Read luo Hosea 7 Bible Online

Hosea 7 - luo bible

Hosea 7

¹“Pile ka adwaro chango jo-Israel mondo gichak gidhi nyime maber, to richogi gi timbegi makuero ema aneno. Giwuondo ji kendo gituro udi mondo gikuelie, bende gimayo ji gik moko kata mana e wang’ yore.

²Ok gipar ni wiya ok nyal wil gi richo duto ma gitimo. Richogi olworogi, kendo ok nyal tama neno.”

³Ruoth Nyasaye wacho niya, “Ji wuondo ruoth gi jodonge kuom yoregi maricho.

⁴Giduto gin jowuond kendo jomriambo. Gichalo kendo ma mach nyenyni, ma jatedo ok chwalie mach nyaka mogo mosedwalo kuodi.

⁵Chieng’ mane ruoth timo sawo, ne gimiyo omadho divai gi jodonge, mi gimer kendo gilokore josunga ma jaro ji ajara.

⁶Adier, giowore gi timbegi mana ka kendo ma mach nyenynie. Otieno duto, mirimbgi okuot, okinyi omuoch ka mach maliel.

⁷Ne ginego jotendgi gi mirimbgi mager, kendo ruodhigi osepodho achiel achiel. To onge ng’ama kwaya mondo akony.”

⁸Ruoth Nyasaye wacho niya, “Jo-Israel chalo gi makati motedi manumu, nikech gigeno kuom ogendini molworogi.

⁹Winjruok ma gin-go gi jopinje mamokogo osemayogi teko, to ok ging’eyo. Bende ok ging’eyo ni wigi osetimo lwar.

¹⁰Sunga ma jo-Israel nigo nyiso ni gin joricho, to kata kamano, pod gitamore duogo ira, an Ruoth Nyasachgi.

¹¹Jo-Israel chalo gi akuru mofuwo. Giluongo jo-Misri mondo okonygi, to kendo giringo gidhi e piny Asuria.

¹²Abiro makogi ka gidhi, mana kaka jodwar mako winy gi wino, kendo abiro kumogi kuom richo ma gisetimo.

¹³“Gidiwo, nimar giseweya mi gipiem koda, omiyo ibiro tiekgi. Ne adwaro resogi, to giwacho miriambo kuoma.

¹⁴Ok giselama gi adiera, to girudhore piny ka giywak, kendo ka gilama mondo amigi cham gi divai, to ging’olo dendgi mana ka joma lamo nyiseche manono. To gisetamore mako chikna.

¹⁵Kata obedo ni apidhogi, mi amiyo gibedo motegno, to gipiem apiema koda!

¹⁶Gisiko ka giweya, kendo gidok ni nyiseche maonge teko. Ok nyal gen-gi, nikech gichalo gi atung’ mobam. Ibiro nego jotendgi e lweny nikech gisungore, mi jo-Misri nonyiergi.”