Read luo Joel 3 Bible Online

Joel 3 - luo bible

Joel 3

¹Ruoth Nyasaye owacho niya, “E ndalono nadwok mwandu jo-Juda gi mwandu jo-Jerusalem mane olalnigi,

²kendo anachok ogendini duto, mi ater e holo Jehoshafat, (tiende ni, holo ma Ruoth Nyasaye ng’adoe bura.) Kanyo ema nang’adie buchgi kuom gik ma gisetimo ni joga Israel, nikech gisekeyo joga awuon e pinje mamoko, mi gipogo pinya e kindgi giwegi.

³Ne gigoyo ombulu mondo gipoggo joga, kendo ne giuso yawuowi gi nyiri obed wasumbni, mondo pesa ma giyudo gichodgo, kendo gimadhgo kong’o.

⁴ “Un jo-Turo gi jo-Sidon kod jo-Filistia duto, ang’o mutimonani? Udwaro chulona kuor koso? Ka kamano, to kuor mudwaro chulono abiro dwoko e wiu uwegi ka diemo wang’.

⁵Usekawo fetha gi dhahapa, kendo utero giga ma nengogi tek kuondeu mag lemo.

⁶Bende usekawo jo-Juda gi jo-Jerusalem, mutero mabor gi pinygi, kendo ung’iewogi gi jo-Yunani.

⁷Koro adhi gologi kuonde ma useng’iewogie, kendo abiro timonu mana kaka natimonigi.

⁸Abiro miyo jo-Juda ng’iewo yawuotu gi nyiu, kendo giniusgi ni jo-Sabea, modak kuma bor ahinya. An Ruoth Nyasaye ema awacho kamano.”

⁹Nyis ogendini niya, “Ikreuru ni lweny, kendo chokuru jokedo. Ee, luonguru jolweny duto mondo obi!

¹⁰ Thedhuru kweu obed ligengni, kendo thedhuru rabeti mau obed tonge. Kendo ng’ama ngoro nyaka nyis ni en thwon!

¹¹Returu ubi, un ogendini mokiewo, mondo uchokru e holo.” A Ruoth Nyasaye, mi jolwenji marateke olor kuno!

¹²Ogendini nyaka ikre, mondo obi e holo ma Ruoth Nyasaye ng’adoe bura, nimar kanyo ema an Ruoth Nyasaye abiro betie ka ayalo ogendini duto moa koni gi koni.

¹³ Gin gi richo mang’eny, omiyo betgiuru duto ka cham mibeto chieng’ keyo. Nyon-giuru ka mzabibu minyono kar bicho, ma mzabibu opong’o, kendo divai o oko.

¹⁴Ji gana gi gana nie holo mar ng’ado bura. Kanyo ema chieng’ Ruoth Nyasaye chiegni chopoe.

¹⁵Wang’ chieng’ gi due olokore mudho, kendo sulue bende ok rieny.

¹⁶ Dwond Ruoth Nyasaye mor gi ewi got Sayun Ee, omor Jerusalem, kendo polo gi piny yiengni. To Ruoth nyasaye nores joge Israel, kobedonigi kama ginyalo geng’oree.

¹⁷“Bang’e un jo-Israel unung’e ni an, Ruoth Nyasaye ma Nyasachu, adak Sayun, goda maler, kendo jopinje mamoko ok nonyone kendo.

¹⁸Kindeno yiend mzabibu manyak ahinya nopong’ gode, kendo jamni mathoth noyud e got ka got. Soko nomol kawuok e Hekalu mar Ruoth Nyasaye, mi nomi holo Shitim bedo mang’ich.

¹⁹Piny Misri biro lokore thim, kendo piny Edom nolokre thim modong’ nono, nikech jopinjego nomonjo piny Juda, mochuero remb joma onge gi ketho.

²⁰Abiro chulo kuor ni jonekgo, kendo joketho ok nawe mak akumo. Ji nodag e piny Juda gi Jerusalem nyaka chieng’, kendo Ruoth Nyasaye nodag e got Sayun.”