Read luo Amos 3 Bible Online

Amos 3 - luo bible

Amos 3

¹Ruoth Nyasaye owacho niya, “Un jo-Israel winjuru gima awacho kuomu. Ne agolo dhoutu duto e piny Misri,

²kendo un ema aseng’eyou kendo ritou kuom ogendini duto manie piny. Kuom mano abiro kumou kuom richou duto.

³Uparo ni ji ariyo nyalo chako wuoth kaachiel ka pok giwinjore?

⁴Koso sibuor beende ruto e bungu ka onge gima osemako? Kata nyathi sibuor nyalo ng’ur e gono adier, ka onge gima ochamo?

⁵“Bende winyo nyalo moko e obadho ka ok oketne kudni? Koso obadho nyalo meko ka onge gima otuge?

⁶“Bende tung’ mar lweny nyalo ywak e dala mak omiyo ji luoro? Koso gimoro nyalo timore e dala ka ok Ruoth Nyasaye ema okelo?

⁷“Adier, onge gima Ruoth Nyasaye timo ka ok onyiso jotichne ma jonabi.

⁸“Ere ng’ama ok diluor ka sibuor ruto? Koso ere janabi ma diling’ mak ohulo gima Ruoth Nyasaye owachone?”

⁹Gouru milome e ut ruodhi mag Ashdod gi mag Misri, kuwacho niya, “Chokreuru kanyakla e gode moluoro Samaria, mondo uneye timbe pogruok matimore e dalano, kendo kaka ithiro ji kuno.”

¹⁰Ruoth Nyasaye owacho kama: “Jogo ok ong’eyo kaka digibed joma obidhore. Gipong’o utgi madongo gi gik moyaki.

¹¹Kuom mano wasigu nolwor pinygi, kendo noketh kuondegi mochiel motegno kod utgi madongodongo.”

¹²Ruoth Nyasaye owacho niya, “Kaka jakwath reso lemo ariyo kata it rombo ma ondiek osechamo, e kaka Nyasaye nores mana jo-Israel manok modak Samaria.

¹³Koro chikuru itu mondo usiem nyikwa Jakobo ni Ruoth Nyasaye Manyalo Gik Moko Duto wacho kama:

¹⁴ Chieng’ ma nakum jo-Israel kuom richogi, to naketh kende mag liswa man Bethel bende. Tunge mag kendogo nong’ad oko, mi ginipodh piny.

¹⁵Anamuk udi midakie ndalo chwiri kod mago midakie ndalo oro. Udi ma olich igi gi lak liech nodong’ gundni, kendo ot ka ot maduong, nokethi.”