Read luo Kwan 11 Bible Online

Kwan 11 - luo bible

Kwan 11

¹E kinde moro jo-Israel noywak ni Ruoth Nyasaye kuom thagruokgi. Ruoth Nyasaye ne okecho kowinjo wechegigo, mi mach moa kuome nomuoch kuomgi, kendo oketho bath kambi konchiel.

²Eka jo-Israel noywak ni Musa, mi Musa nokwayonigi Ruoth Nyasaye mi mach otho.

³Ne ochak kanyo ni Tabera, (tiende ni, kar weng’o) nikech mach moa kuom Ruoth Nyasaye nomuoch kuomgi kanyo.

⁴Ne nitie joma yoreyore moa e ogendini mopogore opogore, mane wuotho gi jo-Israel. Chuny jogo nochako gombo gik mopogore opogore. Jo-Israel bende nochako ywak, kapenjo ni “Onge ng’at ma dimiwae ring’o ngang’?

⁵Parieuru rech mane wachamo nono e piny Misri, gi budho gi poipoi gi kitungu kod alode mamit.

⁶Dwondwa tinde otwo, kendo onge gimoro amora ma wanyalo neno mak mana Manna.”

⁷ (Manna ne chalo gi kodhi matindotindo, ma kitgi chal gi dwogo.

⁸ Ji ne kwanyogi kendo regogi e pong’ lwedo, kata yokogi e pany, eka ne gitedogi e agulu, kendo gilosogo kek. Ka ichame, to ndhathe chalo gi ndhath kek moted gi mo.

⁹Kane tho omoko gotieno, to manna bende ne lwar.)

¹⁰Musa nowinjo ka jo-Israel ywak, ka joot ka joot ochung’ e dho hembgi. Mano omiyo mirima mager nomako Ruoth Nyasaye, mi chuny Musa nochandore.

¹¹Nopenjo Ruoth Nyasaye niya, “Ang’o momiyo isekelo chandruok kuom jatichni? Ere ketho ma aseketho e nyimi momiyo iketo kuoma ting’ mapek mar rito jogi duto?

¹²An e min-gi mane onywologi? Koso ka gidhi e piny mane isingori ni nimi kweregi, to nyaka ating’gi mana e kora kaka japidi ting’o nyathi?

¹³Ere kuma anyalo yudonigie ring’o giduto? Gichando chunya ka giywakna ni mondo amigi ring’o gicham.

¹⁴Ting’ mar rito jogi duto ohinga. Ok anyal ting’e kenda.

¹⁵Omiyo ka mano e tich ma imiya, to kara ber mondo inega chuth. To kapo ni ikecha, to yie iwe miya thagruok makama.”

¹⁶Ruoth Nyasaye nodwoko Musa niya, “Chok jodong Israel piero abiriyo ma ing’eyo ni jotend oganda. Kelgi e nyima e Hemb Romo kendo gichung’ kodi kanyo.

¹⁷Abiro lor mondo awuo kodi, kendo abiro kawo kuomi teko moko mane amiyi, mondo ami jogo okonyi rito oganda, mi ting’no ok noturi.

¹⁸To nyis jo-Israel duto kama: ‘Puodhreuru nikech kiny unucham ring’o. Ne uywakna ka upenjo ni, “Ere ng’ama nyalo miyowa ring’o?” Kendo kuwacho ni, “E piny Misri ne wadakie maber.” Koro Ruoth Nyasaye biro miyou ring’o, kendo ubiro chamo!

¹⁹To ok nuchame kuom ndalo achiel kata kuom ndalo ariyo kata abich kata apar kata mana ndalo piero ariyo,

²⁰to unuchame kuom due ngima, nyaka chop othing’u, mi ung’ogi, nikech usedagi Ruoth Nyasaye modak e kindu, kendo useywakne kuwacho niya, “Ang’o momiyo ne wawuok e piny Misri?” ’ ”

²¹Musa nodwoko Ruoth Nyasaye niya, “An gi jolweny alufu mia auchiel, to in iwacho ni ibiro miyogi ring’o ma gichamo kuom due achiel ngima!

²²Ere kaka rombe gi ruedhi diyang’ mi romgi? Kata mana ka omak rech duto mae nam, to mago bende ok diromgi!”

²³Eka Ruoth Nyasaye nopenjo Musa niya, “Bende nitie gimoro manyalo tamo Ruoth Nyasaye? Kawuono ibiro ng’eyo ka wechena gin adier, kata ka ok gin adier.”

²⁴Musa nowuok oko, monyiso ji gima ne Ruoth Nyasaye owacho. Nochoko jodong oganda piero abiriyo, mi oketo e alwora mar Hema.

²⁵Eka Ruoth Nyasaye nolor e bor polo mowuoyo kode, kendo okawo kuome teko moko mane osemiye, mi omiyo jodongo piero abiriyogo, kendo kane Roho osedonjo kuomgi ne gidhumore. To bang’ mano ne ok gidhumore kendo.

²⁶To ji ariyo ma nyinggi Eldad kol Medad, mane osekwan kaachiel gi jodongo piero abiriyoka nodong’ chien e kambi. To kata obedo ni gin ne ok gidhi e Hema kamano, Roho nobiro kuomgi, mi gidhumore e kambi.

²⁷Wuowi moro noringo, odhi ir Musa, monyise ni Eldad kod Medad jodhumore e kambi.

²⁸Eka Joshua wuod Nun, mane oyudo osetiyo ni Musa chakre tinne, nowacho niya, “Jaduong’ Musa, kwergi.” To Musa nodwoke niya, “Iywaga ni gimaya duong’ koso?

²⁹Mad jo-Ruoth Nyasaye duto dok jonabi, kendo Ruoth Nyasaye migi teko mar Roho!”

³⁰Bang’ mano Musa gi jodong Israel nodok e kambi.

³¹Ruoth Nyasaye notugo yamo, mokelo aluru koa yo podho chieng’, kendo alurugo ne huyo gi piny maromo mita achiel koa e lowo, e bath kambi koni gi koni, kuma bor ma dirom wuodh ndalo achiel koa e kambi.

³²Ji nomako alurugo odiechieng’no gi otieno kod kinyne duto, ma kata ng’at mane omakoe manok moloyo ne oyudo depe piero ariyo. Ne gimoyogi e kambi duto mondo gitwo.

³³To Ruoth Nyasaye nokecho kodgi, mi ogoyogi gi tho marach mana ka koro eka gichako kayo ring alurugo kendo pok gimwonyo.

³⁴Ne ochak kanyo ni Kibroth-hataava, (tiende ni liete joma jowuoro), nikech kanyono ema ne giyikoe joma ne wuoch ring’o omako.

³⁵Jo-Israel noa Kibroth-hataava modhi Hazeroth, kendo kane gin kuno