Read luo Kwan 19 Bible Online

Kwan 19 - luo bible

Kwan 19

¹Ruoth Nyasaye nowacho ni Musa gi Harun mondo onyis jo-Israel chik moseketno, kowacho miya,

²“Wachnigiuru ni mondo gikel ni Musa dhiang’ malando ha maonge songa, kendo ma pok otuene jok.

³Nyaka ichiwe ni Eleazar jadolo mondo ogole oko yo wuokchieng’ mar kambi, kendo onege kuno.

⁴Eleazar jadolo nogwel remo gi lith lwete, kendo nokir nyadibiriyo kochomo yo ka nyim Hemb Romo.

⁵Nyaka wang’ dheno mana e wang’e koneno; piene gi ringre gi rembe kod owuoche duto nyaka wang’.

⁶Jadolo nokaw yiend sida gi owino kod usi makwar, mi nobolgi e chuny mach ma dhiang’ wang’ie.

⁷Bang’e enolwok lepe kendo nolwokre gi pi, eka onyalo donjo e kambi, to kata kamano, pod nosik kogak nyaka chieng’ podhi.

⁸Ng’at mowang’o dheno nolwok lepe, kendo nolwokre, to en bende nosik kogak nyaka chieng’ podhi.

⁹ Bang’ mano, ng’at ma ok ogak nojow buch dheno, mi nodhi oole oko mar kambi, kamoro maler. Nyaka kan buruno mondo oganda jo-Israel olosgo pi mar pwodhruk, nikech dheno otimgo misango mar golo richo.

¹⁰Ng’at mane ojowo buch dheno nyaka lwok lepe, to en bende nosik kogak nyaka chieng’ podhi. Chikni omako jo-Israel nyaka chieng, kaachiel gi jopinje mamoko modak kuomgi.

¹¹“Ng’at momulo ng’at motho nobed mogak kuom ndalo abiriyo.

¹²Enopwodhre gi pi pwodhruok chieng’ mar adek gi chieng’ mar abiriyo, to nosik kogak.

¹³Ng’ato momulo ng’at motho, to ok nopwodhre, ochido Hema Maler mar Ruoth Nyasaye. Ng’atno nong’ad kare oko kuom jo-Israel. Pi pwodhruok ne ok kir kuome, omiyo osiko kogak.

¹⁴“Ka ng’ato otho e hema, to chik moketi ema: Ng’ato ang’ata modonjo e hemano, kata ng’ato ang’ata manie hemano nobed mogak kuom ndalo abiriyo,

¹⁵kendo agulu manie hemano ma dhoge ni nono ma ok oum, bende nobed mogak.

¹⁶Kata ka ng’at man oko omulo ng’at moneg e lweny kata ng’at ma otho athoya, kata omulo choke dhano kata mana liel obedo mogak kuom ndalo abiriyo.

¹⁷Kuom gak ma kamano, ginikaw buch misango mar golo richo, mi giruw gi pi aora manie agulu.

¹⁸Bang’e ng’at ma ok ogak nokaw owino mi nolut e pigno, eka nokir e hema kod e gik moko manie iye, kaachiel gi ji duto ma tho ng’atno oyudo kanyo. Ng’at momulo choke dhano, kata ng’at monegi, kata ng’at motho athoya, kata momulo liel, bende nokir pigno kuome.

¹⁹Ng’at ma ok ogak nyaka kir pigno kuom ng’at mogak chieng’ mar adek gi chieng’ mar abiriyo, mi chieng’ mar abiriyo nodok mopwodhore kuom gakne. Nolwok lepe, kendo nolwokre, eka nobed maler ka chieng’ opodho.

²⁰“To ka ng’at ma ogak ok opwodhore, to nyaka ng’ad kare oko kuom ogandagi, nimar dochid Kama Ler mar Ruoth Nyasaye. Pi pwodhruok ok okir kuome, omiyo osiko kogak.

²¹“Chikno omakou nyaka chieng’. Ng’at makiro pi pwodhruok nyaka lwok lepe, kendo ng’ato ang’ata momulo pigno nobed mogak nyaka chieng’ podhi.

²²Gimoro amora ma ng’at mogak omulo bedo mogak, kata ng’at momulo gino bende bedo mogak nyaka chieng’ podhi.”