Read luo Amos 2 Bible Online

Amos 2 - luo bible

Amos 2

¹ Ruoth Nyasaye owacho niya, “Jo-Moab osetimo richo mang’eny, omiyo abiro kumogi mak orem, nikech ne giwango choke ruodh Edom mi giloko buru.

²Kuom mano abiro oro mach e piny Moab mondo owang’ kuonde mochiel motegno mag Kerioth. Jo-Moab biro tho e chuny mahu mar lweny, ka jolweny giyo sigich lweny, kendo tung’ ywak.

³Abiro nego ruodh Moab, kaachiel gi jotend pinyno duto.” Mano e wach Ruoth Nyasaye.

⁴Ruoth Nyasaye owacho niya, “Jo-Juda osetimo richo mang’eny, omiyo abiro kumogi mak orem, nikech gisechayo puonjna, kendo gisedagi rito chikena. Nyiseche manono mane kweregi lamo osemiyo gibaro, mi giweya.

⁵Kuom mano abiro oro mach e piny Juda mondo owang’ kuonde mochiel motegno mag Jerusalem.”

⁶Ruoth Nyasaye owacho niya, “Un jo-Israel usetimo richo mang’eny, omiyo abiro kumou mak orem, nimar ung’iewo joma onge gi ketho, nikech pok gichulo gopegi. Joma odhier ma ok nyal chulo kata mana nengo patpat bende ung’iewo ka wasumbni.

⁷Unyono jochan piny, kendo udhiro joma odhier oko e yo. Wuowi gi wuon mare dhi ir dhako achiel ma jachode mar Hekalu, ka gidwanyogo nyinga maler.

⁸Kuonde duto ma ji lamoe, ginindo e lewni mosingnigi kuom gope. Divai ma ukawo kuom joma ugoyo faini, umadho e Hekalu mar Nyasachu.

⁹ To koro eka un ema numiyo atieko jo-Amor ma raboche ka yiend sida, kendo matek ka yiend ober. Ne atiekogi pep!”

¹⁰Ruoth Nyasaye nochako owacho niya, “An ema nagolou e piny Misri, mi atelonu e thim kuom higni piero ang’wen, kendo namiyou piny jo-Amor mondo obed maru.

¹¹ Ne aketo yawuotu moko mondo obed jonabi, to moko naketo obed jo-Nazir. Donge awacho adier, jo-Israel?

¹²To ne umiyo jo-Nazir omadho divai, bende nuchiko jonabi ni kik hul wachna.

¹³Koro abiro diyou piny kama untie, mana kaka gari mopong’ gi cham sikore e lowo.

¹⁴Jong’uech matek ok notony, kendo joma rateke nobed mool, bende kata mana jolweny mager ok nores ngimagi.

¹⁵Jo-Asere noringi, kendo jong’wech matek ok noresre. Bende joma oidho farese ok notony.

¹⁶To kata mana jolweny mathuondi moloyo noring duge chieng’no.”