik Musa. To Ruoth Nyasachwa, kata sani pok watimo gimoro, ma dimi mirimbi kue, kata pok waweyo richowa, kwaluwo wachni maradier.

¹⁴In Ruoth Nyasachwa nirito kinde mowinjore mondo ikumwae, mi bang’e koro isekumowa. Kuom timo kamano nitimo mana gima kare, nikech in ng’at makare, to wan ema ok wasewinji.

¹⁵“Ruoth Nyasachwa, ne inyiso tekoni kuom golo jogi e piny Misri, kendo imiyo nyingi obedo gi huma ma pod osiko nyaka chil kawuono. Wan waseketho, kendo wasetimo richo.

¹⁶A Ruoth Nyasaye in ng’at makare, omiyo koro we kecho gi Jerusalem, nikech en dalani kendo en godi maler. Jopinje mokiewo kodwa duto jaro Jerusalem, kendo gijaro jogi mana nikech kethowa kaachiel gi timbewa manono mane kwerewa otimo.

¹⁷A Nyasachwa, winj lemona gi ywakna, kendo iguedh Hekalu mari mane okethore, mondo oger. Kamano mondo ng’ato ka ng’ato ong’e ni in e Nyasaye.

¹⁸A Nyasaye, winjwa, kendo ng’i kuma wantie, mondo ineye thagruok ma wan go kod masira momako dala miluongo gi nyingi. Walami nikech ing’won ahinya, to ok nikech timbewa ni kare.

¹⁹A Ruoth Nyasaye winjwa, kendo iwenwa richowa. A Ruoth Nyasaye winjwa kendo ikonywa mak ideko, mondo ji duto ong’e ni in e Nyasaye, nimar dalani kod jogi gin magi.”

²⁰Ne adhi nyime gi lemo ka ahulo richona kod richo mag jowa, kendo ne aywak ni Ruoth Nyasacha mondo oguedh gode maler.

²¹ Kane pod alemo kamano, ng’at miluongo ni Gabriel, mane aseneno e fweny, ne ohuyo matek mobiro kuma antie. Ne en kar sa mitimoe misango mar odhiambo.

²²Nowachona malong’o niya, “Daniel, asebiro mondo ami ing’e tiend fweny cha.

²³E sa mane ichakoe ywak ni Nyasaye, ne odwoki, kendo asechopo mondo anyisi dwokono, nikech in ng’at ma Nyasaye ohero ahinya. To koro chik iti mondo iwinj tiend fwenyno.

²⁴“Nyasaye oseketo ni jou gi dalau higni mia ang’wen gi piero ochiko mondo kethogi gi richogi orumie. Bang’e nowe ni ji richogi, kendo nogur tim makare mosiko mondo weche mag fweny gi weche makare otimre adier, eka opwodh Kama Ler Moloyo.

²⁵Koro winji, mondo ing’e tiend gik ma abiro wachoni. Chakre chieng’ ma ogolie chik ni Jerusalem onego ochak oger, higni piero ang’wen gochiko nokadhi, eka jatelo mowir nobi. Bang’e Jerusalem nobed ka oseger, molosie yore kendo ochiel gi ohinga motegno, mi nodag higni mia ang’wen gi piero adek gang’wen. Kindeno nobed kinde mar thagruok,

²⁶to e gikone, ng’at ma Nyasaye oseyiero noneg kayiem. Oganda lweny mar jatelo moro nobi, mi keth Jerusalem gi Hekalu. To giko nobi ma mwomore ka ohula, kendo lweny gi masira nobedie mana kaka Nyasaye nochiko.

²⁷ Jatelono nolos winjruok motegno gi ji mang’eny kuom higni abiriyo, kendo nomi ji owe timo misengni kendo owe kelo chiwo kuom higni adek gi nus. Gima kuero makelo kethruok nobed ewi osuri mar Hekalu nyaka ng’at mane okete kanyo chopi e giko mane Nyasaye oketone.”