Read luo Kwan 12 Bible Online

Kwan 12 - luo bible

Kwan 12

¹Miriam gi Harun ne jochako kuodho Musa nikech nyar Kush mane okendo.

²Ne giwacho niya, “Musa kende ema Ruoth Nyasaye osewuoyogo koso? Wan donge osewuoyo kodwa?”

³(To ka iwacho adier, Musa ne en ng’at mamuol ahinya moloyo ji duto manie piny.) Ruoth Nyasaye nowinjo kaka jogo kuodhe,

⁴mi nopoyo Musa gi Harun kod Miriam gi wach niya, “Wuoguru, un ji adek, udhi e Hemb Romo.” Kamano ji adekgo nowuok modhi,

⁵eka Ruoth Nyasaye nolor e siro mar bor polo. Nochung’ e dho Hema, mi oluongo Harun gi Miriam,

⁶kendo ka ne gibiro e nyime, nowachonigi niya, “Winjuru wechena: Ka de ni Musa en mana janabiu, to dafwenyorane, kendo dawuoyo kode e lek.

⁷ To jatichna Musa ok en janabi ma kamano en kende e jaadiera kuom joga duto.

⁸En awuoyo kode wang’ gi wang’, kende mana moyangore ma onge ngero. Enone kit Ruoth Nyasaye. Ere kaka uhedhoru kuodho jatichna Musa?”

⁹Mirima nomako Ruoth Nyasaye kodgi mi oa,

¹⁰kendo kane bor polo oa e Hema kamano, dhoho nomako dend Miriam, molokore marachar ka pe. Kane Harun olokore monene,

¹¹nokwayo Musa niya, “Jaduong’, lamnwa! Kik iwe wachul gop richo, kata obedo ni wasetimo gima ofuwo kendo marach kamano.

¹²Kik iwe Miriam chal gi nyathi monywol kosetho, ma bath dende konchiel gimoro ochamo.”

¹³Omiyo Musa noywak niya, “A Ruoth Nyasaye, gima kama kik timre. Akwayi ni yie ichange.”

¹⁴ Ruoth Nyasaye nodwok niya, “Ka da bed ni wuon mare ema ong’udho olawo e wang’e, donge da obedo gi wichkuot kuom ndalo abiriyo? Kuom mano keteuru kar kende oko mar kambi kuom ndalo abiriyo, eka mondo oduoge.”

¹⁵Kamano noket Miriam oko mar kambi kuom ndalo abiriyo kendo kambi ne ok odar nyaka oduogo.

¹⁶Bang’ mano ne gia Hazeroth, mi gidhi giguro kambi e thim Paran.