Read luo Kwan 15 Bible Online

Kwan 15 - luo bible

Kwan 15

¹Ruoth Nyasaye nowacho ni Musa

²mondo onyis jo-Israel niya, “Ka usedonjo e piny ma abiro miyou mondo udagie,

³to unutim ni Ruoth Nyasaye misengni miwang’o. Ginyalo bedo misengni miwang’o pep, kata misengni michopogo kuong’ruok, kata ma ng’ato timo kuom herone, kata mitimo e ndalo mag sewni moketi. Ka uwang’o ni Ruoth Nyasaye jambu ka misango ma dum tik mamit kamano,

⁴to ng’at machiwo misangono nyaka chiw bende misango mar cham mar mogo moromo kilo adek moruw gi mo lita ariyo.

⁵Bende nyaka uchiw lita ariyo mar divai obed misango miolo piny kuom nyarombo ka nyarombo mutimogo misango miwang’o pep, kata misango mar sawo.

⁶“Ka chiayo mitimogo misangono en im, to mogo mitimogo misango mar cham nyaka bed kilo apar gang’wen moruw gi mo moromo lita adek,

⁷kendo divai mitimogo misango milo piny nyaka bed moromo lita adek. Kamano e kaka unutim ni Ruoth Nyasaye misango madum tik mamit.

⁸“To ka nyarwath ema utimogo ni Ruoth Nyasaye misango miwang’o pep, kata misango michopogo kuong’ruok, kata misango mar sawo,

⁹to nyaka uchiw bende mogo moromo kilo apar moruw gi mo moromo lita ang’wen, mondo otimgo misango mar cham,

¹⁰kod divai moromo lita ang’wen mondo otimgo misango milo piny. Gigo duto nobed misango miwang’o mondo odum tik mamit ni Ruoth Nyasaye.

¹¹Mano e gima nyaka utim ni rwath ka rwath, kata ni im ka im, kata ni nyarombo ka nyarombo.

¹²Kata bed ni utimo misengni gi jamni adi, to ciayo ka cjiayo nyaka timne kamano.

¹³Ng’ato ka ng’ato ma ja-Israel nyaka rit chikego ka otimo misango miwang’o mondo odum tik mamit ni Ruoth Nyasaye.

¹⁴“Ka japiny moro man kuomu, kata modak kodu chuth, otimo misango miwang’o mondo odum tik mamit ni Ruoth Nyasaye, to nyaka otim mana kaka utimo.

¹⁵En mana chik achiel ma omakou kaachiel gi japiny moro modak kuomu, kendo omako nyikwau nyaka chieng’. Un gi jodak uchalru e nyim Ruoth Nyasaye.

¹⁶ Chik achielno ema omakou machalre gi japiny moro modak kuomu.”

¹⁷Ruoth Nyasaye nowacho ni Musa

¹⁸mondo onyis jo-Israel niya,

¹⁹“Ka usedonjo e piny ma abiro teroue, mi uchamo chiemb pinyno, to nyaka uchiw ni Ruoth Nyasaye mich moyiedhi.

²⁰Ka utedo makati gi mok cham mukwongo kayo, to nyaka uket makati achiel tenge, obed mich moyiedhi, mana kaka uketo tenge cham mukwongo dino.

²¹Nyaka uchiw ni Ruoth Nyasaye mich moyiedhi mugolo kuom makati mukuongo tedo. Mano en chik momakou gi nyikwau nyaka chieng’.

²²“Ka uketho ka ukia, mi uweyo chik moro amora kuom chike mane Ruoth Nyasaye omiyo Musa,

²³ma gin chike duto momakou gi nyikwau nyaka chieng’, kendo mane Ruoth Nyasaye omiyou gi lwet Musa chakre chieng’ mokwongo,

²⁴to ma e gima nyaka utim. Ka oganda duto ema oketho ka kia kamano, to nyaka gichiw nyarwath mondo gitimgo misango miwang’o pep mondo odum mamit ni Ruoth Nyasaye, kaachiel gi misango mar cham kaachiel gi miolo piny mitimego kaka chik dwaro. Bende nyaka gichiw nywok mondo gitimgo misango mar golo richo.

²⁵Eka jadolo nopwodh oganda duto mar Israel, mi nowenigi richogi, nikech ne giketho mana ka gikia, kendo gisetimo ni Ruoth Nyasaye misango miwang’o. Bende gisetimo misango mar golo richo e nyim Ruoth Nyasaye kuom ketho mane giketho ka gikia.

²⁶Kuom mano oganda jo-Israel duto, kaachiel gi jopinje mamoko modak kuomu nowenigi kethogi, nimar oganda duto ema noketho.

²⁷ “To ka ng’at achiel kende ema oketho ka kia, to nyaka ochiw diel swini ma hike achiel, mondo otimgo misango mar golo richo,

²⁸kendo jadolo nopwodh ni ng’atno kethone e nyim Ruoth Nyasaye, mi nowene.

²⁹En chik achiel kende momako ng’at ma oketho ka ok ong’eyo, bed ni en japiny kata jadak.

³⁰To ng’ato ang’ata ma oketho goyiem oyanyo Ruoth Nyasaye, bed ni en ja-Israel kata japiny moro modak kuomu. Nyaka ng’ad kare oko kuom ogandagi,

³¹nimar osechayo wach Ruoth Nyasaye, kendo oseketho chikne. Ng’at ma kamano nyaka ng’ad kare oko chuth, kendo kethoneno nobed e wiye owuon.”

³²E kinde mane jo-Israel ni e thim, ne oyud ng’at moro ka modo yien chieng’ Sabato.

³³Joma ne ojuke komoto, nokele e nyim Musa gi Harun kod oganda duto mar Israel.

³⁴Ne gikete e od tuech nikech ne ok ging’eyo malong’o gima onego timne.

³⁵Eka Ruoth Nyasaye nowacho ni Musa niya, “Ng’atno nyaka negi. Oganda duto nyaka goye gi kite oko mar kambi.”

³⁶Kuom mano ne gigole oko, mi gigoye gi kite giduto nyaka otho, mana kaka Ruoth Nyasaye nochiko Musa.

³⁷Ruoth Nyasaye nochako owacho ni Musa

³⁸ mondo onyis jo-Israel niya, “Un kaachiel gi nnyikwau nyaka umin usi, mondo uket e riak lepu. Achiel kuom usi momin-go nyaka bed mambulu.

³⁹Kamano e kinde duto ma unenoe usi mambuluno, to nupar chike duto mag Ruoth Nyasaye mo unumakgi, kendo ok unuluw yore maricho ma wengeu gi chunyu nyalo teroue.

⁴⁰Usi mominno nobed ranyisi maparonu chikena duto mondo uritgi, kendo ubed joma ler, mowal ni Nyasachu.

⁴¹“An e Ruoth Nyasaye ma Nyasachu mane ogolou e piny Misri mondo obed Nyasachu. An e Ruoth Nyasaye ma Nyasachu.”