Read luo Kwan 10 Bible Online

Kwan 10 - luo bible

Kwan 10

¹Ruoth Nyasaye nowacho ni Musa niya,

²“Thedh tunge ariyo mag fedha mondo igo kiluongo jo-Israel, kendo kigoyogo milome mondo kambi odar.

³Ka ogo tunge ariyogo duto, to ji duto nobi iri e dho Hemb Romo.

⁴To ka tung’ achiel kende ema oywak to jodongo ma jotend dhout Israel kende ema nobi.

⁵Ka tung’ oywak moriwore gi sigiya, to joma ojot yo wuokchieng’ nochak wuoth,

⁶kendo ka tung’ mar ariyo oywak moriwore gi sigiya, to joma ojot yo milambo nochak wuoth. Kamano ka idwaroo mondo kambi odar, to tung’ nyaka ywagi moriwore gi sigiya,

⁷to ka ichoko ji, to tung’ nyaka ywagi maonge sigiya.

⁸Jodolo ma joka Harun ema omi tich goyo tung’. Mano en chik momakou gi nyikwau nyaka chieng’.

⁹“Ka ukedo gi wasigu momonjou e pinyu, kendo dwaro loyou, to unugo tunge moriwore gi sigiya, mi Ruoth Nyasaye ma Nyasachu noparu, kendo noresu kuomgi.

¹⁰E kinde ma utimoe nyasi, gi ndalo moketi mutimoe sewni, kod chieng’ mokwongo mar due ka due, unugo tung’ kutimo misengni miwang’o pep, kod misengni mag sawo, mi tungego nomi Ruoth Nyasaye ma Nyasachu paru. An e Ruoth Nyasaye ma Nyasachu.”

¹¹Due piero ariyo, due mar ariyo, e higa mar ariyo, bor polo nowuok oa ewi Hemb Rapar.

¹²Eka jo-Israel nochako wuoth mosmos ka gia e thim Sinai, nyaka bor polo nodhi mochung’ ewi got Paran.

¹³Kane gikwongo muko kambi, kaka Ruoth Nyasaye nomiyo Musa ochikogi,

¹⁴kambi jo-Juda ema nokwongo wuok e bwo bandechegi ka gichanore e ogendgi mag lweny. Kambino noting’o jo-Juda ma jatendgi ne Nashon wuod Aminadab,

¹⁵gi jo-Isakar, ma jatendgi ne Nethaneel wuod Zuar,

¹⁶kod jo-Zubulun, ma jatendgi ne Eliab wuod Helon.

¹⁷Kane Hema Maler omuki, joka Gershon gi joka Merari nowuok koting’e.

¹⁸Kambi jo-Reuben ema nowuok mar ariyo, kochanore e bwo bandechgi, e ogendgi mag lweny. Kambino noting’o jo-Reuben, ma jatendgi ne Elizur wuod Shedeur,

¹⁹gi jo-Simeon, ma jatendgi ne Shelumiel wuod Zurushadai,

²⁰kod jo-Gad, ma jatendgi ne Eliasaf wuod Reuel.

²¹Joka Kohath ma joting’ gik maler ema nowuok bang’ jogo, to kane gichopo kama onego gurie kambi, ne giyudo ka osegur Hema Maler.

²²Kambi jo-Efraim ema nowuok mar adek, kowuok e bwo bandechegi, e ogendni mag lweny. Kambino noting’o jo-Efraim, ma jatendgi ne Elishama wuod Amihud,

²³gi jo-Manase, ma jatendgi ne Gamaliel wuod Pedazur,

²⁴kod jo-Benjamin ma jatendgi ne Abidan wuod Gideoni.

²⁵Kambi jo-Dan ema nowuok mogik bang’ kambi mamokogo, kochanore e bwo bandechegi, e ogendgi mag lweny. Kambino noting’o jo-Dan, ma jatendgi ne Ahiezer wuod Amishadai,

²⁶gi jo-Asher, ma jatendgi ne Pagiel wuod Okran,

²⁷kod jo-Naftali, ma jatendgi ne Ahira wuod Enan.

²⁸Kamano e kaka jo-Israel nochanore ka gichako wuoth, kendo ne giwuotho ka gichanore kamano.

²⁹Musa nowacho ni Hobab wuod Reuel ja-Midian ma ore niya, “Koro wawuok wadhi e piny ma Ruoth Nyasaye osewacho ni nomiwa. Yie wadhi kodi, kendo wabiro timoni maber, nimar Ruoth Nyasaye osesingore ni obiro guedhowa.”

³⁰To Hobab nodwoke niya, “Ok adhi kodu, ber mondo adog e pinywa kuom jowa.”

³¹To Musa nowachone niya, “Ahombi kik iwewa, nimar in ema ing’eyo kama onego wabworie e thim, kendo in ema inibed ng’at motelonwa.

³²Ka inyalo dhi kodwa, to gima Ruoth Nyasaye ogwedhowago wanapog kodi.”

³³Ne giwuok ka gia e god Ruoth Nyasaye, mi giwuotho kuom ndalo adek, ka Sandug Muma mar Ruoth Nyasaye otelo nyimgi mabor ma dirom wuodh odiechieng’ achiel, mondo omanynigi kama ginyalo bworoe.

³⁴Bor polo mar Ruoth Nyasaye ne ochung’ e wigi godiechieng’ ka gin e wuoth.

³⁵ Pile kane Sanduk chako wuoth, Musa ne wacho niya, “A Ruoth Nyasaye, a malo, mondo wasiki oke, kendo joma mon kodi oringi!”

³⁶To pile kane Sanduk chung’, to Musa ne wacho niya, “Yue, A Ruoth Nyasaye, Nyasach jo-Israel gana gi gana.”