Read luo Amos 9 Bible Online

Amos 9 - luo bible

Amos 9

¹Ne aneno Ruoth Nyasaye kochung’ e bath kendo mar misango, kowacho niya, “Tuom sirni mag hekalu, mondo agola duto oyiengni. Mukgi mondo gilwar ewi ji, to ji duto modong’ anami otho e lweny. Onge ng’at ma noringi, kata ma notony.

²Kata ka gikunyo bur, mi gichopo nyaka kar joma otho, to abiro gologi mana kuno. Kata ka giidho nyaka e polo, to abiro lorogi piny.

³Ka gipondo ewi got Karmel, to nadwargi nyaka amakgi. Ka gipondona e bwo pi matut, to anachik thuol mondo okagi kuro.

⁴Ka wasikgi omakogi ka terogi e tuech, to anachik mondo oneggi kuno. Aramo ni ok natimnigi maber, to nyaka atimnigi marach!”

⁵Ruoth Nyasaye Manyalo Gik Moko Duto mulo piny, mi piny leny, kendo ji duto modakie ywak. Piny duto ting’ore malo, kendo pie, mana ka aora Nael.

⁶Ruoth Nyasaye gero ute e polo, kendo orenjo polo kuom piny. Oluongo pi nam mondo obi, kendo oologi e piny. Ruoth Nyasaye e nyinge!

⁷Ruoth Nyasaye wacho niya, “Un jo-Israel, gima atimonu chalo mana gi gima atimo ni jo-Ethiopia. Bende nagolo jo-Filistia e piny Kaftor, kendo nagolo jo-Aram e piny Kir, mana kaka un bende nagolou e piny Misri.

⁸Arango piny jo-Israel motimo richoni, kendo abiro tieke e wang’ piny. Kata kamano ok anatiek joka Jakobo duto te.

⁹To anagol chik, mi anapiedh jo-Israel e kind ogendini duto, ka cham mipiedho e odheru, kendo kata wang’ cham achiel ok nolwar piny.

¹⁰Joga duto ma joketho ibiro negi e lweny kata mana mago duto mawacho niya, ‘Nyasaye ok nowe masira chop kuomwa.’

¹¹ “Chieng’no anachung’ e dhood Daudi mosebet ka ot molokore gunda. Analos kuonde momukore mondo oduog maber. Abiro gere kendo, mi alose machal gi kaka nochal chon.

¹²Bang’e jo-Israel nolo jo-Edom modong’ kaachiel gi ogendini mamoko duto ma chon yande meka.” Ruoth Nyasaye mabiro miyo gima kamano timore owacho kamano.

¹³Ruoth Nyasaye wacho niya, “Ndalo biro ma cham nobed mang’eny, mi nogol pur ka ji pod keyo, kendo mzabibu nonyag mathoth, mi nochak oket kodhi ka ji pod loso divai. Yiend mzabibu mang’eny mabeyo nonyag mathoth e gode duto, mi unubed gi divai mang’eny.

¹⁴Abiro chako amiyo joga Israel dag e ngima maber. Gibiro gero miechgi mane olokore gundni, mi gidagie, kendo gibiro pidho yiend mzabibu, mi gimadh divai. Gibiro puro puothegi, mi gicham gik manyakie.

¹⁵Abiro pidhogi e lopgi mane amiyogi kendo ok nochak opudhgi.”