Read luo Kwan 20 Bible Online

Kwan 20 - luo bible

Kwan 20

¹E due mokwongo, oganda jo-Israel duto nochopo e thim Zin, kendo ne gibet Kadesh kuom kinde mogwarore. Kanyo ema Miriam nothoe, moyikee.

² Pi ne onge ni jo-Israel kanyo, omiyo ne gichako ng’ur ni Musa gi Harun.

³Ne gidhaw gi Musa ka giwacho niya, “Mad ne watho kaachiel gi jowetewa mane otho e nyim Ruoth Nyasaye!

⁴Ere gima omiyo isekelo oganda mar Ruoth Nyasaye e thimni mondo wathoe kaachiel gi jambwa?

⁵Ang’o momiyo nigolowa Misri kikelowa kama rach ma kata cham kata ng’owo kata mzabibu kata komamanga ok nyagie, bende onge kata mana pi ma dwamodhi?”

⁶Musa kod Harun nodhi e Hema Miromoe gi Nyasaye e nyim jo-Israel. Ne gipodho piny auma, mi duong’ maler mar Ruoth Nyasaye nothinyore.

⁷Ruoth Nyasaye nowacho ni Musa niya,

⁸“Kaw ludhi, kendo in gi Harun owadu, uchok jo-Israel kanyakla, kendo chik lwanda mondo ogol pi ka ji duto neno. Kamano inigol pi e lwanda mondo oganda omodhi, kaachiel gi jambgi.”

⁹Musa nokawo ludhno e nyim Ruoth Nyasaye, mowuokgo kaka Ruoth Nyasaye nosechike.

¹⁰Bang’e Musa gi Harun nochoko oganda kanyakla e nyim lwandano. Musa nowachonigi niya, “Winjuru un joma tokgi tekgi! Uparo ni nyaka wagolnu pi e lwandani koso?”

¹¹Eka noting’o bade mogoyo lwandano diriyo gi ludhe. Pi nobubni mang’eny, mi oganda nomodho kaachiel gi jambgi.

¹²To Ruoth Nyasaye nowachi ni Musa gi Harun niya, “Ne ok ugena moromo nyiso jo-Israel ni an ng’ama ler! Kuom mano ok unyal tero ogandani nyaka piny mane asingora ni namigi.”

¹³Mago e sokni mag Meriba, kama ne jo-Israel odhawie gi Ruoth Nyasaye mi nonyisogi ni en ng’ama ler. (Tiend Meriba en dhaw.)

¹⁴Kane jo-Israel ni Kadesh, Musa nooro joote ir ruodh Edom, kowacho niya, “Owadu Israel owacho kama: Ing’eyo malong’o chandruok duto mwaseyudo,

¹⁵kendo kaka kwerewa nodhi Misri, mi wasedak kuno kuom higni mang’eny. Jo-Misri nothagowa malit mana kaka ne githago kwerewa,

¹⁶to kane waywak ni Ruoth Nyasaye mondo okonywa, nowinjo ywakwa, mooro malaika mogolowa Misri, omiyo koro wan Kadesh, dala ma en tong’ pinyi.

¹⁷Wakwayi ni yie wakadhi e pinyi. Ok wananyon puotheu mag cham kata mag mzabibu, kendo ok wanamodh e sokniu. Wanaluw mana Ndach Ruoth, kendo ok wanabar korachwich kata koracham nyaka wakadh pinyi.”

¹⁸To jo-Edom nodwoke niya, “Ok unyal kadho e pinywa, nono to wamonjou.”

¹⁹To jo-Israel nowacho niya, “Donge wabiro mana luwo Ndara? To kata ka wan gi jambwa wamodho piu to wanachulu. Omiyo wewauru wang’ad ang’ada.”

²⁰To jo-Edom ne ok oyienigi mondo gikadhi, kendo ne giwuok gi jolweny mathoth mondo girad kodgi.

²¹Kamano jo-Edom notamo jo-Israel kadho e pinygi, mi jo-Israel notando, moluwo komachielo.

²²Oganda jo-Israel nowuok Kadesh, modhi e got Hor.

²³Ruoth Nyasaye nowacho ni Musa gi Harun e got Hor man but tong’ piny Edom niya,

²⁴“Harun biro tho, mi luw kwerene, to ok nodonji e piny ma nasingora ni nami jo-Israel, nikech nudagi rito chikna kuom pi Meriba.

²⁵Kaw Harun kod Eleazar wuode mondo uidhgo got Hor.

²⁶Eka ilony lep Harun mondo irwakni Eleazar wuode. Harun to notho mana kanyo, koluwo kwerene.”

²⁷Musa notimo kaka Ruoth Nyasaye nochike, mi ne giidho got Hor, ka oganda duto neno.

²⁸ Nolonyo lep Harun, morwako ni Eleazar wuod Harun. Harun to notho ewi got kanyo. Bang’e Musa gi Eleazar nolor piny oa e got.

²⁹Kane oganda jo-Israel oneno ni Harun osetho, ne giywage kuom ndalo piero adek.