Read luo Hosea 8 Bible Online

Hosea 8 - luo bible

Hosea 8

¹Ruoth Nyasaye wacho niya, “Go tung’, nikech wasigu yako Hekalu mara, mana ka otenga mayudho nyagweno! Joga oseketho singruok mane atimo kodgi, kendo gisedagi winjo puonjna.

²Kata obedo ni giluonga ni Nyasachgi kendo giwacho ni ging’eya kamano,

³to gisedagi gima ber, mano omiyo wasikgi biro lawogi.

⁴Joga yiero ruodhi maggi, to gitimo kamano ma ok gipenja. Bende giyiero jotelo ka ok ayie. Gikawo fedha gi dhahabu ma gin-go, kendo giloso nyiseche manono ma biro kelonigi mana masira.

⁵Asedagi nyaroya mar dhahabu ma jo-Samaria lamo, kendo mirimba ng’ang’ni kuomgi. Koro pod gidwaro ni mondo akumgi nyaka karang’o?

⁶Jatich moro e Israel ema ne oloso kido manono, to kidono ok en Nyasaye! Kido mar nyaroya ma jo-Samaria lamono ibiro baro matindo tindo.

⁷“Jo-Israel chwoyo yamo, to gikayo mana kalausi. Gin gi cham ma ok wuodhi, omiyo gionge gi mogo. To kapo ni onyago cham, to jopinje mamoko dichame, mi tieke.

⁸Jo-Israel duto ibiro mwonyo, mi tieki pep. To kata mana sani ogendini mamoko okawogi ka joma nono.

⁹Gisedhi Asuria mondo giyudie konyruok, ka gichalo kanj thim moringo oa e kweth, kendo gitimo mana gima gin ema gidwaro. Adier, jo-Israel oseng’iewore kuom ogendini mamoko mondo okonygi.

¹⁰To koro abiro chokogi mondo akumgi! Piyopiyo nono gibiro neno malit ka ruodh Asuria sandogi.

¹¹“Kaka jo-Israel medo kende-mag-misango mang’eny mondo ogolgo richo e kaka gimedo bedo gi kuonde mang’eny ma gitimoe richo.

¹²Andiko chike gana gi gana mondo ji opuonjre, to gidagi ni mago gik mayore yore ma ok ging’eyo.

¹³Gihero timo misengni, kendo gihero chamo ring misengnigo. To an Ruoth Nyasaye ok amor kodgi, kendo abiro paro richogi mi akumgi, ka adwokogi e piny Misri.

¹⁴Jo-Israel osegero ut ruodhi, to wigi owil gi jachuechgi. Jo-Juda osegero mier mochiel motegno, to abiro oro mach mondo owang’ miego kaachiel gi ut ruodhigo.”