Read luo Joel 1 Bible Online

Joel 1 - luo bible

Joel 1

¹Ma e wach Ruoth Nyasaye mane omiyo Joel wuod Pethuel.

²“Winjuru, un joma dongo, kaachiel gi ji duto modak e piny Juda. Bende gima kama osetimore e ndalou, kata e ndalo kwereu?

³Nyisuru nyithindu wachni, gin bende ginyis nyithindgi, kendo nyithindgigo onyis tieng’ maluwogi.

⁴Bonyo madongo nochamo oboke, bang’e rumbi mar bonyo ma pod tindo nochamo oboke mane odong’.

⁵Auru malo mondo uywagi, un jomergi! Ywaguru un jomadh divai, nikech mzabibu milosogo divai mamit osekethi!

⁶ Oganda bonyo maduong’ osemonjo pinywa. Gin gi teko mathoth, kendo gikadho akwana. Lekegi bitho mana ka leke sibuor.

⁷Giseketho yiendwa mag mzabibu, kendo giselwaro it ng’opewa. Gisechamo opoko chuth, mi bede odong’ ka rachere.

⁸Ywaguru mana ka nyako maywago ng’at ma nyocha dwaro kende.

⁹Onge mogo kata gima imadho ma inyalo chiwo e Hekalu mar Ruoth Nyasaye mondo otimgo misango mar cham kata misango miolo piny. Mano emomiyo jodolo matimo misengni ni Ruoth Nyasaye ywak.

¹⁰Puothe ni nono kendo piny ywak, nimar cham okethore, kendo yiend mzabibu gi yiend zeituni otwo.

¹¹Ywaguru un jopur, nikech ngano gi shairi kod cham duto okethore. Un joma rito puothe mzabibu, ywaguru, nikech yiend mzabibu kod yiend ng’owo osener.

¹²Yien duto osetwo. Adier, komamanga gi othidhe kod yiend olemo mamoko, osetwo, kendo mor mar ji bende oserumo.

¹³Un jodolo matimo misengni e kendo-mar-misango rwakuru pien gugru mondo uywagi! Ee, un jotich Nyasachwa, donjuru e Hekalu kendo ninduru kanyo e piende gugru otieno duto, nikech onge mogo kata divai e od Nyasachu ma unyalo timogo misango mar cham kata misango miolo piny.

¹⁴Gouru milome mondo ji ori kech, kendo luonguru chokruok mar lemo. Un jodongo, chokuru jo-Juda duto e Od Ruoth Nyasaye mondo oywagne!

¹⁵ Chieng’ Ruoth Nyasaye chiegni, chieng’ ma Ng’ama Nyalo Gik Moko Duto keloe masira malich. Chieng’no nobed marach manade!

¹⁶Cham kethore mana kwaneno; mor onge e Od Nyasachwa;

¹⁷kodhi top e lowo motwo. Onge cham minyalo kano, omiyo dere man nono kethore.

¹⁸Dhok chur manade, kendo ng’eng’ ang’eng’a, nikech lek ongenigi. Rombe bende kech nego.

¹⁹Aywakni, A Ruoth Nyasaye, nikech legewa gi yiendwa otwo pep, mana ka gima mach owang’o.

²⁰Kata mana le bende ywakni, nikech aore duto oseduono, kendo lege otwo mana ka gima mach owang’o.