Read luo Kwan 18 Bible Online

Kwan 18 - luo bible

Kwan 18

¹Ruoth Nyasaye nowacho ni Harun niya, “In gi yawuoti, kaachiel gi jodhoodu duto, ema unubed ka urito tich Kama Ler, kendo gimoro amora marach motimore kuome nobed wachu. To gimoro amora motimore marach kuom tich dolo, nobed wachni kaachiel gi yawuoti.

²Iniwe jodhoodu ma joka Lawi bed kodu kendo konyu, kutiyo gi yawuoti e nyim Hemb Rapar.

³Ginibed ka gikonyou, mi gitiek tije duto mag Hema, to kik gisud machiegni gi gik maler, kata gi kendo-mar-misango, nono to githo kaachiel gi un bende.

⁴Ginibed kodu, kendo ginikaw ting’ duto mag rito Hema e yo moro amora, to onge ng’at ma ok jadolo ma nosud machiegni kodu.

⁵To un uwegi unubed kutiyo tije mag Kama Ler, kod tich dolo e kendo-mar-misango, mondo mirima mager mar Ruoth Nyasaye kik bi kuom jo-Israel kendo.

⁶An awuon asepogo joweteu ma jo-Lawi kuom dhout Israel mamoko duto mondo achiwnugi ka joma owalna mondo orit Hema.

⁷To in gi yawuoti kende ema nyaka uti tichu mar dolo mitimo e kendo-mar-misango, kendo mitimo e tok Pasia. Tich dolono e tich ma amiyou. Ng’ato ang’ata ma ok jadolo motiyo tich dolo nyaka negi.”

⁸Ruoth Nyasaye nochako owacho ni Harun niya, “An awuon aketo e lweti mich duto, tiende ni chiwo maler duto ma jo-Israel okelo. Amiyigi ka pokni kaachiel gi nyikwayi, kaluwore gi chik mochwere.

⁹Gima ogol kuom chiwo moro amora maler moloyo, ma ok owang’ e kendo-mar-misango, nobed mari gi nyikwayi, bed ni en misango mar cham, kata mar golo richo, kata mipwodhogo ketho mar gowi, mochiwna ka mich maler moloyo.

¹⁰Unuchame kaluwore gi chik mar chamo gik maler moloyo, kendo ng’ato ang’ata kuomu ma dichwo nyalo chame, enobed gima ler.

¹¹“Gik ma jo-Israel chiwo ka mich moyiedhi bende nobed mau. Achiwonugi kaachiel gi yawuoti kod nyigi, kaluwore gi chik mochwere. Ng’ato ang’ata mae odi ma ok ogak nyalo chamogi.

¹²“Amiyou mo maber gi divai manyien mabeyo duto gi cham mabeyo, tiende ni cham agwela mochiw ni Nyasaye.

¹³Olembe duto mokwong pon e pinyu, mokel ni Ruoth Nyasaye nobed mau. Ng’ato ang’ata mae odi ma ok ogak nyalo chamogi.

¹⁴ “Gimoro amora mochiw ni Ruoth Nyasaye chuth e Israel nobed maru.

¹⁵“Nyithindo makayo duto michiwo ni Ruoth Nyasaye nobed mau, bed ni gin mag dhano kata mag le. To nyaka war nyitnindo duto makayo mag dhano kod mag le ma ok ler.

¹⁶Ka gisetieko due achiel, to nyaka wargi gi shekel abich abich, mopim gi rapim mitiyogo e tich Nyasaye (shekel achiel oromo gera piero ariyo.)

¹⁷To kik wariw nyithindo makayo mag dhok kata mag rombe kata mag diek, nimar gin jamni maler. Nyak ukir rembgi e kendo-mar misango, kendo uwang’ bochegi kutimogo misango miwang’o mondo odum tik mamit ni Ruoth Nyasaye.

¹⁸Ringgi to nodong’nu mana kaka agoko gi em ma korachwich mag mich moyiedhi dong’nu.

¹⁹“Mich duto mag gik maler ma jo-Israel chiwo ni Ruoth Nyasaye, amiyo gi yawuoti kod nyigi, kaluwore gi chik mochwere. Mano en singruok mosiko ma ok kethre, ma Ruoth Nyasaye otimo kodi kaachiel gi nyikwayi bende.”

²⁰Ruoth Nyasaye nomedo wacho ni Harun niya, “In ok nibed gi lowo mopogni e piny jo-Israel. Ok ginipogni kata lithe matin, nimar an e mwanduni kendo e pokni.

²¹ “Jo-Lawi to amiyo achiel kuom apar mag gik moko duto obed pokgi kuom tich rito Hemb Romo.

²²Jo-Israel ok nochak osud machiegni gi Hema, nono to githo.

²³To jo-Lawi ema nobed ka tiyo tich Hema, kendo gimoro amora marach motimore kuome nobed wachgi. Mano e chik momakou gi nyikwau nyaka chieng. Ok giniyud lowo moro mopognigi kuom jo-Israel,

²⁴nimar amiyogi achiel kuom apar mag gik moko ma jo-Israel chiwo ni Ruoth Nyasaye, mondo obed mwandugi. Mano emomiyo anyisogi ni ok giniyud lowo mopognigi kuom jo-Israel.”

²⁵Ruoth Nyasaye nowacho ni Musa niya,

²⁶“Nyis jo-Lawi kama, “Ka jo-Israel chiwonu achiel kuom apar mag mwandugi, ma amiyou ka poku, to un bende nyaka uchiw ni Ruoth Nyasaye achiel kuom apar mag gigo.

²⁷Chiwono nokwan mana ka cham mogol kar dino, kata divai mogol kar bicho.

²⁸Mano e kaka unugol ni Ruoth Nyasaye chiwo mogol kuom achiel kuom apar duto ma uyudo kuom jo-Israel. Chiwo mugolo ni Ruoth Nyasayeno nyaka umi Harun jadolo.

²⁹Kuom chiwo duto muyudo, unugolie mich michiwo ni Ruoth Nyasaye. Nyaka uchiw mana mabeyo moloyoe kuomgi.

³⁰“Bende wach ni jo-Lawi niya, “Ka usegolo ni Ruoth Nyasaye mich mabeyo moloyo kuom poku, to modong’ nobednu ka cham mogol kar dino, kata divai mogol kar bicho.

³¹Unyalo chamogi kamoro amora gi joodu. En e pok muyudo kuom tiyo e Hemb Romo.

³²Ka usegolo ni Ruoth Nyasaye gik mabeyoe moloyo kamano, to ok unubed joketho kuom wachno, kendo ok nobed ni udwanyo gik maler ma jo-Israel ochiwo, ma dimi utho.”